ޖަވާބުދާރީވުމަށް އާމިރާއާއި ޒީނާއަށް ފަސް ދުވަސް
11 ޖޫން 2020 | ބުރާސްފަތި 04:09ސަބްކޮމެޓީއަށް ޒީނާ ޖަވާބުދާރީވުމުން، މައި ކޮމިޓީއަށް އެ މައްސަލަ ފޮނުވާނެ
މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރު ޒީނާ ޒާހިރު އަދި ސިވިލް ސާވިސް ކޮމިޝަން (ސީއެސްސީ) ގެ މެންބަރު ފާތުމަތު އާމިރާ
މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރު ޒީނާ ޒާހިރާއި ސިވިލް ސާވިސް ކޮމިޝަން (ސީއެސްސީ) ގެ މެންބަރު ފާތުމަތު އާމިރާއަށް ޖަވާބުދާރީވުމަށް ފަސް ދުވަހުގެ މުހުލަތެއް ދިނުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފިއެވެ.
ޒީނާގެ މައްސަލައަކީ ކޮމިޓީން ކުރިންވެސް ބަލަމުންދިޔަ މައްސަލައެކެވެ. ނަމަވެސް ޒީނާ ބަލިވެ އިނުމުން، ޒީނާ ހާޒިރު ކުރުމަށް ނިންމުނު ބައްދަލުވުން ބާއްވާފައެއް ނުވެއެވެ. ޒީނާގެ ފޭސްބުކް ޕޭޖުގައި ލިޔެފައިވާ ޕޯސްޓެއްގައި ބުނެފައިވަނީ 04 ޖުލައި 2019 ވަނަ ދުވަހު ކޮމިޓީއަށް ހާޒިރުވުމަށް އޭނާ އަށް އެންގި ކަމަށެވެ. އެހެންނަމަވެސް އޭރު ހުންނެވީ ވިހެއުމުގެ ޗުއްޓީގައި ކަމަށާއި ވިހެއުމުގެ ޗުއްޓީ ނިމުމުން، 15 އޯގަސްޓް 2019 ގެ ފަހުން ބައްދަލުވުން ހަމަޖައްސައިދިނުމަށް އެދި ރައްޔިތުންގެ މަޖިލީހަށް 01 ޖުލައި 2019 ވަނަ ދުވަހު ސިޓީއެއް ފޮނުވި ކަމަށެވެ.
ސަބްކޮމެޓީއަށް ޒީނާ ޖަވާބުދާރީވުމުން، މައި ކޮމިޓީއަށް އެ މައްސަލަ ފޮނުވާނެއެވެ. އެއަށްފަހު ކޮމިޓީއިން ގޮތެއް ނިންމައި، މަޖިލީހުގެ ތަޅުމަށް ފޮނުވާނެއެވެ.
ކުރިން އެކޮމިޝަނާ ގުޅޭގޮތުން ގިނަ ޝަކުވާތަކެއް ހުށަހެޅި، މަޖިލީހުގެ މިނިވަން މުއައްސަސާތަކާބެހޭ ކޮމެޓީން އެމައްސަލަތައް ބަލަމުންދަނިކޮށް، ތިން މެމްބަރަކު އިސްތިއުފާ ދެއްވިއެވެ. އެއް މެމްބަރަކު ކޮމެޓީގެ ރިޕޯޓާއެކު މަޖިލީހުގައި ވޯޓު ނަގައިގެން ވަނީ ކޮށްފައެވެ. އަދި އެކޮމިޝަނުގެ ކުރީގެ ނާއިބު ރައީސް އަބްދުﷲ ސޮފްވާނާއި ކޮމިޝަންގެ މެމްބަރު ހަސަން ނަބާހު އިސްތިއުފާ ދެއްވީ މިނިވަން މުއައްސަސާތަކާބެހޭ ކޮމެޓީން އެކޮމިޝަނުގެ މެމްބަރުންގެ މައްސަލަތައް ބަލަމުން ދަނިކޮށެވެ. ކޮމިޝަނުގެ ކުރީގެ ރައީސް މުހައްމަދު ޝަހީބު އިސްތިއުފާ ދެއްވީ، އޭނާ އެމަގާމުން ވަކިކުރަން ކޮމެޓީން ނިންމުމާއި ގުޅިގެން މަޖިލީހުގެ ތަޅުމުގައި އެކަމަށް ވޯޓަށް އެހުމުގެ ކުރިން ނެވެ. މަޖިލީހުގައި ވޯޓަށް އަހައިގެން ކޮމިޝަންގެ މެމްބަރުކަމުން ވަކިކޮށްފައި ވަނީ ސޮފްވާން އިސްތިއުފާ ދެއްވުމުން، އެކޮމިޝަނުގެ ނާއިބު ރައީސްގެ މަގާމަށް ވަޑައިގެންނެވި ފާތިމަތު ޒައިނާ އެވެ.
ސީއެސްސީގެ މެމްބަރުކަމުން އާމިރާ ވަކި ކުރުމުގެ މަސައްކަތް ފަށަން މިނިވަން މުއައްސަސާތަކާ ބެހޭ ކޮމެޓީން މަޖިލީހުގެ ތަޅުމަށް ފޮނުވައި، ތަޅުމުގައި އެކަން ވަނީ އިއުލާނުކޮށް،ކޮމެޓީއަށް ފޮނުވާފައެވެ. ބުދަ ބައްދަލުވުމުގައި ކޮމެޓީން ނިންމާފައިވަނީ އާމިރާއަށް ބަންދު ދުވަސްތައް ނުހިމެނޭ ގޮތަށް ފަސް ދުވަހުގެ މުހުލަތެއް، ޖަވާބުދާރީވުމަށް ދިނުމަށެވެ.
މީގެކުރިން މަޤާމުގެ ޒިންމާ އަދާ ނުކުރެވޭކަމަށް ޤަބޫލު ކުރެވޭތީ ސިވިލް ސަރވިސް ކޮމިޝަނުގެ 4 މެންބަރަކު ވަކި ކުރުމަށް، އެ ކޮމެޓީން މާރޗު މަހުގެ 1 ވަނަ ދުވަހު ފާސްކުރި އެވެ. ކޮމިޓީން މަޤާމުން ވަކިކުރުމަށް ނިންމާފައި ވަނީ ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމާއި، ކޮމިޝަންގެ ނައިބު ރައީސް ޝަހީދު މުހައްމަދާއި، މެންބަރު އިބްރާހިމް ޝަހީގުގެ އިތުރުން ޒަކަރިއްޔާ ޙުސައިނެވެ. އެހެންނަމަވެސް، ކޮމިޝަނުގެ 4 މެންބަރުން ވަކިކުރުމުގެ މައްސަލަ ކޮމިޓީން ނިންމިގޮތުގެ ރިޕޯޓު ވަނީ ކޮމިޓީއަށް އަނބުރާ ފޮނުވާލާފަ އެވެ. މިމަހުގެ 2 ވަނަ ދުވަހު ކޮމެޓީން ނިންމާފައިވަނީ އެ ކޮމިޝަނުގެ 5 މެންބަރުން އެކީ ވަކި ކުރުމަށެވެ.
