ޓޮޓެންހަމުން 175 މިލިއަން ޕައުންޑުގެ ލޯނެއް ނަގައިފި
މީގެ ކުރިން ޓޮޓެންހަމުން ވަނީ 550 މުވައްޒަފުންގެ މުސާރައިން 20 އިންސައްތަ އުނިކުރަން ނިންމާފައި
ޓޮޓެންހަމްގެ ވައިޓް ހާޓް ލޭން: މި ދަނޑު ހަދަން އެއް ބިލިއަން ޑޮލަރުގެ ލޯނެއް ވަނީ ނަގާފައި
އިނގިރޭސި ޕްރިމިއާ ލީގުގައި ވާދަކުރަމުން އަންނަ ޓޮޓެންހަމް ހޮޓްސްޕާ އިން 175 މިލިއަން ޕައުންޑުގެ ލޯނެއް ނަގައިފި އެވެ.
ކޮރޯނާވައިރަސް (ކޮވިޑް-19) ގެ ސަބަބުން ޓޮޓެންހަމަށް މާލީ ގޮތުން ވަނީ ބޮޑެތި ގެއްލުންތަކަކާ ކުރިމަތިލާން ޖެހިފައެވެ. އެގޮތުން މީގެ ކުރިން ވަނީ މާލީ ގޮންޖެހުންތަކުން އަރައިގަތުމަށްޓަކައި އެ ކްލަބުގެ 550 މުވައްޒަފުންގެ މުސާރައިން 20 އިންސައްތަ އުނިކުރަން ނިންމާފައެވެ. އަދި މުސާރަ ކުޑަކުރަން އެއްބަސްނުވާ މުވައްޒަފުން ނޯޕޭ ލީވްއަށް ފޮނުވާލުމަށް ވަނީ ނިންމާފައެވެ. އެކަމަކު ޓޮޓެންހަމްގެ ނިންމުމަށް ސަޕޯޓަރުން ފާޑު ކިޔުމާ ގުޅިގެން އެ ކްލަބުން ވަނީ އެ ނިންމުން ބަދަލުކޮށްފައެވެ.
އަދި ޓޮޓެންހަމުން އަލަށް ތަރައްގީ ކުރި ފުޓްބޯޅަ ދަނޑުގެ މަސައްކަތަށް ނަގާފައިވާ އެއް ބިލިއަން ޕައުންޑުގެ ލޯނު އަދި ނުނިމެއެވެ. މި ލޯނުގައި އަދި ބާކީ ނުދައްކާ 637 މިލިއަން ޕައުންޑު އެބަހުރި ކަމަށް ރިޕޯޓުތައް ބުނެއެވެ.
ދާދި ފަހުން ޓޮޓެންހަމްގެ ޗެއާމަން ޑެނިއެލް ލެވީ ވިދާޅުވީ އިނގިރޭސިވިލާތުގެ ބޭންކުން 175 މިލިއަން ބޮޑު ލޯނެއް ނަގަން ޖެހުނީ ކްލަބުގެ މަސައްކަތްތައް ހުއްޓިފައި އޮތުމުގެ ސަބަބުން ކަމަށެވެ. އެގޮތުން މިއަހަރަށް ކުޅެން ހަމަޖެހިފައިވާ ބައެއް މެޗުތަކާއި ލައިވް އެހެނިހެން އިވެންޓުތައް ކުރިއަށް ނުގެންދެވުމުގެ ސަބަބުން ޖޫން މަހާ ހަމައަށް އެ ޓީމަށް 200 މިލިއަން ޕައުންޑުގެ ގެއްލުމެއް ވެފައިވާ ކަމަށް ވެސް ވިދާޅުވި އެވެ.
ކޮވިޑް-19 އާ ގުޅިގެން ދުނިޔޭގެ ބޮޑެތި ކްލަބުތަކަށް ވެސް މާލީ ދަތިތަކާ ކުރިމަތިލާން ޖެހިފައިވާއިރު، ޔޫރަޕްގެ ބޮޑެތި ލީގުތައް މި މަހުގެ ތެރޭގައި އަލުން ފަށަން މިހާރު އަންނަނީ މަސައްކަތް ކުރަމުންނެވެ. އެގޮތުން ޕްރިމިއާ ލީގުގެ ކުޅުން މިމަހުގެ 17 ވަނަ ދުވަހު އަލުން ފަށަން މިހާރު ވަނީ ތާވަލުކޮށްފައެވެ.
