ރެއާލުން ކުޅޭ ފުރަތަމަ މެޗުގައި ބޭލް ފެނުމުގެ ފުރުސަތު ބޮޑު

ކޮރޯނާވައިރަސް (ކޮވިޑް-19) ށްފަހު ރެއާލް މެޑްރިޑުން ކުޅޭ ފުރަތަމަ މެޗުގައި ވޭލްސް ފޯވާޑް ގެރެތު ބޭލް ފެނުމުގެ ފުރުސަތު ބޮޑު ކަމަށް ރިޕޯޓުތައް ބުނެފިއެވެ.

ކޮވިޑް-19 ގެ ސަބަބުން ގިނަ ދުވަސްތަކަކަށް ސްޕެނިޝް ލީގު މެދުކެނޑިފައި އޮތުމަށްފަހު، ރެއާލުން ކުޅޭ ފުރަތަމަ މެޗުގައި އާދީއްތަ ދުވަހުގެރޭ ނުކުންނާނީ އެއިބާއާ ދެކޮޅަށެވެ. މި މެޗަށް ރެއާލްގެ ކޯޗު ޒިނެދިން ޒިދާން އެކުލަވާލި 23 ކުޅުންތެރިންގެ ސްކޮޑުގައި ބޭލް ވަނީ ހިމަނާފައެވެ.

ރެއާލުން އެންމެ ފަހުން ސްޕެނިޝް ލީގުގައި މެޗެއް ކުޅެފައިވަނީ މާޗު މަހުގެ އަށްވަނަ ދުވަހެވެ. ރެއާލް ބެޓިސް އާއި ދެކޮޅަށް ކުޅުނު މި މެޗުން ރެއާލް މެޑްރިޑް ބަލިވީ 2-1 ގެ ނަތީޖާއަކުންނެވެ. އެ މެޗަށްވެސް ޒިދާން އެކުލަވާލި 23 ކުޅުންތެރިންގެ ސްކޮޑުގައި ބޭލް ވަނީ ހިމަނާފައެވެ. އެކަމަކު އެ މެޗުގައި ބޭލްއަށް ކުޅުމުގެ ފުރުސަތު ދީފައެއް ނުވެއެވެ.

މީޑިއާ ރިޕޯޓުތައް ބުނާ ގޮތުން އެއިބާއާ ދެކޮޅަށް އާދީއްތަ ދުވަހުގެރޭ ރެއާލުން ނުކުންނައިރު، ރެއާލްގެ ފުރަތަމަ އެގާރައިގައި ބޭލް ހިމެނިގެން ކުޅޭނެއެވެ. މި މެޗުގައި ބޭލްގެ އިތުރުން މި ސީޒަނުގައި ރެއާލާ އަލަށް ގުޅުނު ޗެލްސީގެ ކުރީގެ ފޯވާޑް އެޑެން ހަޒާޑްވެސް ފެނިގެންދާނެ ކަމަށް ރިޕޯޓުތައް ބުނެއެވެ. މި ސީޒަނުގެ ބޮޑު ބައެއް ހަޒާޑަށް ގެއްލިގެންދިޔައީ ފައިގެ ކުޑަހުޅަށް ލިބިގެންދިޔަ އަނިޔާޔާއެކުގައެވެ.

އާދީއްތަ ދުވަހުގެރޭ ރެއާލުން އެއިބާއާ ދެކޮޅަށް ނުކުންނައިރު، ރެއާލް އޮތީ ތާވަލުގެ އެއްވަނައިގައި އޮތް ބާސެލޯނާ އަށްވުރެ ފަސް ޕޮއިންޓު މަދުންލިބި ތާވަލުގެ ދެވަނައިގައެވެ. 28 މެޗުން 61 ޕޮއިންޓާއެލު ބާސާ އެއްވަނައިގައި އޮތްއިރު، ދެވަނައިގައި ރެއާލް އޮތީ ބާސާއަށްވުރެ އެއް މެޗު މަދުން ކުޅެގެން 56 ޕޮއިންޓާއެކުއެވެ. އެހެންކަމުން އެއިބާ ބަލިކޮށްގެން، ބާސާގެ ފަރަގު އަނެއްކާވެސް ދެ ޕޮއިންޓަށް ކުޑަކުރުމުގެ ފުރުސަތު ރެއާލަށް އެބައޮތެވެ.

ރެއާލްގެ ދަނޑުގައި އާދީއްތަ ދުވަހުގެރޭ ކުޅޭ މެޗު ފަށާނީ ރާއްޖެ ގަޑިން 10:30 ގައެވެ.