ގދ.ވާދޫއަށް ގެންނަ ބިދޭސީ މަސައްކަތު މީހުންނާ ބެހޭގޮތުން އަމަލުކުރުމަށް "ގދ. ވާދޫގައި ބިދޭސީ މަސައްކަތު މީހުން ގެންގުޅުމާބެހޭ އުސޫލު" ނަމުގައި ޚާއްސަ އުސޫލެއް އެކުލަވާލައިފިއެވެ.
ވާދޫ ކައުންސިލުން ބުނީ މިއުސޫލުގެ މަގުސަދަކީ ރަށަށް ގެންނަ ބިދޭސީ މަސައްކަތު މީހުންގެ އެންމެހާ ކަންތައްތައް ރެގިއުލޭޓް ކުރުމާއި، ބިދޭސީ މަސައްކަތު މީހުން ގަވާއިދާ އެއްގޮތަށް އުޅޭކަން ކަށަވަރު ކުރުމަށް ކަަމަށެވެ. އަދި ބިދޭސީންނާއި ބިދޭސީންނާ ގުޅޭ ކަންކަމުގައި ރަށު ރައްޔިތުންގެ ހައްގުތައް ރައްކާތެރިކޮށްދިނުން ކަމަށް ކައުންސިލުން ބުނެއެވެ.
ކައުންސިލުން ބުނީ މިއުޞޫލުގައި ބަޔާން ކޮށްފައިވާ ގޮތާ ޚިލާފަށް އެއްވެސް ގެއެއްގައި ބިދޭސީ މަސައްކަތު މީހެއް ބަހައްޓައިގެން ނުވަތަ ގެންގުޅެގެން ނުވާނެ ކަމަށާއި، ބިދޭސީ މަސައްކަތު މީހުން ރަށަށް ގެންނަންވާނީ މޯލްޑިވްސް އިމިގްރޭޝަންގައި އެކުލަވާލާފައިވާ އެކްސްޕެޓް އޮންލައިން ސިސްޓަމްގެ ތެރެއިން ކަމަށެވެ. އަދި އެފަރާތަކީ ރާއްޖޭގައި މަސައްކަތްކުރުމުގެ ހުއްދައޮތް އަދި ސަރުކާރުގެ އެހެން އިދާރާތަކަށް ދައްކަންޖެހޭ ފައިސާއާއި ލިޔެކިޔުންތައް ފުރިހަމަކޮށްފައިވާ ފަރާތަކަށް ވާންވާނެ ކަމަށް ކައުންސިލުން ބުނެއެވެ.
މީގެ އިތުރުން ކައުންސިލުން ބުނީ ސިސްޓަމްގެ ތެރެއިން ގެންނަ ބިދޭސީމީހާ ރަށަށް ގެނައުމުގެ ކުރިން އެމީހާ ރަށުގައި ދިރިއުޅުމަށް ކައުންސިލް އިދާރާއިން ނަގަންޖެހޭ ހުއްދަ އެމީހާ ގެންނަ ފަރާތުން ނަގަންޖެހޭ ކަމަށެވެ. އަދި ބިދޭސީން ގެނައުމަށް ހުއްދަދޫ ކުރެވޭނީ ގެންނަ ބިދޭސީމީހާ ދިރިއުޅޭނެ ޒަރޫރީ ހުރިހާ ބޭނުމެއް ފުއްދޭނެ ގޮތްހުރިކަމަށް ކައުންސިލަށް އަންގާ، ކައުންސިލުން ބަލާ ޗެކުކުރުމަށްފަހު އެކަމަށް ހުއްދަ ދިނުމުން ކަމަށް ވެސް ކައުންސިލުން ބުނެއެވެ.ކައުންސިލުން ބުނީ މިއުސޫލާ ޚިލާފަށް އަމަލުކުރާ ފަރާތްތަކަށް ފުރަތަމަ ފަހަރަށް އިސްލާހުވުމަށް ލިޔުމުން އެއް ފަހަރު ނަޞޭހަތް ދެވޭނެ ކަމަށާއި، މިއުސޫލާ އެއްގޮތަށް އަމަލުކުރުމަށް ނަސޭހަތް ދިނުމަށްފަހު އިސްލާހު ނުވެއްޖެނަމަ، މި އުސޫލާއި އެއްގޮތަށް އެ ފަރާތެއް ޖޫރިމަނާ ކުރާނެ ކަމަށެވެ. އަދި މިއުސޫލާ އެއްގޮތަށް އަމަލުކުރުމަށް ނަސޭހަތްދީ އިސްލާހުނުވާ ފަރާތްތަށް ފުރަތަމަ ފަހަރު 1000 (އެއްހާސް) ރުފިޔާއަށްވުރެ ބޮޑުނޫން އަދަދަކުން، ދެވަނަ ފަހަރު 3000 (ތިންހާސް) ރުފިޔާއަށް ވުރެ ބޮޑުނޫން އަދަދަކުން، ތިންވަނަ ފަހަރު 5000 (ފަސްހާސް) ރުފިޔާއަށްވުރެ ބޮޑުނޫން އަދަދަކުން އަދި އިތުރުވާ ކޮންމެ ފަހަރަކު 5000 (ފަސްހާސް) ރުފިޔާއިން ޖޫރިމަނާ ކުރެވޭނެ ކަމަށް ކައުންސިލުން ބުނެއެވެ.
މި އުސޫލަށް އަމަލުކުރަން ފަށާނީ 01 އޯގަސްޓް 2020 އިން ފެށިގެން ކަމަށް ވެސް ވާދޫ ކައުންސިލް އިން ބުނެފައިވެއެވެ.
