ހޮސްޕިޓަލަށް ބޭނުންވާ ސާމާނު ހޯދުމުގައި އެއްވެސް މީހަކަށް ޒާތީ މަންފާއެއް ލިބޭ ގޮތަށް އަމަލު ކޮށްފައި ނުވާނެ ކަމަށް އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނެފިއެވެ.
ހޮސްޕިޓަލަށް ބޭނުންވާ ސާމާނު ހޯދުމާއި ބެހޭގޮތުން ސޯޝަލް މީޑިއާގައި ދެކެވޭ ވާހަކަތަކާއި ގުޅިގެން އައިޖީއެމްއެޗުން ބުނީ ހޮސްޕިޓަލުގެ މުވައްޒަފުން މެދުވެރިކޮށް ވަކި މީހަކަށް ފައިދާވާ ގޮތަށް ސާމާނު ހޯދާކަމުގައި ބުނެ، މުވައްޒަފުންގެ ފޮޓޯ ޖަހައި، ސޯޝަލް މީޑިއާގައި އެއްވެސް ހަގީގަތެއް ނެތް ވާހަކަތައް ބަޔަކު ފަތުރަމުންދާ ކަމަށެވެ.
އައިޖީއެމްއެޗުން ބުނީ އެއީ ހިތާމަކުރާ ކަމެއް ކަމަށާއި، އެފަދަ އަމަލުތަކަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށެވެ.
އައިޖީއެމްއެޗުން ބުނީ ހޮސްޕިޓަލަށް ބޭނުންވާ ތަކެއްޗާއި ސިއްހީ ސާމާނު ހޯދުމުގައި އަމަލުކުރަމުން އަންނަނީ ދައުލަތުގެ މާލިއްޔަތު ޤާނޫނާއި އެއްގޮތްވާގޮތުގެ މަތިން ކަމަށެވެ.
ދައުލަތުގެ މުއައްސަސާތަކުގައި ކޮރަޕްޝަނަށް މަގުފަހިވާ އެއްވެސް ކަމެއް ހިނގާ ކަމަށް ޝައްކު ކުރެވޭނަމަ އެކަމެއް ބަލައިދިނުން އެދި އެންޓި ކޮރަޕްޝަން ކޮމިޝަން (އޭސީސީ) ފަދަ ކަމާބެހޭ މިނިވަން މުއައްސަސާއަކަށް ޝަކުވާ ހުށަހެޅޭނެ އިންތިޒާމުތައް ހަމަޖެހިފައިވާ ކަމަށާއި، އައިޖީއެމްއެޗުގައި ވެސް ހިނގާ އެއްވެސް މަޝްރޫއެއް ނުވަތަ ހޮސްޕިޓަލަށް ގަންނަ އެއްޗެއް ގަތުމުގައި ކޮރަޕްޝަން އެކުލެވޭ ކަމަށް އެއްވެސް މީހަކަށް ތުހުމަތު ކުރެވޭނަމަ އެ މައްސަލައެއް އޭސީސީއަށް ހުށަހެޅުމަށް އައިޖީއެމްއެޗުން ވަނީ އެދިފައެވެ.
އެއްވެސް ހަގީގަތެއް ނެތް ވާހަކަތައް ދައްކައި، ހޮސްޕިޓަލުގެ މުވައްޒަފުން ބަދުނާމުކޮށް އަބުރު ގެއްލޭ ގޮތަށް ސޯޝަލް މީޑިއާގައި ފަތުރަމުންދާ ދިއުމާއި މިވާހަކަތަކުގެ މައްޗަށް ބިނާކޮށް، ހޮސްޕިޓަލުގެ ބަހެއް ހޯދުމެއް ނެތި ބައެއް މީޑިއާތަކުން މިފަދަ ޚަބަރުތައް ރިޕޯޓުކުރަމުންދާ ދިއުމަކީ ޒިންމާދާރު ނޫސްވެރިކަމުގެ މިންގަނޑުތަކާއި ޚިލާފު ކަމެއްކަން ފާހަގަކޮށް، އެކަން އެގޮތަށް ނުކުރުމަށް ހޮސްޕިޓަލުން ވަނީ އެދިފައެވެ.
