ސީޒަން ނިމެންދެން ލިވަޕޫލްގައި މަޑުކުރަން ލަލާނާ އެއްބަސްވެއްޖެ

މި ސީޒަން ނިމެންދެން ލިވަޕޫލްގައި މަޑުކުރަން ނިންމާ، އިންގްލެންޑުގެ މިޑްފީލްޑަރު އެޑަމް ލަލާނާ އެއްބަސްވުން އާކޮށްފި އެވެ.

މިމަހުގެ ތެރޭގައި ލިވަޕޫލް އާއެކު ލަލާނާ ކުރިން ހަދާފައި އޮތް އެއްބަސްވުމުގެ މުއްދަތު ހަމަވަން އޮތް ނަމަވެސް، އަންގާރަ ދުވަހުގެ ވަގުތެއްގައި ލަލާނާ ވަނީ ލިވަޕޫލްގެ އެއްބަސްވުން ކުރު މުއްދަތަކަށް އާކޮށްފައެވެ.

ކޮރޯނާވައިރަސް (ކޮވިޑް-19) އާ ގުޅިގެން މާޗު މަހު އިނގިރޭސި ޕްރިމިއާ ލީގު މެދުކަނޑާލިއިރު، އެކަމާ ގުޅިގެން ސީޒަން ދިގުލައިގެން ދާނެތީ ކްލަބުތަކުން އަންނަނީ ކުޅުންތެރިންގެ އެއްބަސްވުންތައް އާކުރުމަށް މަސައްކަތް ކުރަމުންނެވެ.

އުމުރުން 32 އަހަރުގެ ލަލާނާ ލިވަޕޫލްގެ އެއްބަސްވުން ކުރު މުއްދަތަކަށް އާކުރިއިރު، ޖުލައި މަހުގެ ނިޔަލަށް އޭނާ ކްލަބުގައި މަޑުކުރާނެ އެވެ.

ލިވަޕޫލްގެ ކޯޗު ޔާގެން ކްލޮޕް ބުނީ އެހެން ކްލަބުތަކުން ލަލާނާއަށް ފާރަލަމުން އައި ދުވަސްވަރެއްގައި، ސީޒަން ނިމެންދެން ކްލަބުގައި މަޑުކުރަން އޭނާ ނިންމި ނިންމުމާ މެދު އުފާކުރާ ކަމަށެވެ. އަދި މި ސީޒަނަކީ ލިވަޕޫލަށް ހާއްސަ ސީޒަނެއް ކަމަށާއި، ލިވަޕޫލާއެކު ލަލާނާ ސީޒަން އެއްކޮށް ނިންމާލަށް އޭނާ ވެސް ބޭނުންވާ ކަމަށް ބުންޏެވެ.

30 އަހަރަށްފަހު ޕްރިމިއާ ލީގުގެ ޗެމްޕިއަންކަން ހޯދުމާ ގާތަށް ލިވަޕޫލް ގޮސްފައިވާއިރު، ލީގު ހޯދަން ލިވަޕޫލަށް ދެން ބޭނުންވަނީ އެންމެ ހަ ޕޮއިންޓެވެ.

ލިވަޕޫލްގެ އެއްބަސްވުން ކުރު މުއްދަތަކަށް ލަލާނާ އާކުރިއިރު، ރިޕޯޓުތައް ބުނާ ގޮތުން ލެސްޓާ ސިޓީން އަންނަނީ ކުރިއަށް އޮތް ޓްރާންސްފާ ބާޒާރުގައި އޭނާ ހޯދުމަށް މަސައްކަތް ކުރަމުންނެވެ.

2014 ވަނަ އަހަރު ލިވަޕޫލަށް ބަދަލުވި ލަލާނާ ވަނީ އެ ކްލަބަށް މިހާތަނަށް ކުޅެދިން 178 މެޗުގައި 22 ލަނޑު ކާމިޔާބުކޮށްފައެވެ. އަދި އޭނާ ވަނީ ލިވަޕޫލާއެކު ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕްގެ އިތުރުން ފީފާ ކްލަބު ވޯލްޑް ކަޕް ކާމިޔާބުކޮށްފައެވެ.