މި ސަރުކާރަށް ގެއްލުން ލިބޭނެ އެއްވެސް ކަމެއް ނުކުރާނަން. ރައީސް ނަޝީދު
15 ޖޫން 2020 | ހޯމަ 12:52މިސަރުކާރު ސަލާމަތް ކުރަންވެގެން ގާނޫނު ތަންދިން ހުރިހާކަމެއް ކުރައްވާނަން
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު: އެމްޑީޕީގެ ޕާލަމެންޓްރީ ގްރޫޕުން ގެންގުޅޭ އުސޫލަކީ، ސަރުކާރަށް މަދަދުވެރި، އެހީތެރިކަމާއެކު ޖަވާބުދާރީ ކުރުވުމުގެ އުސޫލްކަމަށް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރަށް ގެއްލުން ލިބޭނެ އެއްވެސް ކަމެއް ނުކުރައްވާނެ ކަމަށް ރައްޔިތުންގެ މަޖިލީހުގެ ރައީސް، އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިހާރު ހިނގަމުންދާ 19ވަނަ ރައްޔިތުންގެ މަޖިލީހުގެ ފުރަތަމަ އަހަރުގެ މަޖިލީހުގެ މަސައްކަތަކާ ގުޅޭގޮތުން، މައުލޫމާތު ދެއްވުމަށް މަޖިލިހުގެ އިދާރާގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ، މިހާރު މިއޮތީ އެމްޑީޕީގެ ވެރިކަމެއް ކަމަށާއި ވެރިކަމުގައި ހުންނެވީ، އެމްޑީޕީގެ ރިޔާސީ ކެންޑިޑޭޓް ކަމަށެވެ. އަދި ރައީސް ޞާލިހު އަކީ އެމްޑީޕީގެ ޕާލަމެންޓްރީ ގްރޫޕްގެ ކުރީގެ ލީޑަރު ކަމަށާއި ރައީސް ޞާލިހުއަކީ އުފަންވީއްސުރެން އެމަނިކުފާނުގެ އެންމެގާތް ރަހްމަތްތެރިޔާ ކަމަށް ރައީސް ނަޝީދު ވިދާޅުވިއެވެ.
އެހެންކަމުން މި ސަރުކާރަށް ގެއްލުންވާނެ އެއްވެސް ކަމެއް އެމަނިކުފާނު ނުކުރައްވާނެ ކަމަށް ރައީސް ނަޝީދު ވިދާޅުވިއެވެ. އަދި މި ސަރުކާރު ސަލާމަތްކުރަން ގާނޫނު ތަންދިން ހުރިހާ ކަމެއް ކުރައްވާނެ ކަމަށްވެސް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، ސަރުކާރު ޖަވާބުދާރީ ކުރުމަކީ ރައްޔިތުންގެ މަޖިލީހުގެ މަސްއޫލިއްޔަތެއް ކަމަށެވެ. އަދި އެމްޑީޕީގެ ޕާލަމެންޓްރީ ގްރޫޕުން ސަރުކާރަށް މަދަދުވެރި، އެހީތެރިކަމާއެކު ޖަވާބުދާރީ ކުރުމުގެ އުސޫލް ގެންގުޅުއްވާ ކަމަށްވެސް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، މިސާލަކަށް، ސަރުކާރުގެ ބޯހިޔާވަހިކަމުގެ ސިޔާސަތު ނުވަތަ ވަކި ޕްރޮޖެކްޓަކާ ގުޅިގެން މަޖިލީހުގެ މެމްބަރުންގެ ކަންބޮޑުވާ ކަމެއް އޮވެއްޖެނަމަ، އެކަންކަން ބެލޭނެ އެތައް ގޮތްތަކެއް އެބައޮތް ކަމަށެވެ. އެގޮތުން މަޖިލީހަށް ނުވަތަ ކޮމެޓީއަށް ހާޒިރުކޮށް، އެވަޒީރަކާ ސުވާލު ކުރެވިދާނެ ކަމަށާއި އަދި އެހުރިހާ ގޮތްތަކެއް އޮންނައިރު، ރައީސުލްޖުމްހޫރިއްޔާއަށް ވެސް ގުޅުއްވޭނެ ކަމަށެވެ. އަދި ހުރިހާ ވަޒީރު ބޭފުޅުންނާ ވެސް ގުޅުއްވޭނެ ކަމަށެވެ.
ވެރިކަން ކުރުމުގެ ބާރުގެ ތެރެއަށް މަޖިލީހުން ވަންނަމުންދާ ކަމަށް އިދިކޮޅު ޕީޕީއެމް-ޕީއެންސީ ކޯލިޝަނުގެ ބައެއްް މެމްބަރުން މަޖިލީހުގައި އަދި އިދިކޮޅު ކޯލިޝަނުގެ އިސްބައެއް ބޭފުޅުން ވިދާޅުވަމުން ގެންދެވިނަމަވެސް އެއީ ވަރަށް ބޮޑު އޮޅުމެއް ކަމަށް ރައީސް ނަޝީދު ވިދާޅުވިއެވެ.
