"ކޮވިޑް-19 ޖެހިގެން ނިޔާވި 7 ވަނަ މީހާގެ 'ވައިޓަލްސް' އެންމެ ފަހުން ޗެކްކުރި އިރުވެސް ހުރީ އާދައިގެ ގޮތަކަށް"
33.24 އިންސައްތަ މީހުން މިވަނީ ބަލިން ރަނގަޅުވެފައި
ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް- މަބްރޫކު ވަނީ ނިޔާވި މީހާގެ ތަފްސީލުތައް ހިއްސާ ކުރައްވާފައި
ރާއްޖެއިން ކޮވިޑް-19 ޖެހިގެން ނިޔާވި 7 ވަނަ މީހާގެ ވައިޓަލްސް އެންމެ ފަހުން ޗެކްކުރި އިރުވެސް ހުރީ އާދައިގެ ގޮތަކަށް ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވެއްޖެ އެވެ.
އަންގާރަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކު ވިދާޅުވީ، އަންގާރަ ދުވަހު ނިޔާވި މީހާގެ ވައިޓަލްސް ޑޮކްޓަރުން އެންމެ ފަހުން ޗެކްކުރިއިރު ވެސް ހުރީ އާދައިގެ ގޮތަކަށް ކަމަށެވެ.
މަބްރޫކު ވިދާޅުވީ، އޭނާއަކީ އުމުރުން ދުވަސްވީ މީހެއް ކަމަށާއި، އެނދު ދާންމަތި ވެފައިވާ މީހެއް ކަމަށެވެ. އަދި އޭނާ ނިޔާވި އިރު އޮތީ އެޗްއައިއެޗް އައިސޮލޭޝަން ފެސިލިޓީގައިކަން ފާހަގަ ކުރައްވައި މަބްރޫކު ވިދާޅުވީ، އޭނާ ނިޔާވިކަން އެނގުނީ އަންގާރަ ދުވަހުގެ ހެނދުނު 06:00 ޖެހިއިރު ކަމަށެވެ. އަދި އެކަން އެނގުނީ އާންމުކޮށް ހޭލާ ގަޑިއަށް ނުހޭލައިގެން ބެލުމުންކަން މަބްރޫކު ފާހަގަ ކުރެއްވި އެވެ.
އަންގާރަ ދުވަހު ނިޔާވި މި މީހާއަކީ އުމުރުން 89 އަހަރުގެ ދިވެހި އަންހެނެކެވެ. މިއީ، ކޮވިޑް-19 ޖެހިގެން ރާއްޖެއިން ނިޔާވި 7 ވަނަ މީހާއެވެ.
