ގައްދޫ ބޯޓެއް ދިޔަވެ ފަރަށް އެރުމުން މަސްވެރިން އެހީތެރިވެދީފި

ގދ. ގައްދޫ ސައުތް އެކްސްޕްރެސް ބޯޓު ފަރަށް އަރާ ދިޔަވަމުންދަނިކޮށް އެ ސަރަހައްދުގެ މަސްވެރިން އެހީތެރިވެދީފިއެވެ.

ދިމަސްވެރިންގެ ނަމުގައި ހިންގާ ޓުވީޓަރ އެކައުންޓުންކޮށްފައިވާ ޓްވީޓްގައި ވަނީ ހޮނިހިރު ދުވަހުގެރޭ 4:00 ހާއިރު ބޯޓުގެ އިންޖީނު ހުއްޓި ގދ. ދާންދޫ ކައިރީގައި އޮންނަ "ވޮޑަ މުލާ" ބޭރު ކަނޑާއި ދިމާލު ފަރާ ކައިރިވާތީ މަސްދޯނިފަހަރުތައް ބޯޓަށް އެހީވުމަށް ދަތުރުކުރިކަމަށެވެ.

ހުވަދު އަތޮޅަށް ވަރަށް ގަދައަށް ވައިބާރުވެ ވިއްސާރަކުރަމުންދާކަން ފާހަގަކޮށް އެ ޓުވީޓަރ އެކައުންޓުގައި ބުނެފައިވަނީ "ޑޭޒީ ވިއު" ދޯނިން ކަފު ޖަހައިގެން ބޯޓު ގެމަނަފުއްޓަށް ގެންދިއުމަށް މަސައްކަތްކުރި ކަމަށެވެ. އަދި މި ބޯޓަށް އެހީތެރިވުމަށް ދޯނިތައް އެހިސާބަށް ދިޔައިރު ބޯޓުގެ ފަހަތް އޮތީ ފަރަށް އަރާފައި ކަމަށާއި ބޯޓުގެ ބަނޑުފިލައިން ފަސް ފޫޓުހާ ތަނެއް ހަލާކުވެ ދިޔަވާތީ އެކަން ހައްލުކުރުމަށް ދޯނި ފަހަރުން ދިޔަ ޑައިވަރުން މަސައްކަތްކުރި ކަމަށެވެ.

ބޯޓުގައި ހުރި 3 ޕަންޕުގެ ތެރެއިން ދެ ޕަންޕު ބޭނުންކޮށްގެން ދިޔަވުން ކޮންޓްރޯލް ކުރުމުގެ މަސައްކަތްކޮށްފައިވާ ކަމަށް މަސްވެރިންގެ ޓުވިޓަރއިން ވަނީ ބުނެފައެވެ.

މިކަމާއި ގުޅިގެން އެމްއެންޑީއެފުން ބުނީ ބޯޓު ފުންކުރުމުގެ މަސައްކަތް ބޯޓުގެ ވެރިފަރާތުން ކުރަމުންގެންދާ ކަމަށާއި ބޯޓުގެ ވެރިފަރާތުން އެހީތެރިކަން ބޭނުން ނުވާ ކަމަށް ބުނެފައިވާ ކަމަށެވެ.