ފަސްކޮށްފައިވާ ލޯކަލް ކައުންސިލްތަކުގެ އިންތިޚާބުގައި ވާދަކުރާ ކެންޑިޑޭޓުންގެ ތެރެއިން ނަން އަނބުރާ ނެގުމަށް ބޭނުންވާ ކެންޑިޑޭޓުންނަށް ފުރުސަތު ދިނުމުގެ ގޮތުން އެކަމަށް ހާއްސަ އުސޫލެއް އެކުލަވާލުމުގެ މަސައްކަތް އިލެކްޝަންސް ކޮމިޝަނުން ފަށައިފި އެވެ.

އިލެކްޝަންސް ކޮމިޝަނުގެ ނައިބު ރައީސް އަދި އެކޮމިޝަނުގެ ތަރުޖަމާނު އަހުމަދު އަކްރަމް "ރާއްޖެއެމްވީ" އަށް ވިދާޅުވީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ޤާނޫނު 2020ގެ ދަށުން، ފަސްކޮށްފައިވާ ލޯކަލް ކައުންސިލްތަކުގެ އިންތިހާބުގައި ވާދަކުރާ ކެންޑިޑޭޓުންގެ ތެރެއިން، ނަން އަނބުރާ ނަގަން ބޭނުންވާ ކެންޑިޑޭޓުންނަށް އެފުރުސަތު ދިނުމަށް ބުނެފައިވާ ކަމަށެވެ. އެހެންކަމުން، އިލެކްޝަންސް ކޮމިޝަނުން އެކަމަށް އުސޫލެއް ޑްރާފްޓް ކުރަމުންދާ ކަމަށާއި، އަންނަ ހަފްތާގައި އެ އުސޫލް އާންމު ކުރެވޭނެ ކަމަށް ވެސް އަކްރަމް ވިދާޅުވި އެވެ.

އެ އުސޫލްގެ ދަށުން ކެންޑިޑޭޓުންގެ ތެރެއިން ނަން އަނބުރާ ނަަގަން ބޭނުންވާ ކެންޑިޑޭޓުންނަށް އެފުރުސަތު ލިބިގެންދާނެ އެވެ.

ކޮވިޑް-19 ރޯގާ ރާއްޖޭގައި ފެތުރެން ފެށުމާއި ގުޅިގެން، މިއަހަރުގެ އޭޕްރީމލް މަހުގެ 4 ވަނަ ދުވަހު ބާއްވަން އޮތް ލޯކަލް ކައުންސިލްތަކުގެ އިންތިހާބު މިހާރު ވަނީ، ލޯކަލް ކައުންސިލްތަކުގެ އިންތިޚާބުގެ ޚާއްޞަ ޤާނޫނު 2020ގެ ދަށުން ފަސްކުރެވިފަ އެވެ.

އެގާނޫނަކީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށްޓަކައި، ޢާންމު ޞިއްޙަތު ރައްކާތެރިކުރުމުގެ ޤާނޫނުގެ 33 ވަނަ މާއްދާގެ ދަށުން ދިވެހިރާއްޖޭގައި ޢާންމު ޞިއްޙަތުގެ ކުއްލި ނުރައްކަލުގެ ޙާލަތެއް އިޢުލާނު ކޮށްފައި ވާތީއާއި، އެ ބަލި މުޖުތަމަޢުގެ ތެރޭގައި ފެތުރުނަ ނުދިނުމަށް އަޅަންޖެހޭ ގިނަ ފިޔަވަޅުތަކެއް ހިމެނޭތީ، އިންތިޚާބު ބޭއްވުމަށް ރައްކާތެރި މާޙައުލެއް ޤާއިމު ކުރެވެންދެން ފަސްކުރުމަށާއި، އެ އިންތިޚާބާގުޅޭ އެނޫންވެސް ޚާއްޞަ އުޞޫލުތަކެއް އެކަށައެޅުމުގެ ޤާނޫނެކެވެ.

އެގާނޫނުގެ ބުނެފައިވާ ގޮތުގައި، މި ޤާނޫނަށް ޢަމަލުކުރަން ފެށުމާއެކު ލޯކަލް ކައުންސިލްތަކުގެ އިންތިޚާބު 2020 އާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު ފަސްކުރެވޭނެ ކަމަށެވެ. އަދި މި އިންތިޚާބުތައް މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 1 އަހަރު ދުވަހުގެ ތެރޭގައި ބާއްވައި ނިންމަންވާނެ ކަމަށްވެސް ބުނެފައި ވެއެވެ. މިގާނޫނު ތަސްދީގުކޮށް އަމަލު ކުރަން ފަށާފައިވަނީ މިދިއަ މެއި މަހުގެ 10 ވަނަ ދުވަހު އެވެ.

ކައުންސިލްތަކުގެ އިންތިޚާބު ފަސްކުރަން ނިންމުމާއެކު، މި ޖޫން މަހުގެ 3 ވަނަ ދުވަހު، ދައުރު ނިމުނު ކައުންސިލްތަކުގެ ދައުރު ވަނީ، ގާނޫނުއަސާސީއަށް އިސްލާހު ގެނެސް، ލޯކަލް ކައުންސިލްތަކުގެ އިންތިހާބު ބާއްވައި، އަދި އައު އެކައުންސިލްތައް އެކުލަވާލެވެންދެން މިހާރު ހިނގަމުންދާ ކައުންސިލްތަކުގެ ދައުރު ދިގު ދައްމާލާފަ އެވެ.

މީގެއިތުރުން، ޖޫން 3ން ފެށިގެން އައު ކައުންސިލްތައް އެކުލަވާދެވެންދެން، ކައުންސިލްތަކުން އަމަލު ކުރާނެ ގޮތުގެ ހާއްސަ ބިލެއް ވެސް މަޖިލީހަށް ހުށަހެޅި ވަނީ ފާސްކޮށްފަ އެވެ. އެއީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ޤާނޫނު 2020 އެވެ.