ބިލިއަން ޑޮލަރުގެ އާމްދަނީ ހޯދި ފުރަތަމަ ފުޓްބޯޅަ ކުޅުންތެރިއަކަށް ރޮނާލްޑޯ

ބިލިއަން ޑޮލަރުގެ އާމްދަނީ ހޯދި ފުރަތަމަ ފުޓްބޯޅަ ކުޅުންތެރިއަކަށް ޕޯޗުގަލްގެ ތަރި ކްރިސްޓިއާނީ ރޮނާލްޑޯ ވެއްޖެ އެވެ.

ފޯބްސް މަޖައްލާއިން ހާމަކުރި ގޮތުގައި ރޮނާލްޑޯ ވަނީ އޭނާގެ ކެރިއަރުގައި މިހާތަނަށް ބިލިއަން ޑޮލަރުގެ އާމްދަނީ އެއް ހޯދާފައެވެ. އެއާއެކު އޭނާ އަކީ ފުޓްބޯޅައިގެ ތާރީޚުގައި ބިލިއަން ޑޮލަރުގެ އާމްދަނީ އެއް ހޯދި ފުރަތަމަ ފުޓްބޯޅަ ކުޅުންތެރިޔާ އެވެ.

މީގެ ކުރިން ކުޅިވަރު ތަރިންގެ ތެރެއިން ބިލިއަން ޑޮލަރުގެ އާމްދަނީ އެއް ހޯދާފައިވަނީ މަޝްހޫރު ގޮލްފް ކުޅުންތެރިޔާ ޓައިގާ ވުޑްސް އާއި މަޝްހޫރު ބޮކްސިންގ ތެޅުންތެރިޔާ ފްލޮއިޑް މޭވެދާ އެވެ.

ބިލިއަން ޑޮލަރުގެ އާމްދަނީ އެއް ރޮނާލްޑޯ ހޯދިއިރު، އޭނާއާ އެންމެ ވާދަވެރި އާޖެންޓީނާގެ ލިއޮނެލް މެސީ އަށް މިހާތަނަށް ލިބިފައިވަނީ 650 މިލިއަން ޑޮލަރުގެ އާމްދަނީ އެކެވެ.

މީގެ ކުރިން ފޯބްސް މަޖައްލާއިން ވަނީ މިދިޔަ 12 މަހުގެ ތެރޭގައި ކުޅިވަރު ކުޅުންތެރިންނަށް ލިބުނު އާމްދަނީ ވެސް ހާމަކޮށްފައެވެ. އެގޮތުން މިދިޔަ 12 މަހުގެ ލިސްޓުގައި ރޮނާލްޑޯ އޮތީ ދެވަނައިގައެވެ. މިދިޔަ 12 މަހުގެ ތެރޭގައި ރޮނާލްޑޯ 105 މިލިއަން ޑޮލަރުގެ އާމްދަނީ އެއް ހޯދިއިރު، ތިންވަނައިގައި އޮތް މެސީ އަށް ލިބިފައިވަނީ 104 މިލިއަން ޑޮލަރުގެ އާމްދަނީ އެކެވެ.

މި ލިސްޓުގެ އެއްވަނަ މިފަހަރު ލިބުނީ މަޝްހޫރު ޓެނިސް ކުޅުންތެރިޔާ ރޮޖާ ފެޑެރާ އަށެވެ. އޭނާ އެއްވަނައިގައި އޮތީ 106.3 މިލިއަން ޑޮލަރުގެ އާމްދަނީ އެއް ހޯދައިގެންނެވެ.

އެމެރިކާގެ މަޝްހޫރު ވިޔަފާރި މަޖައްލާ އިން މި ހިސާބުތައް ޖަހާފައިވަނީ މުސާރަ އާއި އިނާމު ފައިސާ އަދި އިޝްތިހާރުތަކުން ކުޅުންތެރިންނަށް ލިބޭނެ އާމްދަނީ އެއްކޮށްގެންނެވެ.

މުޅި ކެރިއަރުގައި ރޮނާލްޑޯ ބިލިއަން ޑޮލަރުގެ އާމްދަނީ އެއް ހޯދިއިރު، އޭނާ އަކީ އިންސްޓާގްރާމްގައި ވެސް އެންމެ ގިނަ މީހުން ފޮލޯ ކުރާ ކުޅިވަރު ކުޅުންތެރިޔާ އެވެ. 2018 ވަނަ އަހަރު އިޓަލީގެ ޔުވެންޓަސް އަށް ރޮނާލްޑޯ ބަދަލުވިއިރު، 24 ގަޑިއިރުގެ ތެރޭގައި ރޮނާލްޑޯގެ 520،000 (ފަސް ލައްކަ ވިހި ހާސް) ޖާޒީ ވިއްކައިގެން ޔުވެންޓަސް އިން 60 މިލިއަން ޑޮލަރުގެ ފައިދާ އެއް ހޯދި ކަމަށް ފޯބްސް އިން މީގެ ކުރިން ވަނީ ރިޕޯޓު ކޮށްފައެވެ.

ކުޅިވަރުގެ މައިދާނުގައި ވެސް ރޮނާލްޑޯ ގިނަ ކާމިޔާބީތަކެއް ހޯދާފައިވާއިރު، އޭނާ ވަނީ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބަލޮންޑޯ އެވޯޑު މިހާތަނަށް ފަސް ފަހަރު ހޯދާފައެވެ.