މެއި މަހު ދައުލަތަށް އާމްދަނީގެ ގޮތުގައި ލިބުނީ 206 މިލިއަން ރުފިޔާ

ނިމިގެންދިޔަ މެއި މަހު އާމްދަނީގެ ގޮތުގައި ލިބުނީ 206.28 މިލިއަން ރުފިޔާ ކަމަށް މީރާއިން ހާމަކޮށްފިއެވެ.

މީރާއިން ހާމަކޮށްފައިވާ މެއި މަހުގެ ތަފާސް ހިސާބުތައް ދައްކާގޮތުން 206.28 މިލިއަން ރުފިޔަގެ ތެރެއިން 7.03 މިލިއަން ރުފިޔާއަކީ ޑޮލުގެ ގޮތުގައި ލިބިފައިވާ ފައިސާއެވެ. މިދިޔަ އަހަރުގެ މެއި މަހާ އަޅާ ބަލާއިރު މިއަހަރުގެ މެއި މަހު ލިބުނު އާމްދަނީ ވަނީ 81 އިންސައްތަ ދަށްވެފައެވެ.

މިރާއިން ބުނީ އާމްދަނީ ދަށްވެފައިވަނީ ކޮވިޑް-19 އާއި ގުޅިގެން ލޮކްޑައުން ކޮށްފައިވާތީއާއި ފަތުރުވެރިން އައުން ހުއްޓުމާއި ގުޅިގެން ކަމަށެވެ. މީގެ އިތުރުން ޓެކްސް ދައްކަން ޖެހޭ މުއްދަތު މިރާ ހުޅުވަންދެން އިތުރު ކުރުމުން ވެސް މެއި މަހުގެ ލިބުނު އާމްދަނީ ދަށްވެފައިވާ ކަމަށް މިރާއިން ބުނެއެވެ.

މެއި މަހުގެ ތަފާސް ހިސާބުތައް ދައްކާގޮތުން މެއި މަހުގެ ޖުމްލަ އާމްދަނީގެ 9.7 ޕަސެންޓަކީ އިންކަމް ޓެކުހުގެ ގޮތުގައި ލިބުނު އާމްދަނީއެވެ. އިންކަމް ޓެކްސްގެ ގޮތުގައި މެއި މަހު 19.9 މިލިއަން ރުފިޔާ ލިބިފައިވެއެވެ. މިއީ އާމްދަނީ އިން ޓެކްސް ނެގުމުގެ ގާނޫނުގެ ދަށުން ޓެކްސް ނަގަން ފެށިފަހުން ލިބުނު އާމްދަނީއެވެ.

މެއި މަހު ބިޒްނަސް ޕްރޮފިޓް ޓެކްސް (ބީޕީޓީ)ގެ ގޮތުގައި 1.4 މިލިއއަން ރުފިޔާ ލިބިފައިވެ އެވެ. ނަން ރެޒިޑެންޓް ވިލްހޯލްޑިން ޓެކުހުގެ ގޮތުގައި 16.4 މިލިއަން ރުފިޔާ ލިބުނު އިރު ފަރުދުންގެ އާމްދަނީ އިން ނަގާ ޓެކުހުން، އެމްޕްލޯއީ ވިތް ހޯލްޑިން ޓެކުހުގެ ގޮތުގައި 2 މިލިއަން ރުފިޔާ ވަނީ ލިބިފައެވެ.

މީގެ އިތުރުން ގްރީން ޓެކްސްގެ ގޮތުގައި މެއި މަހު ލިބިފައިވަނީ 7.9 މިލިއަން ރުފިޔާއެވެ. ޖީއެސްޓީގެ ގޮތުގައި 113 މިލިއަން ރުފިޔާއެވެ. މީގެ ތެރެއިން ޖީއެސްޓީގެ އާންމު ބައިން ލިބިފައިވަނީ 60 މިލިއަން ރުފިޔާއެވެ. އަދި ފަތުރުވެރިކަމުގެ ދާއިރާއިން ލިބިފައިވަނީ 52 މިލިއަން ރުފިޔާއެވެ.