އީޕީއޭގެ ޑީޖީ ނައީމްގެ ދިފާއުގައި ރައީސް ނަޝީދު!
މާލެ ސަރަހައްދަށް އިތުރު ހިކިފަސް ބޭނުމީ މާލޭގައި ދިރިއުޅުއްވާ އެހެން ގޮތެއްނެތް ގިނަ ރައްޔިތުންނަށް ބޯހިޔާވަހިކަން ހޯއްދަވައި ދިނުމަށް: ނަޝީދު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު (ވ) އަދި އީޕީޢޭގެ ޑީޖީ ނައީމް (ކ) އާއި ބައްދަލުކުރައްވަނީ؛ ނަޝީދު ވަނީ ނައީމަނީ ތަޖްރިބާކާރު ބޭފުޅެއް ކަމަށް ވިދާޅުވެފައި
އެންވަޔަރމަންޓް ޕްރޮޓެކްޝަން އެޖެންސީގެ ޑިރެކްޓަރ ޖެނެރަލް މުހައްމަދު ނައީމަކީ ތަޖްރިބާކާރު ބޭފުޅެއް ކަމަށް ވިދާޅުވެ ކުރީގެ ރައިސް، އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ނައީމް ދިފާއު ކުރައްވައިފިއެވެ.
ނައީމަކީ ތަޖްރިބާކާރު ބޭފުޅެއް ކަމަށް ވިދާޅުވެ ނަޝީދު ޓްވީޓެއް ކުރައްވާފައިވަނީ، ގުޅިފަޅުގައި ތަރައްގީކުރާ ވިޔަފާރި ބަނދަރަށް ބޭނުންވާ ބިން ހިއްކަމުންދާތީ އެކަމުގެ ނޭދެވޭ އަސަރުތައް އެ ސަރަހައްދުގެ ފަރުތަކާއި، ވިލިމާލޭގެ ފަރަށް ކުރަމުންދާ ދަނޑިވަޅެއްގައި އެކަމާއި ގުޅިގެން ގިނަ ބައެއްގެ ފާޑުކިއުން ނައީމަށް އަމާޒުވެފައިވާ ދަނޑިވަޅެއްގައެވެ.
ނައީމާއި ބައްދަލުކުރައްވާ ނަޝީދު ކުރެއްވި ޓްވީޓުގައި ވިދާޅުވީ ތަރައްގީގެ ގިނަ މަސައްކަތްތަކުން ތިމާވެއްޓަށް އަސަރުކުރައްވާ ކަމަށެވެ. އަދި މާލެ ސަރަހައްދަށް އިތުރު ހިކިފަސް ބޭނުމީ މާލޭގައި ދިރިއުޅުއްވާ އެހެން ގޮތެއްނެތް ގިނަ ރައްޔިތުންނަށް ބޯހިޔާވަހިކަން ހޯއްދަވައި ދިނުމަށާއި، މި ސަރަހައްދު ތޮއްޖެއްސުން ހުއްޓުވުމަށް ކަމަށް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ އީޕީއޭގެ ޑީޖީ އަކީ ތަޖްރިބާކާރު ބޭފުޅެއް ކަމަށެވެ.
ގުޅިފަޅުން ބައެއް ހިއްކަމުންދާތި ވިލިމާލެ ފަރަށް ގެއްލުންވަމުންދާ މައްސަލައިގައި ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީއަށް ކަމާބެހޭ ފަރާތްތައް ހޮނިހިރު ދުވަހު ހާޒިރު ކުރެވުނު އިރު ނައީމް ވެސް ހާޒިރުކުރެވުނެވެ.
މި ބައްދަލުވުމުގައި ނައީމް ވިދާޅުވީ މާލެ ޞަރަޙައްދު 'ލޮކްޑައުން' ކޮށްފައި އޮތުމުގެ ސަބަބުން، މީގެ ކުރިން މަޝްރޫޢުތައް ކުރިއަށް ގެންދިޔަ އިރު ކޮމިއުނިޓީ ކޮންސަލްޓޭޝަން ކުރިއަށް ގެންދިޔަ މިންވަރަށް، ގުޅިފަޅުގައި ތަރައްޤީކުރާ ވިޔަފާރި ބަނދަރުގެ މަޝްރޫއުގެ ދަށުން ކުރިއަށްގެންދާ ބިން ހިއްކުމުގެ މަޝްރޫޢުގެ ކޮމިއުނިޓީ ކޮންސަލްޓޭޝަން ކުރިއަށް ނުގެންދެވޭކަމަށް ޤަބޫލުކުރައްވާ ކަމަށެވެ.
ނައީމް ވިދާޅުވީ މި މަޝްރޫޢުގެ މުހިންމުކަން ފެންނާތީ ކޮމިއުނިޓީ ކޮންސަލްޓޭޝަން ކުރެވުނުގޮތަކަށް އޮންލައިންކޮށް ފޯމު ފުރައިގެން އަދި ޝަކުވާ ހުށަހަޅައިގެން ފުރުޞަތު ހުޅުވާލައިގެން ކުރިއަށް ގެންދެވި ކަމަށެވެ.
