ހޯމަ ދުވަހު މަޖިލިސް ދޮށުގައި މުޒާހަރާކުރަނީ
16 ޖޫން 2020 | އަންގާރަ 18:10މުޒާހަރާ އޯގަނައިޒް ކުރުމުގައި ބައިވެރިވާން ބޭނުންނަމަ 9477309 އަށް ގުޅާލާ
ނަވާނަވައިން މީގެ ކުރިން ބޭއްވި ހިމޭން އިހުތިޖާޖުގެ ތެރެއިން
ރައްޔިތުންގެ މަޖިލީހުގެ އިދާރާގެ ބޭރުގައި ހޯމަ ދުވަހު މުޒާހަރާކުރަން ނިންމާފައިވާ ކަމަށް ސިޔާސީ، އިގުތިސާދީ އަދި އިޖްތިމާއީ ގޮތުން ރައްޔިތުން ބާރުވެރިކުރުވުމަށް ހަރަކާތްތައް ހިންގަމުން އަންނަ "ނަވާނަވައި" މޫވްމެންޓުން ބުނެފިއެވެ.
ރާއްޖެ.އެމްވީއަށް މައުލޫމާތު ދެއްވަމުން ނަވާނައިގެ ސްޕޯކްސްޕަރސަން ފާތިމަތު ސާއިރާ ވިދާޅުވީ، މަޖިލީހުގެ ބޭރުގައި އޮންނަ މުޒާހަރާ ފަށާނީ ހޯމަ ދުވަހުގެ ހެނދުނުގެ 08:30 ހާއިރު ކަމަށެވެ.
މަޖިލިސް ކުރާ އިދާރާ ކުރިމަތީގައި މުޒާހަރާކުރަން ނިންމި ސަބަބު ކިޔައިދެއްވަމުން ސާއިރާ ވިދާޅުވީ، ކޮވިޑް-19 އާ ގުޅިގެން އިންކަމް ސަޕޯޓް އެލަވެންސް ލިބުނު މީހުންގެ އަދަދު ދަށްވުމުގެ އިތުރުން އެލަވަންސް ލިބުން ލަސްވުމާއި، އެލަވަންގެ ގޮތުގައި ލިބުނު އަދަދު ދަށްވުމާއި، ކޮވިޑް-19 ގެ ހާލަތުގައި ކުލި ނުދެއްކިގެން ގެތަކުން މީހުން ނެރެމުންދާ މައްސަލާގައި މަޖިލީހުން އެއްވެސް ފިޔަވަޅެއް އެޅިފައި ނުވުމާއި، ފަޅުހިއްކަމުން ދިޔުމުގެ މައްސަލައިގެ އިތުރުން އަންހެނުންނާއި ކުޑަކުދިންނަށް ރައްކަތެރިކަމަށްކުރާ ހޭދަ ދަށްވުމުން ކަމަށެވެ.
އިތުރަށް ވިދާޅުވީ، އެކަންތައްތަކަށް މަޖިލީހުގެ މެމްބަރުން އަޑުއުފުލާފައި ނުވާއިރު އަދި މިހާތަނަށް އެކަމަށް ހައްލެއް ހޯދުމަށް މަޖިލީހުން މަސައްކަތްކޮށްފައިނުވާ ކަމަށެވެ. ނަވާނަވައިން ވަނީ ވިހާވެސް ގިނަ ބަޔަކު މުޒާހަރާ އަށް ދިޔުމަށް އެދިފައެވެ. އަދި ހުރިހާ އެންމެންވެސް މާސްކު އަޅައިގެން ތިބުމަށާއި، ގައިދުރުކަން ބެހެއްޓުމަށް ނަވާނަވައިން އިލްތިމާސްކުރެއެވެ.
