ޗެލްސީގެ ފަރިތަކުރުންތަކުގައި ކާންޓޭ ބައިވެރިވާން ފަށައިފި

ފްރާންސްގެ މިޑްފީލްޑަރު އެންގޯލޯ ކާންޓޭ ޗެލްސީގެ ފަރިތަކުރުންތަކުގައި ބައިވެރިވާން ފަށައިފިއެވެ.

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ އިނގިރޭސި ޕްރިމިއާ ލީގު އަލުން ފެށުމަށް ތައްޔާރުވަމުން އަންނައިރު، މެއި މަހުގެ ތެރޭގައި ކްލަބުތަކުން ވަނީ ކުދި ގްރޫޕްތައް ހިމެނޭ ގޮތަށް ފަރިތަކުރުންތައް ކުރިއަށް ގެންގޮސްފައެވެ. މެއި މަހުގެ ފަހުގެ 19 ވަނަ ދުވަހު ޗެލްސީން ކުރިއަށް ގެންދިޔަ ފަރިތަކުރުންތަކުގައި ކާންޓޭ ބައިވެރިވި ނަމަވެސް، އެ ދުވަހު ކާންޓޭއަށް ހުރިހާ ސެޝަނެއް ފުރިހަމައެއް ނުކުރެވުނެވެ.

އުމުރުން 29 އަހަރުގެ ކާންޓޭ މީގެ ދެ އަހަރު ކުރިން ވަނީ ޗެލްސީގެ ފަރިތަކުރުންތަކުގެ ތެރެއިން ހޭނެތިގެން ވެއްޓިފަ އެވެ. އެ ފަހަރު ހެދި ޓެސްޓުތަކުން ކާންޓޭގެ ހިތުގެ މައްސަލައެއް ހުރި ކަމަށް ދައްކާފައެއް ނުވެއެވެ.

ކާންޓޭއަށް އޭރު ފަރިތަކުރުންތަކުން ލުއި ދޭން ޗެލްސީން ނިންމީ މި ވަގުތު މާހައުލު އޮތްގޮތުން ސްކޮޑާ އެކުގައި ފަރިތަކުރަން ކާންޓޭ ޖެހިލުން ވާތީއެވެ. އެގޮތުން މީގެ ކުރިން ޗެލްސީން ވަނީ ކާންޓޭ ގޭގައި އެކަނި ތަމްރީނުތައް ކުރިއަށްގެންދާ ގޮތަށް ހަމަޖައްސާފައެވެ.

ދާދި ފަހުން ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރުމުގެ ހުއްދަ ކްލަބުތަކަށް ދީފައިވާއިރު، އަންގާރަ ދުވަހު ކާންޓޭ ވަނީ ޗެލްސީގެ ފަރިތަކުރުންތަކަށް ނުކުމެފައެވެ.

މި މަހުގެ 17 ވަނަ ދުވަހު ޕްރިމިއާ ލީގު އަލުން ފަށާއިރު، ޗެލްސީން ލީގުގައި ފުރަތަމަ މެޗެއް ކުޅޭނީ މި މަހުގެ 21 ވަނަ ދުވަހުގެރޭއެވެ. އެރޭ ޗެލްސީ ނުކުންނާނީ އެސްޓަން ވިލާއާ ދެކޮޅަށެވެ.

ލީގު އަލުން ފަށާއިރު، ޕްރިމިއާ ލީގުން އަންނަނީ ހުރިހާ ކްލަބެއްގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރަމުންނެވެ. އެގޮތުން މިހާތަނަށް ހަ ބުރެއްގެ މަތިން ޓެސްޓުތައް ކުރިއަށް ގެންދިޔައިރު، 13 މީހަކު މިހާތަނަށް ވަނީ ވައިރަހަށް ޕޮޒިޓިވް ވެފައެވެ.