ކޮވިޑް-19: ފާއިތުވެދިޔަ 24 ގަޑީއިރުގެ ތެރޭގައި އިންޑިއާއިން 9،851 ޕޮޒިޓިވް ކޭސް، 273 މަރު
5 ޖޫން 2020 | ހުކުރު 08:41އިންޑިއާއިން ފާއިތުވެ ދިޔަ 24 ގަޑީއިރު 9،851 މީހުން ވައިރަސްއަށް ޕޮޒިޓިވް ވެފައިވޭ
ކޮމިއުނިޓީ ސަރވައިލަންސް ޕްރޮގުރާމުގެ ދަށުން ފަޤީރު ޞަރަޙައްދެއްގައި މީހުން ޓެސްޓު ކުރަނީ
ފާއިތުވި 24 ގަޑީއިރު އިންޑިއާއިން 9،851 މީހުން ކޮވިޑް-19ށް ޕޮޒިޓިވްވެފައި ވާއިރު، މިިއީ އިންޑިއާއިން ކޮވިޑް-19 ފެނުނު ފަހުން މިހާތަނަށް އެންމެ ގިނަ ކޭސްތައް ރިކޯޑު ކުރެވުނު ދުވަސްކަމަށް އެޤައުމުގެ ޞިއްޙަތާއި ބެހޭ ވުޒާރާއިން ބުނެފި އެވެ.
އިންޑިއާގެ ޞިއްޙަތާއި ބެހޭ ވުޒާރާއާއި ޙަވަލާދީ އެޤައުމުގެ މީޑިއާތަކުން ރިޕޯޓުކުރާ ގޮތުގައި، އިންޑިއާއިން ފާއިތުވެ ދިޔަ 24 ގަޑީއިރު 9،851 މީހުން ވައިރަސްއަށް ޕޮޒިޓިވްވެ، 273 މީހުން ވަނީ މަރުވެފަ އެވެ. މިއާއެކު އެޤައުމުގައި ވައިރަސްއަށް ޕޮޒިޓިވްވީ މީހުންގެ އަދަދު ވަނީ 2،26،770ށް އަރާފަ އެވެ. އަދި މަރުވީ މީހުންގެ ޖުމުލަ އަދަދަކީ 6،348 އެވެ. މިހާރުވެސް އެ ޤައުމުގައި 1،10،960ށް ފަރުވާދެމުން ދާއިރު، ފަރުވާ ދީގެން 1،09،462 މީހުން ވަނީ ބަލިން ފަސޭހަވެފަ އެވެ.
އިންޑިއާ އަކީ މުޅި ދުނިޔެއަށް ބަލާއިރު ހަތްވަނައަށް އެންމެ ގިނަ މީހުން ޕޮޒިޓިވްވީ ޤައުމެވެ. އިންޑިއާގައި ވައިރަސް ފެތުރެމުންދާ ޒާތައް ބަލާއިރު އެންމެ ގިނަ ޢަދަދަކަށް މީހުން ޕޮޒިޓިވްވެފައި ވަނީ މަހާރާޝްތުރާ، ޓެމިލްނާޑޫ، އަދި ގުޖުރާތު ސްޓޭޓުންނެވެ. މި ހަތަރު ސްޓޭޓުން ވެސް 10،000ށް ވުރެ ގިނަ މީހުން ވަނީ ވައިރަސްއަށް ޕޮޒިޓިވް ވެފައެވެ. މީގެ އިތުރުން ރާޖެސްތާނާއި، އުއްތަރު ޕްރަދޭޝް ސްޓޭޓުގައިވެސް ޕޮޒިޓިވްވީ މީހުންގެ އަދަދު 10،000 ވަނީ ގާތްވެފަ އެވެ.
އެންމެ ގިނަ ޢަދަދަކަށް ވައިރަސްއަށް މީހުން ޕޮޒިޓިވްވި މާހާރާޝްތުރާ ސްޓޭޓުން 77،793 އަދި ޓެމިލްނާޑޫ ސްޓޭޓުން 27،256 މީހުން ޕޮޒިޓިވްވެފައި ވެއެވެ. އަދި ވެރިރަށް ނިއު ދިއްލީން 25،004، ގުޖުރާތު ސްޓޭޓުން 18،584، ރާޖެސްތާން ސްޓޭޓުން 9،862 އަދި އުއްތަރު ޕްރަދޭޝުން 9،237 މީހުން ކޮވިޑް-19ށް ޕޮޒިޓިވްވެފައިވާ ކަމަށް އިންޑިއާގެ ހެލްތު މިނިސްޓްރީން ބުނެފައި ވެއެވެ.
އެންމެ ގިނަ އަދަދަކަށް މީހުން މަރުވީ ވެސް މަހާރާޝްތުރާ ސްޓޭޓުންނެވެ. އެ ސްޓޭޓުން 2،710 މީހުން މަރުވެފައި ވާއިރު ދެވަނަޔަށް އެންމެ ގިނަ މީހުން މަރުވެފައި ވަނީ ގުޖުރާތު ސްޓޭޓުންނެވެ. އެއީ 1،155 މީހުންނެވެ. މީގެ އިތުރުން ވެރިރަށް ނިއު ދިއްލީން 650 މީހުން މަރުވެފައި ވާއިރު، މާދްޔާ ޕްރަދޭޝް ސްޓޭޓުން 337 މީހުން އަދި ވެސްޓް ބެންގާލް ސްޓޭޓުން 355 މީހުން ވަނީ މަރުވެފަ އެވެ.
އިންޑިއާގެ ހެލްތު މިނިސްޓްރީން ބުނާ ގޮތުގައި، ޖޫން 5 ވަނަ ދުވަހާއި ހަމަޔަށް އެޤައުމުގައި ފަރުވާދީގެން ރަނގަޅުވީ މީހުންގެ ނިޞްބަތް ހުރީ %48.2 ގައެވެ. އަދި މަރުވާ މީހުންގެ ރޭޓު ހުރީ %2.8ގައެވެ.
އިންޑިއާއިން ދަނީ ކޮވިޑް-19 ކޮންޓްރޯލް ކުރުމަށް ގިނަ ގުނަ މަސައްކަތްތަކެއް ކުރަމުންނެވެ. ވައިރަސްއަށް ތަހުލީލު ކުރުމުގެ ނިޒާމު ވަރުގަދަ ކުރުމުގެ ގޮތުން ލެބޯރެޓަރީތައް އިތުރުކޮށް ކޮމިއުނިޓީ ސަރވައިލެންސް ޕްރޮގުރާމެއްގެ ދަށުން ގިނަ އަދަދެއްގެ މީހުން ދަނީ ޓެސްޓު ކުރަމުންނެވެ.
