އަންހެނުންނާމެދު ކުރާ ތަފާތުކުރުންތަކަށް ހުއްޓުމެއް ގެނައުމަށް ހުރި ހުރަސްތައް ދެނެގަތުމަށްޓަކައި ޕާލިމަންޓަރީ އިންކުއަރީއެއް ހަދަނީ
16 ޖޫން 2020 | އަންގާރަ 10:03މި ގަރާރު ބަލައިގަތުމަށް ވޯޓު ދެއްވީ 71 މެމްބަރުން
ގަރާރު ހުށަހެޅުއްވި، ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ
ދިވެހިރާއްޖޭގައި އަންހެނުންނާމެދު ކުރާ ތަފާތުކުރުންތަކަށް ހުއްޓުމެއް ގެނައުމަށްޓަކައި، ކަމާގުޅޭ ސިޔާސަތުތަކާއި، ނިޒާމާއި ޤާނޫނުތަކާއި ގަވާއިދުތަކުގައި ހުރި ހުރަސްތަކާއި ތަފާތުކުރުންތައްދެނެގަތުމަށްޓަކައި ޕާލިމަންޓަރީ އިންކުއަރީއެއް ހެދުމަށް ގޮވާލައި ހުށަހެޅި ޤަރާރު ބަލައިގަތުމަށް ފާސްކޮށްފިއެވެ.
އަންގާރަ ދުވަހުގެ ޖަލްސާގައި މި ގަރާރު ބަލައިގަތުމަށް ވޯޓު ދެއްވީ 71 މެމްބަރުންނެވެ. މި ގަރާރު ދިރާސާ ކުރުމަށް ފޮނުވާފައިވަނީ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށެވެ.
މި ގަރާރަކީ ދިވެހިރާއްޖޭގައި، އެކި ދާއިރާތަކުގައި އަންހެނުންނާމެދު ކުރާ ތަފާތުކުރުންތަކަށް ނިމުމެއްގެނައުމަށްޓަކައި ނުވަތަ ކުޑަކުރުމަށްޓަކައި ކުރާ މަސައްކަތުގައި، ދިވެހިރާއްޖޭގައި ޢަމަލުކުރަމުންދާ ޤާނޫނުތަކާއި ގަވާއިދުތަކާއި ސިޔާސަތުތަކުގައި އަންހެނުންނާމެދު ގެންގުޅޭ ތަފާތުކުރުންތަކަކީ ކޮބައިކަމާއި، އަންހެނުންނަށް ހުރިހުރަސްތަކާއި ތަފާތުކުރުންތައް ނައްތާލުމުގައި ހުރި ދަތިތަކާއި އުނދަގޫތަކަކީ ކޮބައިކަން ދެނެގަތުމަށްޓަކައި ރައްޔިތުންގެ މަޖިލީހުން ޕާލިމަންޓަރީ އިންކުއަރީއެއް ހެދުމަށް ގޮވާލައި ހުށަހަޅާފައިވާ ޤަރާރެކެވެ.
ގަރާރުގައި އިތުރަށް ވަނީ މުޖްތަމަޢުގައި އަންހެނުންނާމެދު ކުރާ ނޭދެވޭ ތަފާތުކުރުންތައް ނައްތާލުމަށް އެކަށީގެންވާ ފިޔަވަޅުއެޅުމަށާއި، ދިވެހި މުޖްތަމަޢުގައި އަންހެނުންނަށް ހަމަހަމަ ފުރުޞަތު މަގުފަހިކޮށްދިނުމަށާއި، ޤާނޫނުގެ ކުރިމަތީގައި ހަމަހަމަކަން ކަށަވަރުކޮށްދިނުމަށް ޤާނޫނުތަކާއި ގަވާއިދުތަކާއި، ސިޔާސަތުތަކާއި، ނިޒާމުގައި ހުރި ދަތިތަކާއި ގޮންޖެހުންތަކަކީ ކޮބައިކަން ދެނެގަތުމަށް ރައްޔިތުންގެ މަޖިލީހުގެ ކަމާގުޅޭ ކޮމިޓީން ޕާލިމަންޓަރީ އިންކުއަރީއެއް ހެދުމަށް ގޮވާލާފައެވެ. އަދި އެކަމަށް ދާއިމީ ޙައްލެއް ހޯދުމަށްޓަކައި، އިޞްލާޙުކުރަންޖެހޭ ކަންކަން ބަޔާންކޮށް އެ ކޮމިޓީގެ ރިކޮމެންޑޭޝަންސްތައް ރައްޔިތުންގެ މަޖިލީހަށް ހުށަހެޅުމަށް ވެސް ގޮވާލައްވާފައިވެއެވެ.
