އެމިރޭޓްސް އެއަރލައިނުން އަނެއްކާ ވެސް މުވައްޒަފުން މަދުކޮށްފި

ދުނިޔޭގެ އުދުހުންތަކުގެ ތެރޭގައި ހިމެނޭ އެންމެ ބޮޑު އެއަރލައިން އެމިރޭޓްސް އިން އަނެއްކާ ވެސް މުވައްޒަފުން މަދުކޮށްފިއެވެ.

ރޮއިޓާސް ގައި ރިޕޯޓްކޮށްފައިވާ ގޮތުން، މުވައްޒަފުން މަދުކުރުމަށް އެ އެއަރލައިނުން ކުރަމުންދާ މަސައްކަތުގެ ދަށުން، ބުދަ ދުވަހު ވެސް ވަނީ ޕައިލެޓުންނާއި ކެބިން ކުރޫން ވަކިކޮށްފައެވެ. މިކަމާއި ގުޅިގެން އެމިރޭޓްސްގެ ސްޕޯކްސް ޕަރސަން ވަނީ އެ އެއަރލައިނުން ނެރިފައިވާ ބަޔާނަށް ކޮމެންޓް ކުރަން ދެކޮޅު ހަދާފައެވެ.

އެމިރޭޓްސް އިން އަންގާރަ ދުވަހު ނެރުނު ބަޔާނެއްގައި ބުނެފައިވަނީ އިތުރު މުވައްޒަފުންތަކެއް ވަޒީފާއިން ވަކިކޮށްފައިވާ ކަމަށެވެ. އަންގާރަ ދުވަހު އެކަނި ވެސް އެ އެއަރލައިނުން ވަނީ 100ށް ވުރެ ގިނަ ޕައިލެޓުންނާއި ކެބިން ކުރޫން ވަޒީފާއިން ވަކިކޮށްފައެވެ. މުވައްޒަފުންތަކެއް ވަޒީފާއިން ވަކިކޮށްފައިވަނީ ކޮވިޑް-19 އާއި ގުޅިގެން އެކުންފުންޏަށް ވަމުން އަންނަ ގެއްލުމުން އަރައިގަތުމަށެވެ.

މީގެ އިތުރުން މި ހަފްތާ ތެރޭގައި ވެސް އިތުރު މުވައްޒަފުންތަކެއް ވަޒީފާއިން ވަކިކުރުމަށް ނިންމާފައިވާ ކަމަށް ރޮއިޓާސް އިން ވަނީ ރިޕޯޓްކޮށްފައެވެ. މީގެ ތެރޭގައި އެއަރބަސް އޭ380 އަދި ބޮއިން 777 ގެ ޕައިލެޓުން ހިމެނޭ ކަމަށް ރޮއިޓާސް އިން ވަނީ ރިޕޯޓްކޮށްފައެވެ.

ކޮވިޑް-19 އާއި ގުޅިގެން އެންމެ ބޮޑަށް އަސަރުކުރި އިންޑްސްޓްރީތަކުގެ ތެރޭގައި އޭވިއޭޝަން އިންޑަސްޓްރީ ހިމެނެއެވެ. ބައެއް އެއަރލައިންތަކުން ވަނީ މުވައްޒަފުން މަދުކޮށް ސަރުކާރުގެ މާލީ އެހީތެރިކަމަށް ވެސް އެދިފައެވެ.