ލޮކްޑައުންގެ އަމުރާއި ޚިލާފުވެގެން ޖޫރިމަނާކުރި މީހުންގެ އަދަދު 8000ށް އަރައިފި
މިހާތަނަށް ޖުމްލަ 464 މީހަކު ވަނީ ހައްޔަރު ކޮށްފައި
މާލޭގައި މަގުތައް ޕެޓްރޯލް ކުރުމުގެ ތެރެއިން ފުލުހުން ސައިކަލެއް މަޑުކުރުވާ ޗެކްކުރަނީ
ކޮވިޑް-19އާ ގުޅިގެން މާލެ ޞަރަޙައްދުގައި އިޢުލާންކޮށްފައިވާ ލޮކްޑައުންގެ އަމުރާ ޚިލާފުވެގެން ޖޫރިމަނާ ކުރި މީހުންގެ ޢަދަދު 8000ށް އަރައިފި އެވެ.
ފުލުހުން ބުނީ 'ލޮކްޑައުން'ގެ އަމުރާއި ޚިލާފުވެގެން މިހާތަނަށް ޖުމުލަ 464 މީހަކު ހައްޔަރު ކޮށްފައިވާ ކަމަށާއި، 8186 މީހަކު ޖޫރިމަނާކޮށްފައިވާ ކަމަށެވެ.
އާދިއްތަ ދުވަހު 'ލޮކްޑައުން' އާ ޚިލާފުވެގެން 249 މީހަކު ޖޫރިމަނާ ކޮށްފައިވާއިރު އޭގެ ތެރޭގައި ހިމެނެނީ މާލެއިން ޖޫރިމަނާ ކުރި 245 މީހުންނާއި، ހުޅުމާލެއިން 2 މީހަކު އަދި ވިލިމާލެއިން ޖޫރިމަނާ ކުރި 2 މީހެކެވެ.
އާދިއްތަ ދުވަހު 'ލޮކްޑައުން'ގެ ޢަމުރާއި ޚިލާފު ވެގެން 16 މީހަކު ވަނީ ހައްޔަރު ކޮށްފަ އެވެ. އޭގެ ތެރޭގައި ހިމެނެނީ މާލެއިން ހައްޔަރު ކުރި 13 މީހުންނާއި، ހުޅުމާލެއިން 3 މީހުންނެވެ.
'ލޮކްޑައުން' ގެ ޢަމުރާ ޚިލާފުވެގެން ޖޫރިމަނާ ކުރާ މީހުން، ޖޫރިމަނާ ކުރަނީ 1000 ރުފިޔާއިންނެވެ.
