މާލެ އަންނަން ފުރުސަތު ލިބި، ޓިކެޓް ނުނަގާތީ، ފުރުސަތު ނުލިބޭ ފަރާތްތަކުގެ ހިތްހަމަނުޖެހުން
9 ޖޫން 2020 | އަންގާރަ 10:10ފްލައިޓުން ޖާގަ ލިބުމުން، ޓިކެޓް ނުނަގާ ތިބޭތީވެ، މާލެ އަންނަން ބޭނުންވާ ފަރާތްތަކަށް ފުރުސަތު ގެއްލޭ
ލަންކާގައި ތިބި ދިވެހިންތަކެއް އެނބިރި ޤައުމަށް އައުމަށް ފްލައިޓްގައި
ސްރީލަންކާގައި ތިބި ދިވެހިންގެ ތެރެއިން އަންގާރަ ދުވަހު މާލެ އަންނަން ފުރުސަތު ލިބުނު މީހުންގެ ތެރެއިން ބައެއް ފަރާތްތަކުން އަދިވެސް ޓިކެޓް ނަގާފައި ނުވާތީ، ފުރުސަތު ނުލިބޭ ފަރާތްތަކުން ކަންބޮޑުވުން ފާޅުކޮށްފިއެވެ.
ރާއްޖެ.އެމްވީއާ ވާހަކަ ދެއްކި ސްރީލަންކާގައި ހުރި ދިވެއްސަކު ބުނީ އޭނާ ލަންކާގައި ދިރިއުޅެމުންދަނީ ކުޑަ ކުއްޖަކު ގޮވައިގެން އެކަނި ކަމަށާއި، މާލޭގައި ހުރި ފިރިމީހާއަށް މިހާރު ވަޒީފާއަށް ނުދެވޭތީ ފައިސާ ލިބޭނެ މަގެއް ނެތްކަމަށެވެ. އެހެންކަމުން އަންގާރަ ދުވަހު އަންނަ ފްލައިޓްގައި ރާއްޖެ އާދެވޭތޯ މަސައްކަތްކުރިކަމަށާއި، ފްލައިޓުން ޖާގަ ނުލިބުނުކަމަށެވެ.
މީގެ އިތުރުން، ލަންކާގައި ކިޔެވުން ނިމި، އަނބުރާ ރާއްޖެ ނާދެވި ހުރި މީހަކު ބުނީ ފްލައިޓެއް ނުބާއްވައިގެން އެންމެ އަޑުގަދަކުރި ބައެއް މީހުންނަށް ފްލައިޓުން ޖާގަ ލިބުމުން ވެސް ޓިކެޓް ނުނަގާ ތިބުމަކީ އެފަދަ ފްލައިޓްތަކުން ޖާގަ ހޯދުމަށް ބޭނުންވެގެން ތިބި އެހެން މީހުންނަށް ދެވޭ ވަރަށް ބޮޑު ދެރައެއް ކަމަށެވެ.
އެނގިފައިވާ ގޮތުގައި އަންގާރަ ދުވަހު ހެނދުނު އަންނަ ސްރީލަންކަން އެއަރލައިންސްގެ ފްލައިޓުން 290 ދިވެހިން ގެނައުމަށް ފޮރިން މިނިސްޓްރީން ދަނީ މަސައްކަތްކުރަމުންނެވެ. އެހެންނަމަވެސް ފަތިހު ޗެކިން ފަށާ މި ފްލައިޓަށް ހޯމަ ދުވަހުގެ މެންދުރު ވީއިރު ވެސް ޓިކެޓް ނަގާފައިވަނީ 240 މީހުންނެވެ.
މިކަމާ ގުޅިގެން ފޮރިން މިނިސްޓްރީން ބުނީ ރާއްޖެއަށް އަންނަން ކޮންމެހެން ބޭނުންވާ ފަރާތްތަކަށް މި ފްލައިޓްގެ އިތުރުން ކުރިއަށް އޮތްތަނުގައި ބާއްވާ ފްލައިޓްތަކުން ޖާގަ ހޯދުމަށް ފުރުސަތު ލިބޭނެކަމަށެވެ. އަދި މި ފްލައިޓުން ޓިކެޓް ލިބޭނެކަމަށް އެންގި ބައެއް މީހުން ޓިކެޓް އަދިވެސް ނަގާފައި ނުވާކަން އެމިނިސްޓްރީއިން ޔަގީންކޮށްދިނެވެ.
