ކޮވިޑް ނެތް ރަށްރަށުގައި، އަންނަ ޖުލައި މަހުގެ 1 ގައި ސްކޫލްތައް ހުޅުވާލަން ނިންމާފައިވާކަން އިއުލާންކޮށްފިއެވެ.

ހޯމަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެޑިއުކޭޝަން މިނިސްޓަރު ވިދާޅުވީ، ޖުލައި މަހުގެ އެއްވަނަ ދުވަހު ސްކޫލުތައް ހުޅުވަން ކަނޑައަޅާފައިވަނީ ހެލްތް ޕްރޮޓެކްޝަން އެޖެންސީ (އެޗްޕީއޭ) އާއެކު މަޝްވަރާ ކުރުމަށް ފަހު ކަމަށެވެ.

ނިއު ނޯމަލް ގައި ސްކޫލްތައް ހުޅުވާލާނީ ފޭސްތަކަކަށް ބަހާލައިގެންނެވެ. ޑރ. އައިޝަތު އަލީ ވިދާޅުވި ގޮތުގައި ސްކޫލުތައް ހުޅުވާލައިރުވެސް އެންމެ ބޮޑަށް އިސްކަމެއްދެނީ ސްކޫލުގެ ދަރިވަރުންގެ ސިއްހީ ރައްކާތެރިކަމަށެވެ. ކޮވިޑު ބަލީގެ ހާލަތުގައި ސްކޫލުތައް ހުޅުވަން ނިންމީ، އެއީ ވަރަށް މުހިއްމު ކަމެއް ކަމަށް ދެކިވަޑައިގަންނަވާތީ ކަމަށާއި، ގިނަ ދުވަސްތަކަކަށް ސްކޫލްތައް ބަންދުކޮށްފައި އޮތުމުން ދަރިވަރުން ވަރަށް ގިނަ ކަންތައްތަކުން މަހުރޫމްވެފައިވާތީ ކަމަށް ވިދާޅުވިއެވެ.

މިނިސްޓަރު ވިދާޅުވީ، ސްކޫލްތައް ބަންދުކުރި ދުވަހުން ފެށިގެން އެ މިނިސްޓްރީން މަސައްކަތްކުރަމުން ދިޔައީ މެދުނުކެނޑި ކުދިންގެ ކިޔެވުން ކުރިޔަށް ގެންދިޔުމުގެ މަސައްކަތް ކަމަށެވެ. އެޑިއުކޭޝަން މިނިސްޓްރީން ދަނީ ޓެލެކިލާސްތަކާއި ގޫގުލް ކިލާސްތައް މެދުވެރިކޮށް ދަރިވަރުންނަށް ކިޔަވައިދެމުންނެވެ.

ނިއު ނޯމަލްގައި ސްކޫލުތައް ހުޅުވާލާއިރު، އަމަލުކުރާނެ ގޮތުގެ ގައިޑްލައިނެއް އެޑިއުކޭޝަން މިނިސްޓްރީން ވަނީ ހުރިހާ ސްކޫލްތަކަށް ފޮނުވާފައެވެ. އެ ގައިޑްލައިންގެ އިތުރު ތަފްސީލު ދެއްވަމުން ޑރ. އައިޝަތު އަލީ ވަނީ ބަލީގެ އަލާމާތް ހުރި އެއްވެސް ޓީޗަރެއް ނުވަތަ ދަރިވަރަކު ސްކޫލަށް ނުދިޔުމަށް އިލްތިމާސް ކުރައްވާފަ އެވެ.

އެޑިއުކޭޝަން މިނިސްޓްރީން ބުނީ، ސްކޫލްތައް ހުޅުވާލުމުގެ ޕްލޭން ހަދާފައިވަނީ ޔުނިސެފްއާއި ގުޅިގެން ކަމަށެވެ. ޕްލޭން ބެހިގެންވަނީ މައިގަނޑު ފަސް ބަޔަކަށެވެ. އެއީ ސްކޫލުތައް ރައްކާތެރިކަމާއިއެކު ހިންގުމާއި، ކިޔަވައިދިނުމާއި އުނގެނުމާއި، މެދުނުކެނޑި ކުރިޔަށް ދިޔުމާއި، ވަލްނަރަބަލް ކުދިންނާ ހަމަޔަށް ވާސިލްވުމުގެ އިތުރުން ބަލިން ރައްކާތެރިވުމާއި ''ރެޒިލިއަންސް'' ބިލްޑް ކުރުމެވެ.

ރައްކާތެރިކަމުގެ ފިޔަވަޅެއްގެ ގޮތުން ހުރިހާ ސްކޫލުތަކެއްގައި އަތޮ ދޮވެވޭނެ އިންތިޒާމް ހަމަޖެއްސުމުގެ ވަސީލަތްތައް ފޯރުކޮށް ދިނުމުގެ މަސައްކަތް ދަނީ ކުރަމުންނެވެ. އަދި އޭގެ އިތުރުން ސްކޫލުތައް ޑިސްއިންފެކްޓު ކުރުމަށް ބޭނުންވާ ތަކެތި ފޯރުކޮށް ދިނުމުގެ މަސައްކަތް ކުރަމުންދާ ކަމަށް ވެސް އެޑިއުކޭޝަން މިނިސްޓަރު ވިދާޅުވިއެވެ.

ސްކޫލަށް ދާއިރު، ދަރިވަރުންނަށް ބޭނުންވާ ސައިކޯ-ސޯޝަލް ސަޕޯޓް ދިނުމުގެ ގޮތުން މިނިސްޓްރީން ދަނީ ސައިކޯ-ސޯޝަލްގެ ބޭސިކް ކްލާސްތަކެއް ޓީޗަރުންނަށް ނަގައިދިނުމުގެ މަސައްކަތް ކުރަމުންނެވެ.

ސްކޫލުތަކަށް ދަރިވަރުން ވެއްދުމުގެ ކުރިން ގޭޓްކައިރިން ހުން ޗެކްކުރާނެއެވެ. ފިޒިކަލް ޑިސްޓެންސިންގެ އިސްކަން ދިނުމުގެ ގޮތުން ސްކޫލްތަކުގެ ކްލާސް ރޫމްތަކުގެ ސައިޒް މިހާރު ވަނީ ކުޑަކޮށްފައެވެ. މިނިސްޓަރު ވިދާޅުވީ 30 އާއި 32 ދަރިވަރުން ތިބޭ ކްލާސްތަކުގެ ސައިޒް މިހާރު 16ށް ބަދަލުކުރެވިފައި ކަމަށެވެ.