ކޮރޯނާވައިރަހާ ގުޅިގެން އެންމެ ބޮޑު އަސަރެއް ކުރާނީ ކުޅިވަރުގެ ދާއިރާއަށް: މަހުލޫފް
މި އަހަރަށް ކުރިއަށް ގެންދަން ނިންމާފައިވާ ކުޅިވަރުގެ ބޮޑެތި މަޝްރޫއުތައް ލަސްވެގެންދާނެ
ކުޅިވަރާއި ބެހޭ ވަޒީރު އަޙްމަދު މަހުލޫފް: ކުޅިވަރަށް ކުރާ ހޭދަ ކުޑަވާނެ ކަމަށް ވަނީ ވިދާޅުވެފައި
ކޮރޯނާވައިރަސް (ކޮވިޑް-19) އާ ގުޅިގެން މުޅި ދުނިޔެ އާއި ރާއްޖެއަށް ވެސް ބޮޑު އަސަރެއް ކޮށްފައިވާއިރު، ވަކިވަކި ކަންކަމުގެ ތެރެއިން އެންމެ ބޮޑު އަސަރެއް ކުރާނީ ކުޅިވަރުގެ ދާއިރާއަށް ކަމަށް ކުޅިވަރާ ބެހޭ ވަޒީރު އަޙްމަދު މަހުލޫފް ވިދާޅުވެއްޖެއެވެ.
ކޮވިޑް-19 އާ ގުޅިގެން މާލޭގައި ވަނީ މާޗު މަހުން ފެށިގެން ކުޅިވަރު ކުޅޭ ތަންތަން ބަންދު ކުރެވިފައެވެ.
ވަޒީރު ވިދާޅުވީ މި ހާލަތާއެކު މި އަހަރު ކުރިއަށް ގެންދަން ނިންމާފައިވާ ކުޅިވަރުގެ ބޮޑެތި މަޝްރޫއުތައް ލަސްވެގެންދާނެ ކަމަށާއި، މި ހާލަތާއެކު ކުޅިވަރަށް ބޮޑު ހޭދައެއް ކުރަން އާންމުން ވެސް ބޭނުން ނުވާނެ ކަމަށެވެ.
މި ސަރުކާރުން ކުޅިވަރު އެސޯސިއޭޝަންތަކަށް ބޮޑު ހޭދައެއް މިދިޔަ އަހަރު ކޮށްފައިވާއިރު، އެސޯސިއޭޝަންތަކުގެ ބަޖެޓުވެސް ވަނީ ވަރަށް ބޮޑުތަން އިތުރު ކޮށްދީފައެވެ. މިއަހަރު އެސޯސިއޭޝަންތަކަށް ދޭނެ ފައިސާގެ އަދަދުތައް އެއްބަސްވެވިފައި ވާއިރު، އެ އަދަދުތައް ދެން ނުދެވޭނެ ކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ މި އަހަރު އެސޯސިއޭޝަންތަކަށް ދެވޭނީ ހިންގުމަށް ދެވޭ ފައިސާއެއް ކަމަށާއި، މި ގޮތަށް މި އަހަރު މަސައްކަތްކޮށް ނިންމާލެވުމުން، އަންނަ އަހަރު އެކަށީގެންވާ ބަޖެޓަކާއެކު ބާރަށް ކުރިޔަށް ދެވޭނެ ކަމަށެވެ.
ކުޅިވަރު އެސޯސިއޭޝަންތަކަށް ދޭ ބަޖެޓު އިތުރުކުރުމުގެ އިތުރުން، ކޮންމެ ކުޅިވަރަކަށް އެންމެ މަތީ ފެންވަރުގެ ކޯޗުން ގެނައުމަށް ނިންމި ކަމަށާއި، އެހެން ނަމަވެސް ދެން ކުރެވޭނެ ކަމަކީ އެތުލީޓުން އައޖު ހިތްވަރެއް ލައިގެން އެސޯސިއޭޝަންތަކުގެ ކޯޗުންނާއެކު މަސައްކަތް ކުރުން ކަމަށް ވަޒީރު ވިދާޅުވިއެވެ.
