ކ. ގުޅީފަޅު ގައި ގާއިމު ކުރެވޭ ޕޯޓު މަޝްރޫޢުގެ ދަށުން ގުޅިފަޅު ހިއްކުމުގެ މަސައްކަތުގެ ދަށުން ވިލިމާލޭ ފަރަށް ގެއްލުންވާ މައްސަލާގައި އެންވަޔަރަންމެންޓަލް ޕްރޮޓެކްޝަން އޭޖެންސީ (އެޗްޕީއޭ) އާއި އެންވަޔަރްމަންޓް މިނިސްޓްރީ އާއި ޕްލޭނިން މިނިސްޓްރީގެ އިސްވެރިން ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓް ކޮމިޓީން ނިންމައިފި އެވެ.

މާލޭގެ ވިޔަފާރި ބަނދަރު ގުޅީފަޅަށް ބަދަލު ކުރުމަށްޓަކައި ގުޅީފަޅު ހިއްކުމުގެ މަޝްރޫއު މިހާރު ވަނީ ފަށާފަ އެވެ. މި މަޝްރޫޢުގެ މަސައްކަތްތައް ކުރިއަށް ގެންދާ ގޮތުން ވިލިމާލޭ ފަރަށް ކިސަޑު ފެތުރި ފަރުތައް މަރުވެދާނެ ކަމުގެ ކަންބޮޑުވުން ތިމާވެށްޓާ ބެހޭ ފަރާތްތަކުން ދަނީ ފާޅު ކުރަމުންނެވެ. އެ މައްސަލަ މަޖިލީހުގެ ވިލިމާލޭ ދާއިރާގެ މެންބަރު އަހުމަދު އުޝާމް އޮތީ މަޖިލީހަށް ހުށަހަޅުއްވާފަ އެވެ.

މިކަމާއި ގުޅޭގޮތުން ރައްޔިތުންގެ މަޖިލީހުގެ އިދާރާއިން ނެރިފައިވާ ބަޔާނެއްގައި ބުނެފައި ވަނީ ގުޅީފަޅު ހިއްކުމުގެ މަސައްކަތް ފެށުމާއެކު އެޞަރަޙައްދުގެ ތިމާވެއްޓަށް ގެއްލުންވަމުން ދާތީ އެކި ފަރާތްތަކުން އެކަމުގެ ކަންބޮޑުވުން ފާޅުކުރަމުންދާ ކަމަށެވެ. އެހެންކަމުން މި މައްސަލަ މަޖިލީހުގެ އެންވަޔަރަންމަންޓް ކޮމިޓީން ދިރާސާކުރުމަށް ނިންމީ އެކޮމިޓީގެ އިސްނެގުމުގެ މަތިން ކަމަށް ބަޔާނުގައި ބުނެފައިވެ އެވެ.

އެގޮތުގެ މަތިން މިމައްސަލައާ ގުޅުންހުރި ފުރަތަމަ ބައްދަލުވުން ޖޫން މަހުގެ 1 ވަނަ ދުވަހު ކުރިޔަށް ގެންގޮސްފައިވާ ކަމަށާއި އެ ބައްދަލުވުމުގައި މިމައްސަލަ ކޮމިޓީން ބެލުމަށް ނިންމާފައިވާ ކަމަށް ބަޔާނުގައި ބުނެފައިވެ އެވެ.

އެގޮތުން އީޕީއޭ އާއި، އެންވަޔަރްމަންޓް މިނިސްޓްރީ އާއި، ޕްލޭނިިން މިނިސްޓްރީގެ އިސްވެރިންގެ އިތުރުން އެ މަޝްރޫއުގެ އެންވަޔަރަންމެންޓަލް އިމްޕެކްޓް އެސެސްމަންޓް (އީއައިއޭ) ކޮންސަލްޓެންޓް އަންނަ ހޮނިހިރު ދުވަހުގެ ހެނދުނު 10:0 ގައި އެ ކޮމިޓީއަށް ހާޒިރު ކުރަން ނިންމާފައިވާ ކަމަށް ބަޔާނުގައި ބުނެފައިވެ އެވެ.

މިމައްސަލާގައި މީގެކުރިން އީޕީއޭއިން ބުނެފައި ވަނީ އެ މަޝްރޫއުގެ ސަބަބުން ވިލިމާލޭ ފަރަށް މިހާތަނަށް ގެއްލުމެއް ލިބިފައި ނުވާ ކަމަށެވެ. އަދި އެކަންކަން ބަލައި މޮނިޓަރ ކުރަމުންދާ ކަމަށް ވެސް އީޕީއޭ އިން ބުނެފައިވެ އެވެ.