ފްލޮއިޑަށް އިންސާފު ހޯދައިދޭން ގޮވާލި ކުޅުންތެރިންނަށް ފިޔަވަޅު ނާޅަން ޖަރުމަން އެފްއޭ އިން ނިންމައިފި
ޖަރުމަން ލީގުގެ ބައެއް ކުޅުންތެރިން ވަނީ ފްލޮއިޑަށް އިންސާފު ހޯދައިދިނުމަށް ގޮވާލާފައި
ބޮރޫޝިއާ ޑޯޓްމަންޑުގެ ޖޭޑަން ސަންޗޯ: އޭނާ ވަނީ \"ޖަސްޓިސް ފޯ ޖޯޖް ފްލޮއިޑް\" ޖަހާފައިވާ މެސެޖެއް ދައްކާލާފައި
އެމެރިކާގެ ކަޅު ނަސްލުގެ ރައްޔިތެއް ކަމަށްވާ ޖޯޖް ފްލޮއިޑަށް އިންސާފު ހޯދައިދޭން ގޮވާލި ކުޅުންތެރިންނަށް ފިޔަވަޅު ނާޅަން ޖަރުމަން އެފްއޭ އިން ނިންމައިފި އެވެ.
ޖޯޖް ފްލޮއިޑް ހައްޔަރު ކުރަން އުޅުމުގެ ތެރޭގައި ދޮން ނަސްލުގެ ފުލުހަކު ވަނީ ފްލޮއިޑްގެ ކަރަށް ކަކުލުން އަރައި މަރާލާފަ އެވެ. އެއާއެކު ގިނަ ކުޅިވަރު ތަރިން އަންނަނީ އެކަމާ ދެކޮޅަށް އަޑު އުފުލަމުންނެވެ.
އެގޮތުން ޖަރުމަނު ލީގުގައި ހޯމަ ދުވަހުގެރޭ ކުޅުނު މެޗުތަކުގެ ތެރެއިން ލަނޑު ޖެހުމަށް ފަހު އުފާފާޅުކުރިއިރު ބޮރޫޝިއާ ޑޯޓްމަންޑުގެ ޖޭޑަން ސަންޗޯ އާއި އަޝްރަފް ހަކީމީ ވަނީ "ޖަސްޓިސް ފޯ ޖޯޖް ފްލޮއިޑް" ޖަހާފައިވާ މެސެޖެއް ދައްކާލާފަ އެވެ. އަދި ބޮރޫޝިއާ މުންޗެންގްލަޑްބެކްގެ ފޯވަރޑް މާކަސް ތުރާމް ވަނީ ލަނޑު ޖެހުމަށްފަހު ކަކޫ ޖައްސައިގެން އިށީނދެފައެވެ. އޭގެ އިތުރަށް ޝާލްކޭ އަށް ކުޅެމުން އަންނަ އެމެރިކާގެ މިޑްފީލްޑަރު ވެސްޓެން މެކެނީ މެޗަށް ނުކުތީ އޭނާގެ އަތުގައި ހާއްސަ ބޭންޑެއް އަޅައިގެންނެވެ.
ފުޓްބޯޅަ މެޗުގެ ތެރެއިން އެފަދަ ކަމަކާ ގުޅޭގޮތުން ހިޔާލު ފާޅުކުރުމުގެ ޖާގައެއް ނޯންނާނެ ކަމަށް ބުނެ، ޖަރުމަނު އެފްއޭ އިން މީގެ ކުރިން ވަނީ މެޗުގެ ތެރެއިން ޝުއޫރުފާޅުކުރި ކުޅުންތެރިންގެ މައްސަލަތައް ބަލަމުން އަންނަ ކަމަށް ބުނެފައެވެ. އެއާއެކު ގިނަ ބައެއްގެ ފާޑު ކިޔުން ޖަރުމަން އެފްއޭ އަށް އަމާޒުވިއިރު، ފީފާގެ ރައީސް ޖިއާނީ އިންފަންޓީނޯ ވެސް ވަނީ އެ ކުޅުންތެރިންނަށް އަދަބު ދިނުމަކީ ރަނގަޅު ނިންމުމަކަށް ނުވާނެ ކަމަށް ވިދާޅުވެފަ އެވެ.
އިންފަންޓީނޯ ވިދާޅުވީ ނަސްލީ ތަފާތުކުރުން ހުއްޓާލުމަށް ފީފާ އިން ވެސް ވަރަށް ބޮޑަށް ބާރު އަޅާ ކަމަށާއި، އެކަމަށް ގޮވާލާ ކުޅުންތެރިންނަށް ފިޔަވަޅު އެޅުމުގެ ބަދަލުގައި ތައުރީފު ހައްގު ކަމަށެވެ. އެހެންކަމުން މި ދަނޑިވަޅުގައި ނަސްލީ ތަފާތުކުރުމާ ދެކޮޅަށް އަޑުއުފުލާ ކުޅުންތެރިންނަށް އަދަބު ނުދޭން އިންފަންތީނިއޯ ވަނީ ގޮވާލާފައެވެ.
އެއާއެކު ޖަރުމަން އެފްއޭ އިން ވަނީ ފްލޮއިޑަށް އިންސާފު ހޯދައިދޭން ގޮވާލި ކުޅުންތެރިންނަށް ފިޔަވަޅު ނާޅަން ނިންމާފަ އެވެ.
ޖަރުމަން ލީގުގެ އިތުރުން ޕްރިމިއާ ލީގުގެ ކްލަބުތަކުގެ ކުޅުންތެރިންވެސް އަންނަނީ ފްލޮއިންޑަށް އިންސާފު ހޯދައިދޭން ގޮވާލަމުންނެވެ. މީގެ ކުރިން އިނގިރޭސި އެފްއޭ އިން ވަނީ ޕްރިމިއާ ލީގުގައި ނަސްލީ ތަފާތުކުރުމާ ދެކޮޅަށް އަޑުއުފުލާ އެއްވެސް ކުޅުންތެރިއަކަށް ފިޔަވަޅު ނާޅާނެކަން ހާމަކޮށްފަ އެވެ.
