މިހާތަނަށް ލިޔެކިޔުމެއް ނެތި އުޅުނު 1593 ބަންގްލަދޭޝް ރައްޔިތަކު އަނބުރާ ގައުމަށް ފޮނުވާލައިފި

ލިޔެކިޔުމެއްނެތި ރާއްޖޭގައި މަސައްކަތްކުރަމުން އައި ބިދޭސީ މަސައްކަތްތެރިންގެ ތެރެއިން ބަންގްލަދޭޝް އަށް ނިސްބަތްވާ 1593 މީހަކު ފޮނުވާލައިފި އެވެ.

ނޭޝަނަލް އިމަރޖެންސީ އޮޕަރޭޝަންސް ސެންޓަރުގައި ބޭއްވި ނޫސްވެރިންގެ ބައްދަލުވުމެއްގައި އެ ސެންޓަރުގެ ތަރުޖަމާނު މަބްރޫކް އަޒީޒް ވަނީ ޖުމްލަ 1935 ބަންގްލަދޭޝް ރައްޔިތުން އަނބުރާ ގައުމަށް ދަތުރުކޮށްފައިވާ ކަމަށެވެ. މީގެ ތެރެއިން 342 މީހުންނަކީ ގަވައިދާ އެއް ގޮތަށް ރާއްޖޭގައި މަސައްކަތްކުރަމުން އައި ފަރާތްތަކެވެ.

ރާއްޖޭގައި ލިޔެކިޔުމެއްނެތި ދިރިއުޅޭ ބިދޭސީންގެ ތެރެއިން 1500 މީހަކު އަނބުރާ ގައުމަށް ފޮނުވާލުމުގެ މަސައްކަތް ފެއްޓެވި ކަން ރައީސް އިބްރާހިމް މުހައްމަދު ސޯލިހު އިއުލާންކުރެއްވީ މެއި މަހުގެ ކުރީކޮޅުގަ އެވެ. ރައީސް ވިދާޅުވީ، ދެ ހަފުތާގެ ތެރޭގައި މި އަދަދަށް ބިދޭސީން ފޮނުވާލެވޭނެ ކަމަށެވެ.

އަނބުރާ ގައުމަށް ދަތުރުކުރި ބިދޭސީންގެ ތެރޭގައި ގިނައީ އަމިއްލަ އަށް އަނބުރާ ގައުމަށް ދާން ބޭނުންވެގެން އެދިފައިވާ ފަރާތްތަކެވެ. އެގޮތުން މިފަހުން ބޭއްވުނު ފްލައިޓްތަކުގައި އަމިއްލަ އަށް އެދިގެން ދިއުމަށް ބޭނުންވި ފަރާތްތަކާއި ވަޒީފާ ގެއްލުމުގެ ސަބަބުން ރާއްޖޭގައި ތާށިވެފައި ތިބި ބަންގްލަދޭޝްގެ ރައްޔިތުން ހިމެނެ އެވެ.

ބަންގްލަދޭޝް ރައްޔިތުން އަނބުރާ ގައުމަށް ފޮނުވާލުމުގައި، އެ ގައުމުގެ ސަރުކާރުންނާއި ރާއްޖޭގައި ހުންނަ އެ ގައުމުގެ އެމްބަސީ އިން ވަނީ އެހީތެރިވެފަ އެވެ. އަދި އެ ގައުމުން ރާއްޖެއަށް ފޮނުވި އެހީ ހިފައިގެން އައި ފްލައިޓްތަކުގައި ވެސް ގިނަ އަދަދެއްގެ ބަޔަކު އަނބުރާ ގައުމަށް ގެންގޮސްފައި ވެއެވެ.