ހައުސިންގ މިނިސްޓަރު އާތިފާ ޝަކޫރު މަގާމަށް ގާބިލް ނޫން ކަމަށާއި، މިނިސްޓަރު ކަމުގެ މަގާމުން ވަކިކޮށް ދިނުމަށް އެދި ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ސިޓީއެއް ފޮނުވައިފިއެވެ.

މިނިސްޓަރު އާތިފާ މަގާމުން ވަކިކޮށް ދިނުމަށް އެދި ރައީސް ނަޝީދަށް ސިޓީ ހުށަހެޅުއްވީ، މައްޗަންގޮޅި މެދު ދާއިރާގެ، އެމްޑީޕީގެ ރައީސްކަން ކުރައްވާ އިބްރާހިމް ރަމީޒެވެ.

މިސިޓީގައި ރަމީޒް ވިދާޅުވެފައި ވަނީ 2018 ވަނަ އަހަރު ދިވެހި ރާއްޖޭގައި ބޭއްވުނު ރީޔާސީ އިންތިހާބުގައި އެމްޑީޕީއަށް ތާއީދުކޮށް، ރައީސް އިބްރާހިމް މުހައްމަދު ސޯލިހަށް ރައްޔިތުން ވޯޓު ދިން އެންމެ ބޮޑު އެއް ސަބަބަކީ އެމްޑީޕީގެ ބޯހިޔާވަހިކަމުގެ ވައުދު ކަމަށެވެ.

ރަމީޒް ގެ ސިޓީގައި ވިދާޅުވީ މިނިސްޓަރު އާތިފާ މަގާމުގައި ހުންނަވާ ވައުދު ފުއްދުމާ ގާތަށް ވެސް މަސައްކަތް ކުރެވިފައިނުވާ ކަމަށާއި، މާލޭ ރައްޔިތުންނަށް ގޯތި ދޭނެ ކަމަށް ވީ ވައުދު ވެސް ފުއްދުމާ ގާތަކަށް ވެސް ފާއިތުވި ދެ އަހަރު ދުވަހުގެ ތެރޭގައި މަސައްކަތް ކުރެވިފައިނުވާ ކަމަށެވެ. އަދި ގޯތި ދޭނެގޮތުގެ ޕްލޭނެއް ވެސް އެކުލެވިފައި ނުވާއިރު، ސުވާލު އުފެދޭ ގިނަ ކަންތައްތަކެއް ހުރިކަމަށް ސިޓީގައި ފާހަގަކޮށްފައިވެއެވެ.

ހުޅުމާލޭގައި އަޅާފައިވާ ފްލެޓްތަކަށް އިޝާރާތްކުރައްވައި ރަމީޒް ވިދާޅުވެފައިވަނީ ޕްލެޓުތައް އޭގެ ހައްގުވެރިންނާ ހަވާލު ކުރުމަށް އެކަށީގެންވާ މަސައްކަތެއް ކުރެވިފައިނުވާ ކަމަށާއި، މާލޭގެ ރައްޔިތުން އަދި ޚާއްސަކޮށް މައްޗަންގޮޅި މެދު ދާއިރާގައި ކުރީގެ ސަރުކާރުތަކުން ފްލެޓު ލިބޭނެ ކަމަށް ބުނެ ދޫކޮށްފައި ހުރި އެކިއެކި ލިޔުންތަކާއި މިނިސްޓްރީއަށް ބޯހިޔާވަހިކަމަށް އެދި ހުށަހަޅާފައިވާ ފޯމުތަކަށް އެކަށީގެންވާ ޖަވާބެއް ގިނަ ދުވަސްތަކެއް ފާއިތުވެގެން ދިޔައިރު ވެސް ދީފައިނުވާ ކަމަށެވެ. އަދި ބޯހިޔާވަހިކަމުގެ ހިތްހަމަޖެހުން ހޯދައިދިނުމަށް މިނިސްޓަރު އާތިފާ ނުކުޅެދިފައިވާ ކަމަށް ރަމީޒް ވިދާޅުވިއެވެ.

ރަމީޒް ގެ އެ ސިޓީ ގައި ވިދާޅުވެފައި ވަނީ މިނިސްޓަރު އާތިފާއަކީ މަސްއޫލިއްޔަތު އަދާކުރުމަށް ގާބިލުކަން ހުރި ބޭފުޅެއް ނޫންކަން ފާއިތުވެދިޔަތަނުގައި ހިނގާ ދިޔަ ކަންކަމުން ވެސް ޔަގީންވާތީ މިނިސްޓަރުކަމުގެ މަގާމުން އާތިފާ ވަކިކޮށް، ގާބިލް މިނިސްޓަރަކު ހައުސިން މިނިސްޓްރީއަށް އައްޔަން ކުރެވުމަށް އެދޭ ކަމަށެވެ.

ހައުސިންގ މިނިސްޓަރު އާތިފާ ޝަކޫރު މަގާމަށް ގާބިލް ނޫން ކަމަށް ބުނެ މަގާމުން ދުރުކޮށް ދިނުމަށް އެދިފައި މިވަނީހިޔާ މަޝްރޫއުގެ ފްލެޓުތައް ޖުލައި މަހު ހަވާލުކުރެވޭނެ ކަމަށް ހައުސިންގ މިނިސްޓަރު އައިމިނަތު އާތިފާއަށް ވިދާޅުވެވުނީ އޮޅުމަކުން ކަމަށް ހައުސިންގ މިނިސްޓްރީން ބުނުމާ ގުޅިގެންނެވެ. މިމައްސަލައާ ގުޅިގެން މިނިސްޓްރީއަށް ގިނަ ބައެއްގެ ފާޑު ކިޔުންތައް އަމާޒުވެފައިވެއެވެ.

ރައިސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެފައިވަނީ ފްލެޓްތައް ސެޕްޓެމްބަރަށް ނިންމާ މިއަހަރު ނިމުމުގެ ކުރިން ފްލެޓްތައް ހަވާލުކޮށް ނިންމުމަކީ ސަރުކާރުގެ އަމާޒެއް ކަމަށެވެ. ކުރީގެ ސަރުކާރުގައި އެ 7،000 ފްލެޓް ދޭން ނިންމާފައި އޮތީ އިންސާފުވެރިކޮށްތޯ ބެލުމުގެ މަސައްކަތް ކުރުމަށް ކޮމެޓީއެއްވެސް ވަނީ އެކުލަވާލާފަ އެވެ.