އެމްއެމްޕީއާރުސީގެ ހިޔާނާތުގެ މައްސަލައިގައި ޕީޖީ އޮފީހުގައި ނުފޫޒު އޮތްތޯ އެބަ ބަލަން، ރިޕޯޓު އަންނަ ހަފްތާގައި ލިބޭނެ: ޕީޖީ
19 ޖޫން 2020 | ހުކުރު 08:32އަންނަ ހަފްތާ ރިޕޯޓް ލިބޭނެ
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
އެމްއެމްޕީއާރުސީގެ ހިޔާނާތުގެ މައްސަލައިގައި ޕްރޮސިކިއުޓަރ ޖެނެރަލްގެ އޮފީހުގައި ނުފޫޒު އޮތްތޯ ބަލަމުން ދާކަމަށާއި ހަފްތާއެއްހާ ދުވަހުގެ ތެރޭގައި ރިޕޯޓު ލިބޭނެކަމަށް ޕްރޮސިކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ޕީޖީ ޝަމީމް ވިދާޅުވީ އެމްއެމްޕީއާރުސީގެ ހިޔާނާތުގެ މައްސަލައިގައި އެއިރުގެ ހުރި މިނިވަން މުއައްސަސާތަކަށް ނުފޫޒު ފޯރުވާފައިވާ ކަމުގެ ތުހުމަތު ކުރެވުނު ކަމަށާއި ޕީޖީ އޮފީހަށްވެސް ނުފޫޒު އޮތްތޯ ބަލަމުން ދާކަމަށެވެ.
އޭނާ ވިދާޅުވީ، އެމްއެމްޕީއާރުސީގެ މައްސަލައިގައި ކުރީގައި މަސައްކަތް ކުރެއްވި ބޭފުޅުންނާއި މިހާރު އުޅުއްވާ ބޭފުޅުންނާއި މެދު އެއްވެސް ކަހަލަ ސުވާލު އުފެދޭ ކަމެއް އޮތްތޯ ބެލުމަށް ޕީޖީ އޮފީހުގެ އެތޭރޭގެ އިންްކުއަރީ ހެދުމަށް 3 ބޭފުޅެއްގެ ކޮމިޓީއަކާއި ހަވާލު ކޮށްފައިވާނެކަމަށެވެ.
ކުރިޔަށް އޮތް ހަފްތާއެއް ހާ ދުވަހުގެ ތެރޭގައި އޭގެ ރިޕޯޓު ލިބޭނެކަން ފާހަގަކޮށް ޕީޖީ އިތުރަށް ވިދާޅުވީ، އޭގެއިން ޕީޖީ އޮފީހުގައި "ވީކްނެސް" ހުރި ދިމާތައް ދެނަގަނެވޭނެ ކަމަށެވެ. އަދި އެތަންތަން ރަނގަޅުކުރާނެ ކަމަށް ޕީޖީ ވިދާޅުވިއެވެ. އަދި މިހާރު މި ކުރިޔަށް ދާ މަރުހަލާގެ ތެރެއިން އެއްވެސް ފަރާތެއްގެ ނުފޫޒެއް ނެތްކަން ޔަގީން ކަމާއި އެކު ދަންނަވަން ކެރޭނެ ކަމަށް ޕީޖީ ވަނީ ވިދާޅުވެފައެވެ.
ޕީޖީ ވިދާޅުވީ މުވައްޒަފަކު ގޯހެއް ހަދާފައިވާކަން ފާހަގަވެއްޖެ ކަމުގައި ވާނަމަ އޮންނަ އުސޫލުގެ ތެރެއިން ފިޔަވަޅު އަޅާނެކަމަށެވެ.
