އެޗްއެސްބީސީ ބޭންކުގައި "ޑޯމަންޓް އެކައުންޓް" (ބޭނުން ނުކުރާ އެކައުންޓް) ހުރި 19 ކަސްޓަމަރެއްގެ ނަން އިއުލާން ކޮށްފި އެވެ.

އެޗްއެސްބީސީ (މާލެ ބްރާންޗް) ގައި ހުޅުވާފައިވާ، އެއްވެސް މުއާމަލާތެއް ނުކުރާތާ 5 އަހަރަށް ވުރެ ގިނަ ދުވަސްވެފައިވާ އެކައުންޓްތަކާބެހޭ ގޮތުން އެ ބޭންކުން ބުނެފައިވަނީ، ދިވެހިރާއްޖޭގެ ބޭންކިންގއާ ބެހޭ ޤާނޫނުގެ 35 ވަނަ މާއްދާގައި ބަޔާންކޮށްފައިވާ ގޮތުގެމަތިން، އެކައުންޓަކުން އެއްވެސް މުޢާމަލާތެއް ނުކުރާތާ، ނުވަތަ ބޭންކަށް ލިޔުމަކުން އެއްވެސް އެއްޗެއް އަންގައިފައި ނުވާތާ، 5 އަހަރު ދުވަސް ވެފައިވާ އެކައުންޓަކީ "ޑޯމަންޓް އެކައުންޓް" އެއްގެ ގޮތުގައި ބެލެވޭނެ އެކައުންޓެއް ކަމަށެވެ.

ދިވެހިރާއްޖޭގެ ބޭންކިންގއާ ބެހޭ ޤާނޫނުގައި ބަޔާންކޮށްފައިވާ ގޮތުގެ މަތިން "ޑޯމަންޓް އެކައުންޓް" އެއް، އެޗްއެސްބީސީ މާލޭ ބްރާންޗުގައި އޮތް ކަސްޓަމަރެއް ކަމުގައި ވާނަމަ، އެ ފަރާތަކުން، ބޭންކަށް ދީފައިވާ އެޑްރެހަށް ގުޅުން އެދޭ ކަމަށެވެ.

އެޗްއެސްބީސީން ބުނީ، "ޑޯމަންޓް އެކައުންޓް" ގެ ތަފުސީލު، އެ ކަސްޓަމަރަކު އެންމެ ފަހުން ބޭންކަށް ދީފައިވާ އެޑްރެހަށް ވަކިން ފޮނުވައިފައިވާނެ ކަމަށެވެެ.

އެޗްއެސްބީސީ މާލޭ ބްރާންޗުން ބުނީ، މި އިއުލާން ކުރި ދުވަސް ކަމަށްވާ، ޖޫން 5 ވަނަ ދުވަހުން ފެށިގެން 60 ދުވަހުގެ ތެރޭގައި، އެކައުންޓުގައި ހުރި ފައިސާއާ ހަވާލުނުވާނަމަ، އެ ފައިސާއެއް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް، ދިވެހިރާއްޖޭގެ ބޭންކިންގއާ ބެހޭ ޤާނޫނުގައިވާ ގޮތުގެ މަތިން ފޮނުވާނެ ކަމަށް އިއުލާންގައި ބުނެފައިވެއެވެ.