އަޅާފައިވާ ފިޔަވަޅުތަކަށް ލުއި ނުދީ، ބަލިމަޑުކަމެއް އަދި ނިމުމެއް ނެތް: ޑަބްލިއުއެޗްއޯ
9 ޖޫން 2020 | އަންގާރަ 04:58ދުވާލެއްގެ މައްޗަށް ކޭސްތައް ރެކޯޑް ކުރެވޭ މިންވަރު ވަނީ އިތުރުވެފައި
ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އެދްނޯމް؛ ބައެއް ގައުމުތަކަށް ޕީކް އަދި ނާންނަކަމަށް ޓެޑްރޯސް ވަނީ ހާމަކުރައްވާފައި
ދުވާލެއްގެ މައްޗަށް ރެކޯޑް ކުރެވޭ އަދަދު މަތިވެ ބަލިމަޑުކަން ނިމުމަކަށް އައުން ގާތް ނުވާ ކަމަށް ޑަބްލިއުއެޗްއޯއިން ހާމަކޮށްފިއެވެ.
ޑަބްލުއެޗްއޯއިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޖަމިއްޔާގެ ޑިރެކްޓަރ ޖެނެރަލް ޓެޑްރޯސް އެދްނޯމް ވިދާޅުވީ ކޮވިޑް-19 ގެ ކޭސްތައް ދުވާލެއްގައ މައްޗަށް ރިޕޯޓްކުރާ މިންވަރު ރެކޯޑް މިންވަރަކަށް އިތުރުވަމުން އަންނަ ކަމަށެވެ. އަދި ސެންޓްރަލް އެމެރިކާގެ ގައުމުތަކުގައި ޕީކް އަންނަން އަދި ކައިރި ވެސް ނުވާ ކަމަށާއި، ވައިރަސް ކޮންޓްރޯލް ކުރުމަށް އޭނާ ވަނީ ގައުމުތަކަށް ގޮވާލައްވާފައެވެ.
ޓެޑްރޯސް މިކަމަށް ގޮވާލެއްވި އިރު، ކޮވިޑް-19 ހަލުވިކަމާއެކު ފެތުރެމުން އަންނަ ބައެއް ގައުމުތަކުން ވަނީ އަޅާފައިވާ ފިޔަވަޅުތަކަށް ލުއި ދިނުމަށް ނިންމާފައެވެ. މީގެ ތެރޭގައި ވައިރަސްގެ އެންމެ ނުރައްކާ ބޮޑު އެމެރިކާ އަދި ބްރަޒިލް ހިމެނެއެވެ.
އާދީއްތަ ދުވަހު އެކަނި ވެސް 136،000 މީހުން ކޮވިޑް-19ށް ޕޮޒިޓިވްވެގެން ރެކޯޑްކޮށްފައިވެއެވެ. އަދި މީގެ ތެރެއިން 75 އިންސައްތަ ރިޕޯޓްކޮށްފައިވަނީ 10 ގައުމަކުންނެވެ. މީގެ ތެރޭގައި އެމެރިކާ ބައްރުގެ ގައުމުތަކާއި ދެކުނު އޭޝިއާގެ ގައުމުތައް ހިމެނެއެވެ. ހޯމަ ދުވަހު އެކަނިވެސް 119،000 މީހުން ކޮވިޑް-19ށް ޕޮޒިޓިވްވެފައިވެއެވެ.
ފާއިތުވި 24 ގަޑި އިރު އެންމެ ގިނަ ޕޮޒިޓިވް ކޭސް ރިޕޯޓްކޮށްފައިވަނީ އެމެރިކާއިންނެވެ. އެގައުމުން 19 ހާހަށްވުރެ ގިނަ ޕޮޒިޓިވް ކޭސްތައް ރިޕޯޓްކޮށްފައިވާ އިރު ބްރަޒިލްއިން ވަނީ 18 ހާހަށްވުރެ ގިނަ ކޭސް ރިޕޯޓްކޮށްފައެވެ.
