އެމްޓީސީސީގެ ފެރީ އަދި ބަސް ދަތުރުތައް ނިއުނޯމަލްއާ އެއްގޮތަަށް ފަށައިފި
15 ޖޫން 2020 | ހޯމަ 09:04ދަތުރުކުރާއިރު މާސްކް އަޅަން ޖެހޭ
އެމްޓީސީސީގެ ދާންނާ ގިމަތަ: ދަތުރުތައް ފަށާފައިވަނީ ރައްކާތެރިކަމުގެ ފިޔަވަޅުތަކާއެކު
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ން ނިއުނޯމަލްއާ އެއްގޮތަަށް ފެރީ އަދި ބަސް ދަތުރުތައް ފަށައިފިއެވެ.
އެމްޓީސީސީން ބުނީ ކޮވިޑް-19އާ ގުޅިގެން މާލެ ސިޓީއަށް ކޮށްފައިވާ ލޮކްޑައުންގެ ދެވަނަ ފޭސްގައި ދިން ލުއިތަކާ ގުޅިގެން މިހާރު ނިއުނޯމަލްއާ އެއްގޮތަަށް ހޯމަ ދުވަހުން ފެށިގެން ފެރީ އަދި ބަސް ދަތުރުތައް ފަށައި، ދަތުރުގެ ޝެޑިއުލްތައް އާންމުކޮށްފައިވާ ކަމަށެވެ. ދަތުރުތައް ފަށާފައިވަނީ ކޮވިޑް-19 ކޮންޓްރޯލް ކުރަން އެޅި ރައްކާތެރިކަމުގެ ފިޔަވަޅުތަކާއެކު ކަމަށް އެމްޓީސީސީން ބުނެއެވެ.
ރައްކާތެރިކަމަށް ޚާއްސަ ސަމާލުކަމެއްދޭން ޖެހޭކަން ފާހަގަކޮށް އެމްޓީސީސީން ބުނީ ދަތުރުކުރާއިރު އެންމެން ވެސް މާސްކް އަޅަން ޖެހޭ ކަމަށެވެ. އަދި ޓާމިނަލް ތެރޭގައާއި އުޅަނދުގައި ތިބޭއިރު ފަސިންޖަރުން ތިން ފޫޓުގެ ދުރުމިނެއް ބަހައްޓަންޖެހޭ ކަމަށްވެސް ވަނީ ބުނެފައެވެ.
ޝެޑިއުލް ދަތުރުތަކަށް ބަލާއިރު، ވިލިމާލޭ ފެރީ ދަތުރުތައް އޮންނާނީ ބަންދު ނޫން ދުވަސްތަކުގައި ހެނދުނު 5:45ން ފެށިގެންނެވެ. އެގޮތުން މެންދަމު 1:00އާ ހަމައަށް ކޮންމެ 15 މިނެޓަކުން ފެރީ ދަތުރު އޮންނާނެއެވެ. އެކަމަކު ރޭގަނޑު 22:00ގެ ފަހުން ދަތުރު ކުރެވޭނީ ހުއްދަ ލިބިފައިވާ މީހުންނަށް އެކަނި ކަމަށް އެމްޓީސީސީން ބުނެއެވެ.
ހުޅުމާލޭ ޕްރިމިއަމް ފެރީ ދަތުރުތައް ކޮންމެ ދުވަހެއްގެ ހެނދުނު 6:00ން ރޭގަނޑު 21:30އާ ހަމައަށް އޮންނާނެ ކަމަށެވެ. އަދި ކޮންމެ 30 މިނެޓަކުން ފެރީ އޮންނާނެއެވެ. އަދި ރޭގަނޑު 21:30ގެ ފަހުން ފެރީ އޮންނާނީ ކޮންމެ ގަޑިއިރަކުން އެއް ދަތުރެވެ.
ބަސް ދަތުރުތަކާ ބެހޭ ގޮތުން ވެސް އެމްޓީސީސީން ބުނީ ބަހަށް އަރާ މީހުން ކޮވިޑް-19ން ރައްކާތެރިވުމަށް އަޅަން ޖެހޭ ފިޔަވަޅުތައް އަޅައި އެޗްޕީއޭގެ އިރުޝާދާ ލަފަޔާ އެއްގޮތަށް އަމަލު ކުރުމަށް އެދޭ ކަމަށެވެ.
އެގޮތުން ހުޅުމާލޭ އެތެރޭގައި ދަތުރުކުރާ ބަސްތައް ފަތިހު 5:30ގައި ފަށާއިރު، ރޭގަނޑު 21:55އާ ދެމެދު އާންމު އުސޫލުން ބާއްވާނެއެވެ. އަދި ހުޅުމާލެ އާއި ހުޅުލޭ އެއާޕޯޓާ ދެމެދު ދަތުރުކުރާ ބަސްތައް ވެސް ފަތިހު 5:30ން ފެށިގެން ރޭގަނޑު 00:30ށް ބާއްވާނެއެވެ. އަދި ބަސް ދަތުރުތައް ބާއްވަނީ ކޮންމެ 30 މިނެޓަކުންނެވެ.
މާލެ ސިޓީން ކޮވިޑް-19ގެ ކޭހެއް ފެނުމާ ގުޅިގެން އޭޕްރީލް މަހުގެ 15ގައި ކުރި ލޮކްޑައުނަށް ހޯމަ ދުވަހު ވަނީ ބޮޑެތި ލުއިތަކެއް ދީފައެވެ. ހުއްދައާ ނުލާ ފަތިހު 5:00ން ރޭގަނޑު 22:00ށް ހުއްދައާ ނުލާ ބޭރުގައި އުޅެވޭއިރު ތިން މީހުންނަށް ވުރެ ގިނަ މީހުން އެއްވެ ނޫޅުމަށް އެޗްޕީއޭއިން ވަނީ އަންގާފައެވެ. އަދި ލޮކްޑައުންނަށް ލުއިތައް ދިން ކަމުގައި ވިޔަސް ފަރުވާ ކުޑަ ނުކުރުމަށް އިލްތިމާސް ކޮށްފައިވެއެވެ.
