ކޮވިޑް-19އިން ގުޅިގެން ރައްކާތެރިވުމުގެ ގޮތުން ބޭނުންކުރާ ބައެއް އާލާތްތައް ދިވެހި ފިލްމީ ފަންނާނުންގެ ފަރާތުން މޯލްޑިވްސް ޕޮލިސް ސަރވިސްއަށް ހަދިޔާކޮށްފިއެވެ.

އާދިއްތަ ދުވަހު ފުލުހުން ބުނީ ދިވެހި ފިލްމީ ދާއިރާގެ ފަންނާނުން ފަރާތުން ފުލުހުންނަށް މާސްކާއި އަންގި، އަދި ސެނެޓައިޒާ ފުޅި ހަދިޔާކޮށްފައިވާ ކަމަށެވެ.

ހަދިޔާ ކުރި ތަކެތީގެ ތެރޭގައި ހިމެނެނީ 1،000 ސާޖިކަލް މާސްކާއި 1،000 އަންގީގެ އިތުރުން 1،000 ސެނިޓައިޒާ ފުޅިއެވެ. އަދި މިތަކެތި ހަދިޔާ ކޮށްފައިވަނީ ރާއްޖޭގެ ހުރިހާ ފިލްމީ ދާއިރާގެ ހުރިހާ ފަންނާނުންގެ ނަމުގައެވެ.

ތަކެތި ހަވާލުކުރުމުގެ ރަސްމިއްޔާތުގައި ބައިވެރިވެފައި ވަނީ، މަޝްހޫރު ބަތަލާ ނިއުމާ މުހައްމަދު އާއި ޖާދުﷲ އަދި މޯލްޑިވްސް ފިލްމު އެސޯސިއޭޝަން (އެމްއެފްއޭ) ގެ ރައީސް އަބްދުﷲ ޝިވާޒް (މާސްކޭ) އެވެ. މިތަކެއްޗާއި ހަވާލުވުމުގައި ރަސްމިއްޔާތުގައި ޕޮލިސް ކޮމިޝަނަރު މުހައްމަދު ހަމީދު ބައިވެރިވެ ވަޑައިގެންނެވިއެވެ.

ދިވެހި ފިލްމީ ދާއިރާގެ ފަންނާނުންގެ ފަރާތުން މިފަދަ ބައެއް އާލަތްތައް ހަދިޔާކޮށްފައިވާއިރު، ބައެއް ކުންފުނިތަކާއި، އަމިއްލަ ފަރުދުން ވެސް ފުލުހުންނަށް މިފަދަ ތަކެތި ހަދިޔާ ކުރަމުން ދެއެވެ.

ކޮވިޑް-19އިން ރައްކާތެރިވުމަށްޓަކައި ގިނަގިނައިން އަތްދޮވެ، ސެނައިޓައިޒް ކޮށް، ބޭރަށް ދާނަމަ މާސްކް އެޅުމަށް ސިއްހީ ކަމާ ބެހޭ ފަރާތްތަކުން އިލްތިމާސް ކުރެއެވެ.