ވިޔަފާރި ބަނދަރު ބަދަލުކުރުމަށް އެންމެ އެކަށީގެންވާ ސަރަހައްދަކީ ގުޅިފަޅު: މިނިސްޓަރު އަސްލަމް
މާލޭގެ ވިޔަފާރި ބަނދަރު މިހާރު ތޮށް ޖެހި ޖާގައިގެ ދަތިކަން ވަރަށް ބޮޑަށް ކުރިމަތިވަމުންދޭ
މަޝްރޫއުތަކާ ބެހޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައި ޕްލޭނިން މިނިސްޓަރު މުހައްމަދު އަސްލަމް ބައިވެރިވެޑައިގަންނަވަނީ
ވިޔަފާރި ބަނދަރު ބަދަލުކުރުމަށް އެންމެ އެކަށީގެންވާ ސަރަހައްދަކީ ގުޅިފަޅު ކަމަށާއި، އެ ރަށުގެ ފަޅުން ބޮޑު ސަރަހައްދެއް ހިއްކަން ޖެހޭ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ވިޔަފާރި ބަނދަރު ގުޅިފަޅަށް ބަދަލު ކުރުމުގެ ޕްރޮޖެކްޓްގެ ދަށުން ގުޅިފަޅުގެ ބޮޑު ސަރަހައްދެއް ހިއްކަން ޖެހެއެވެ. އެގޮތުން ވިލިމާލޭގެ ފަރާއި، ގުޅިފަޅުގެ ފަރުތައް ވަރަށް ބޮޑަށް ހަލާކުވެ، ޑައިވިން ސްޕޮޓްތައް ނެތިގެންދާނެ ކަމަށް ތިމާވެށި ހިމާޔަތްކުރުމުގެ ވަކާލާތު ކުރާ ފަރާތްތަކުން ދަނީ ބުނަމުންނެވެ. މިފަދަ ޕްރޮޖެކްޓްތަކުން ތިމާވެށި ހަލާކު ނުކުރުމަށް ވަނީ ގޮވާލާފައެވެ.
މިމައްސަލާއާ ގުޅިގެން ހޮނިހިރު ދުވަހު ބޭއްވި މަޖިލީހުގެ އެންވަޔަރްމެންޓް އެންޑް ކްލައިމެޓް ޗޭންޖް ކޮމެޓީން އޮންލައިންކޮށް ބައްދަލުވުމުގައި ޕްލޭނިން މިނިސްޓަރު އަސްލަމް ވިދާޅުވީ މާލޭގެ ވިޔަފާރި ބަނދަރު މިހާރު ތޮށް ޖެހި ޖާގައިގެ ދަތިކަން ވަރަށް ބޮޑަށް ކުރިމަތިވަމުންދާ ކަމަށާއި، ޖާގަ ބޮޑު ކުރެވެން ވެސް ނެތް ކަމަށެވެ.
އެގޮތުން ވިޔަފާރި ބަނދަރު އެހެން ސަރަހައްދަކަށް ބަދަލުކުރަންޖެހޭ ކަމަށާއި، އެންމެ އެކަށީގެންވާ ސަރަހައްދަކަށް ފެނުނީ ގުޅިފަޅު ކަމަށް އަސްލަމް ވިދާޅުވިއެވެ.
މީގެ އިތުރުން އަސްލަމް ވިދާޅުވީ ތިލަފުއްޓަށް ވިޔަފާރި ބަނދަރު ބަދަލު ކުރުމަށް މަޝްވަރާތައް ކުރެވި އެސަރަހައްދުން ބަލަން ޖެހޭ ކަންކަން ބެލި ކަމަށެވެ. ނަމަވެސް ތިލަފުއްޓަކީ ކުނިނައްތާލުމުގެ މަސައްކަތް ކުރާ ލޭންޑަކަށް ވުމާއެކު މިފަދަ ކަމެއް ކުރުމަކީ އެންމެ އެކަށީގެންވާ ސަރަހައްދެއް ނޫން ކަމަށް އަސްލަމް ވިދާޅުވިއެވެ.
މި ޕްރޮޖެކްޓްގެ ސަބަބުން ވެސް ތިމާވެއްޓަށް އެކި މައްސަލަތައް ކުރިމަތިވާނެކަން ފާހަގަކުރައްވައި އަސްލަމް ވިދާޅުވީ މި ޕްރޮޖެކްޓަކީ ވަރަށް މުހިންމު ޕްރޮޖެކްޓެއް ކަމަށެވެ.
މިނިސްޓަރު އަސްލަމް ވިދާޅުވީ މިޕްރޮޖެކްޓްގެ ތެރެއިން މާލޭ ނޯޓު ހާބަރުގައި މިހާރު ދެމުން އަންނަ ޚިދުމަތްތައް ގުޅިފަޅަށް ބަދަލު ކުރެވޭނެ ކަމަށެވެ. އޭގެ ތެރޭގައި ގުދަންތަކާއި ހޯލްސޭލް ފިހަރާތަކަށް ބޭނުންވާ ބިން ހިމެނޭ ކަން މިނިސްޓަރު ފާހަގަކުރެއްވިއެވެ.
މީގެ އިތުރުން މިނިސްޓަރު އަސްލަމް ވިދާޅުވީ މިމަސައްކަތްތައް ކުރުމަށް ހަދަން ޖެހޭ މާސްޓާ ޕްލޭން ހެދުމުގެ މަސައްކަތް ބަޔަކާ ހަވާލު ކޮށްގެން ކުރިއަށް ގެންދާ ކަމަށެވެ. އަދި ގުޅިފަޅު ހިއްކުމުގެ ޕްރޮޖެކްޓަށް އެންމެ އަގު ބޮޑު ރޭޓުން ބަލާނަމަ އަރަނީ 120 މިލިއަން ޑޮލަރު އަރާނެ ކަމަށާއި، ނަމަވެސް ނަމަވެސް ތަންކޮޅެއް ކައިރިން ވެލިނެގޭ ނަމަ 100 މިލިއަން ޑޮލަރަށް އަގުހެޔޮ ވާނެ ކަމަށް މިނިސްޓަރު އަސްލަމް ވިދާޅުވިއެވެ.
ގުޅިފަޅުން ހަ މިލިއަން ކިއުބިކް މީޓަރުގެ ބިން ހިއްކުމުގެ މަސައްކަތް، ނެދަލެންޑްސްގެ ބޮސްކާލިސް އިން އަންނަނީ ކުރަމުންނެވެ. ވިޔަފާރި ބަނދަރު ގުޅީފަޅަށް ބަދަލު ކުރުމަށް ނިންމީ ކެބިނެޓުން ރައީސުލްޖުމްހޫރިއްޔާއާއި މަޝްވަރާ ކުރެވިގެން ކަމަށް ޕްލޭނިން މިނިސްޓްރީން މައުލޫމާތުދެއެވެ.
