ހަރުކަށި ފިކުރު މީހުން ބަލަހައްޓާނީ ތަމްރީން ކުރެވިފައިވާ ހާއްސަ އޮފިސަރުން: ކޮމިޝަނަރ އޮފް ޕްރިޒަންސް
15 ޖޫން 2020 | ހޯމަ 04:04ޖާގަ އިތުރުވަމުން ދާއިރު ހަރުކަށި ފިކުރުގެ މީހުންނަށް ހާއްސަ އިންތިޒާމްތަކެއް ހަމަޖެހިގެން ދާނެ
ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު
ހަރުކަށި ފިކުރުގެ މީހުން ޖަލަށް ލެވޭ އަދަދުު އިތުރުވަމުންދާކަމަށާއި އެ ފަރާތްތައް ބަލަހައްޓާނީ ތަމްރީން ކުރެވިފައިވާ ހާއްސަ އޮފިސަރުންކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަ ދައްކަވަމުން މުހައްމަދުފުޅު ވިދާޅުވީ، ޖަލަށް ގެނެވޭ މީހާ ގިންތި ކުރުމަކީ ޖަލުތަކާއި ޕެރޯލްގެ ގާނޫނުން ލާޒިމްކުރާ ކަމެއް ކަމަށާއި އެކަމާއި ގުޅިގެން އުސޫލުތަކެއް އެކުލަވާލައިފައިވާކަމަށެވެ. އޭނާ ވިދާޅުވީ، ޖަލަށް ގެނެވޭ ގައިދީއަކު އެސެސްމެންޓެއް ހަދައި ގިންތި ކުރާކަމަށާއި ނަމަވެސް ޖާގައިގެ ދަތިކަން ވަރަށް ބޮޑަށް ދިމާވާކަމަށެވެ.
ޖާގައިގެ ދަތިކަމުގެ ސަބަބުން، ގިންތި ކުރި ކަމުގައިވިޔަސް ކުދި ކުށްތައް ކޮށް ޖަލުގައި ތިބޭ މީހުންނާ އެއްކޮށް ބޮޑެތި ކުށްތައް ސާބިތުވެފައިވާ މީހުން ބައިތިއްބަންޖެހޭކަން މުހައްމަދުފުޅު ވަނީ ފާހަގަކުރައްވާފައެވެ. ނަމަވެސް، އެސެސްމަންޓުން ކޮންމެހެން ވަކިން ބަހައްޓަންޖެހޭ މީހެއްގެ ގޮތުގައި އެމީހަކު ފާހަގަ ވެއްޖެނަމަ އެ އިންތިޒާމްތައް ހަމަޖައްސަމުން ދާ ކަމަށެވެ.
ޕްރޮގްރާމްގައި އިތުރަށް ވާހަކަ ދައްކަވަމުން ކޮމިޝަނަރ އޮފް ޕްރިޒަންސް ވިދާޅުވީ، ހަރުކަށި ފިކުރުގެ މީހުން ޖަލަށް ލެވޭ އަދަދު އިތުރުވަމުން ދާކަމަށާއި އެކަމާއި ގުޅިގެން ހާއްސަ މަސައްކަތްތަކެއް ކުރައްވަމުން އަންނަކަމަށެވެ. އެގޮތުން، ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އިން އެފަދަ ފަރާތްތައް ދެނެގަނެ، އެސެސްމަންޓް ހަދައި ރިހިބިލިޓޭޓްކުރުމަށް ޖަލުތެރޭގައި އިންތިޒާމްތައް ހަމަޖެއްސުމަށް އެހީތެރިކަން ލިބެމުން އަންނަކަމަށެވެ.
އޭނާ ވިދާޅުވީ، ޖާގަ އިތުރުވަމުން ދާއިރު ހަރުކަށި ފިކުރުގެ މީހުންނަށް ހާއްސަ އިންތިޒާމްތަކެއް ހަމަޖެހިގެން ދާނެކަމަށެވެ. އެގޮތުން ޖަލުތެރޭގައި އެ ފިކުރު ފަތުރަން މަސައްކަތް ކުރާ ފަރާތްތައް ހުއްޓުވުމަށްޓަކައި ހާއްސަ އޮފިސަރުންތަކެއް ތަމްރީންކުރަމުން ދާކަމަށް މުހައްމަދުފުޅު ފާހަގަ ކުރެއްވިއެވެ.
