މީހަކަށް އަނިޔާކުރި 3 ފުލުހަކު ވަޒީފާއިން ވަކިކޮށް، އެކަކު ޑީމޯޓް ކޮށްފި

ގާނޫނުން ލިބިދީފައިވާ ބާރުގެ ބޭނުން ނަހަމަ ގޮތުގައި ހިފުމާއި ގުޅިގެން 3 ފުލުހަކު ވަޒީފާއިން ވަކިކޮށް އެކެއްގެ މަގާމު ދަށްކޮށްފައިވާކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.

ކޮމިޝަނަރ އޮފް ޕޮލިސް ކުރެއްވި ޓުވީޓެއްގައި ވިދާޅުވީ، އާންމު ރައްޔިތަކަށް ގަސްތުގައި އަނިޔާ ކުރުމުގެ މައްސަލައިގައި ޑިސިޕްލެނަރީ ބޯޑުން 4 ފުލުހަކާއި މެދު ފިޔަވަޅު އަޅާފައިވާކަމަށެވެ. މިދިޔަ އަހަރުގެ އޯގަސްޓް މަހުގެ 5 ވަނަ ދުވަހުގައި ހިނގައިދިޔަ މި މައްސަލައާއި ގުޅިގެން ޑިސެޕްލަނަރީ ބޯޑުން ވަނީ 3 ފުލުހަކު ވަޒީފާއިން ވަކިކޮށް އެކަކުގެ މަގާމުގެ ދަށް ކޮށްފައެވެ.

Advertisement

މިކަން ހިއްސާކޮށް، ހަމީދު ވިދާޅުވީ މުއައްސަސާ ރިފޯމްކޮށް އާންމުންގެ އިތުބާރު ލިބިފައިވާ ތަނެއްގެ ގޮތުގައި ގިނަ މަސައްކަތްތަކެއް ކުރަމުން އަންނަ ކަމަށާއި އެކަންތައް އޮންނަ އުސޫލުތަކުގެ ތެރެއިން ކުރާނެކަމަށެވެ. އަދި ފުލުހުންގެ ފަރާތުން ފެންނަ މިފަދަ މައްސަލަތަކުގެ ވާހަކަ ދެއްކުމުގެ ބަދަލުގައި އޮންނަ އުސޫލުގެ ތެރެއިން ފިޔަވަޅު އެޅުން މާ ރަނގަޅުވާނެކަމަށެވެ.

ފުލުހުންގެ ހިދުމަތުގެ ބިލަށް ބަހުސްކުރައްވަމުން ރައްޔިތުންގެ މަޖިލީހުގެ މެމްބަރުން ފުލުހުންގެ މުއައްސަސާގެ ކަންކަން ރަނަގޅުނުވާކަމަށް ވިދާޅުވެ ފާޑުވިދާޅުވެފައިވާ ދަނޑިވަޅެއްގައި، ސީޕީ ވިދާޅުވީ ކަންކަން ނުކުރެވޭ ވާހަކަ ދެއްކުމަކީ ބޭކާރު ކަމެއްކަމަށެވެ. އޭނާ އިތުރަށް ވިދާޅުވީ، މުއައްސަސާގައި މަސައްކަތް ކުރާ 34 އިންސައްތަ އަށް ވުރެ ގިނަ ފަރާތްތަކަކީ މަތީ ސާނަވީ ތައުލީމަށް ވުރެން މަތިން ހާސިލްކޮށްފައިވާ ފަރާތްތައްކަމަށެވެ.

އެ މުއައްސަސާގައި ވަޒީފާ އަދާކުރާ ސްޓާފުންނާއި ފުލުހުން ހިމެނޭ ގޮތަށް 220 ފަރާތެއްގެ އަތުގައި ޕޯސްޓް ގްރެޖުއޭޓް ޑިގްރީ އޮންނަކަމަށާއި ފުލުހުންނަށް "ޕޮލިސިންގް ސްކިލްސް" އިތުރަަށް ދަސްވެގެން ދަނީ ވަޒީފާގެ މާހައުލުން ކަމަށެވެ. ސީޕީ ވިދާޅުވީ، މިއީ ދުނިޔޭގެ ހުރިހާ ކަންކޮޅުތަކުގައިވެސް ގަބޫލުކުރާނެ ހަގީގަތެއްކަމަށެވެ.

ރާއްޖެގެ ފުލުހުންގެ މުއައްސަސާއަކީ، އަނިޔާވެރިކަމާއި ގާނޫނީ އިމުން ބޭރުން ކަންތައް ކުރާ ބަޔެއްކަމަށް ރައްޔިތުން ބުނެއެވެ. އަދި އެފަދަ ކުށްތައް ކޮށްފައިވާ ފަރާތްތަކާއި މެދު ގާނޫނީ ގޮތުން އަޅަން ޖެހޭ ފިޔަވަޅު ނާޅަނީސް އެ މުއައްސަސާއަށް އިތުބާރު ނުލިބޭނެކަމަށް ގިނަ ފަރާތްތަކުން ފާހަގަކުރެއެވެ.