ކޮރޯނާވައިރަސް (ކޮވިޑް-19) ޖެހުން ފަހުން އޭނާ އެއްކޮށް ފިޓް ނޫން ކަމަށް ޔުވެންޓަސްގެ ފޯވާޑް ޕައުލޯ ޑިބާލާ ބުނެފިއެވެ.

އުމުރުން 26 އަހަރުގެ ޑިބާލާ އާއި އޭނާގެ ލޯބިވެރިޔާ އޮރިއާނާ ސަބަޓީނީ، ކޮވިޑް-19ށް ޕޮޒިޓިވްވީ މާޗު މަހުގެ 21 ވަނަ ދުވަހުއެވެ. މެއި މަހުގެ ކުރީކޮޅު ޑިބާލާ ވައިރަހުން ރަނގަޅުވެފައި ވާއިރު، އޭނާ މިހާރު އަންނަނީ ޔުވެންޓަސްގެ ފަރިތަކުރުންތަކުގައި ބައިވެރިވަމުންނެވެ.

ޑިބާލާ ވަނީ ވައިރަސް ޖެހުނު ފަހުން އޭނާއަށް ދިމާވެފައިވާ ކަންތައްތައް މީގެ ކުރިން މީޑިއާގައި ހިއްސާ ކޮށްފައެވެ. އެގޮތުން ޑިބާލާ ބުނީ އޭނާގެ ހަށިގަނޑުން ވަރަށް ވަރުގަދަ އަލާމަތްތަކެއް ފެނުނު ކަމަށާއި، ނޭވާލާން ވެސް ވަރަށް ބޮޑަށް އުނދަގޫވި ކަމަށެވެ. އަދި އުނދަގޫވާ ފަހަރެއްގައި ވަރަށް ބޮޑަށް ހަށިގަނޑު ވަރުބަލިވާ ކަމަށާއި، މިއީ ކިތަންމެ ފިޓްކޮށް ހުރި މީހަކަށް ވިޔަސް އުނދަގޫވާ ފަހަރެއްގައި ކެތްކޮށްލަން އުނދަގޫ ރޯގާއެއް ކަމަށް ވަނީ ބުނެފައެވެ.

ދާދި ފަހުން ޑިބާލާ ބުނީ ވައިރަހުން މިހާރު އެއްކޮށް ރަނގަޅުވެފައި ވާއިރު، އޭނާ ކުރިއަށް ވުރެ ވަރަށް ބޮޑުތަން ރަނގަޅު ކަމަށެވެ. އެކަމަކު އަދިވެސް މުޅިން އެއްކޮށް އޭނާ ފިޓް ނުވާ ކަމަށް ޑިބާލާ ވަނީ ބުނެފައެވެ.

ޑިބާލާ އަކީ ކޮވިޑް-19 ޖެހުނު ޔުވެންޓަސްގެ ތިންވަނަ ކުޅުންތެރިޔާއެވެ. އޭނާގެ ކުރިން އެ ކްލަބުގެ އިޓަލީ ޑިފެންޑަރު ޑެނިއަލީ ރުގާނީ އާއި ފްރާންސްގެ މިޑްފީލްޑަރު ބްލައިސް މަޓުއިޑީ ވަނީ ވައިރަހަށް ޕޮޒިޓިވް ވެފައެވެ.

ކޮވިޑް-19 އާ ގުޅިގެން މާޗު މަހު އިޓާލިއަން ލީގުގެ ކުޅުން މެދުކަނޑާލިއިރު، އިޓަލީގެ ސަރުކާރުގެ ހުއްދައާއެކު އިޓާލިއަން ލީގު މި މަހުގެ 20 ވަނަ ދުވަހު ފަށަން މިހާރު ވަނީ ނިންމާފައެވެ. އަދި އޭގެ ކުރިން މި މަހުގެ 13 ވަނަ ދުވަހު އިޓާލިއަން ކަޕްގެ ސެމީ ފައިނަލް މެޗުތައް ކުޅުމަށް ވެސް ވަނީ ތާވަލު ކޮށްފައެވެ.

އިޓާލިއަން ލީގުގައި ބާކީ އޮތް ބައިގައި، އަށް ޓީމަކުން 13 މެޗު ކުޅެން ޖެހޭއިރު، ބާކީ ޓީމުތަކަށް އޮތީ 12 މެޗެވެ. އިޓާލިއަން ލީގު މެދުކަނޑާލިއިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތާވަލުގެ އެއްވަނައިގައި 26 މެޗުން 63 ޕޮއިންޓާއެކުގައެވެ. ދެވަނައިގައި އޮތް ލާޒިއޯ އަށް 26 މެޗުން ލިބިފައިވަނީ 62 ޕޮއިންޓެވެ.