ޓްރާންސިޓް ކަރަންޓީން ފެސިލިޓީން ޖާގަ ނުލިބުނު މީހުނަށް، ރަށުގައި ކަރަންޓީން ވެވޭނެ އިންތިޒާމް ހަމަޖެހޭނެ: އެލްޖީއޭ
3،061 ފަރާތެއް ޓްރާންސިޓް ކަރަންޓީން ފެސިލިޓީއަށް ގެންދެވިފައިވޭ
އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް ނޫސްވެރިންގެ ބައްދަލުވުމުގައި ވާހަކަ ދައްކަވަނީ
ފުރަބަންދު ހާލަތާއި ގުޅިގެން ރަށަށް ދާން ބޭނުންވާ 2300ށް ވުރެ ގިނަ ފަރާތްތައް ޓްރާންސިޓް ކަރަންޓީން ފެސިލިޓީސްތަކުގައި ޖާގަ ނެތުމުން ނުގެންދެވިފައި އެބަތިބި ކަމަށާއި އެފަރާތްތަކަށް ރަށުގައި ކަރަންޓީން ވެވޭނެ ތަނެއް ހުރިނަމަ ކައުންސިލާއި ގުޅިގެން އެ ކަންތައްތައް ކުރިޔަށް ގެންދެވޭނެކަމަށް ލޯކްލް ގަވަރމެންޓް އޮތޯރިޓީ (އެލްޖީއޭ) ބުނެފިއެވެ.
އާދިއްތަ ދުވަހުގެ ރޭ ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް ވިދާޅުވީ، ކުރުމުއްދަތައް މާލެ އައިސް ފުރަބަންދު ހާލަތާއި ގުޅިގެން އެނބުރި ރަށަށް ނުދެވި ތިބި މީހުންގެ ތެރެއިން 3،061 ފަރާތެއް ޓްރާންސިޓް ކަރަންޓީން ފެސިލިޓީއަށް ގެންދެވިފައިވާކަމަށެވެ. އޭނާ ވިދާޅުވީ އޭގެތެރިން 682 ފާރާތެއް ކަރަންޓީންގެ މުއްދަތު ހަމަ ކުރުމަށް ފަހު ރަށަށް ގެންދެވިފައިވާކަމަށެވެ.
އިތުރަށް ވާހަކަ ދައްކަވަމުން ޝަރީފް ވިދާޅުވީ، ހާލަތާއި ގުޅިގެން ރަށަށް ދިއުމަށް އެދިފައިވާ 2369 މީހަކު ޓްރާންސިޓް ކަރަންޓީން ފެސިލިޓީސްތައް ފުރުމާއި ގުޅިގެން ނުފޮނުވި އެބަހުރި ކަމަށެވެ. އޭނާ ވިދާޅުވީ، ގިނަ ފަރާތްތަކެއް ރަށަށް ދާން ބޭނުންވެ، އިތުރު ރިސޯޓް ފެސިލިޓީސްތައް ހަމަޖެހުމުގެ ދަތިކަމެއް ހުރުމާއި ގުޅިގެން ރަށްރަށުގެ އަމިއްލަ ގެތަކުގައި ކަރަންޓީން ވުމުގެ ފުރުސަތު ސަރުކާރުން ފަހިކޮށްދީފައިވާކަމަށެވެ.
އެގޮތުން، އެ އުސޫލުގެ ދަށުން އައްޑޫސިޓީއަށް 42 މީހަކު ހޮނިހިރު ދުވަހު ގެންދެވިފައިވާކަމަށާއި ހޯމަ ދުވަހު (މާދަމާ) އައްޑޫގެ 50 މީހަކާއި ފުވައްމުލަކަށް ނިސްބަތްވާ 50 މީހަކު ހޯމް ކަރަންޓީނަށް ގެންދިޔުމުގެ އިންތިޒާމް ހަމަޖެހިފައިވާނެކަމަށެވެ. އަދި މިހާރު ޓްރާންސިޓް ކަރަންޓީން ފެސިލިޓީތަކުން ޖާގަ ނެތުމުގެ ސަބަބުން ނުދެވި ތިބި 2369 މީހުނަށް ކަރަންޓީންވާނެ ގެ ހަމަޖެއްސުމަށް ފަހު އެ ރަށެއްގެ ކައުންސިލައް ދެންނެވުމަށް އަންގާފައިވާނެކަމަށް ޝަރީފް ވިދާޅުވިއެވެ.
މާލެ ސިޓީގެ ލޮކްޑައުންއަށް ފަހު، އެނބުރި ރަށްރަށަށް ދާ މީހުން ރަށަށް ދިއުމަށްފަހު ގޭގައި ކަރަންޓީން ކުރެވޭގޮތަށް ހަމަޖެހިފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭއިން) ވަނީ ހާމަކޮށްފައެވެ. މި އުސޫލުގައި ބުނެފައިވަނީ މާލޭގައި ލޮކްޑައުންވެފައިވާ ފަރާތްތައް އެނބުރި ރަށަށް ދިއުމަށްފަހު، ގޭގައި ކަރަންޓީނު ކުރުމަށް ހަމަޖެހިފައިވަނީ 24 ދުވަހަށް ކަމަށެވެ. އެގޮތުން މާލެއިން ގެންދާ ފަރާތްތަކަކީ ކޮވިޑް-19 ގެ އެއްވެސް އަލާމާތެއް ނެތް މީހެއްތޯ ކަށަވަރު ކުރުމަށްފަހު، އެ ފަރާތްތައް ރަށަށް އެނބުރި ދިއުމުގެ ދަތުރުފަތުރުގެ އިންތިޒާމް ހަމަޖައްސާނީ ސަރުކާރުން ކަމަށް އެޗްޕީއޭއިން ބުނެއެވެ.
