މި ސީޒަނުގެ އިޓާލިއަން ލީގު ނިމުމުގެ ކުރިން ސަޕޯޓަރުންނަށް ދަނޑު ހުޅުވާލެވޭނެ ކަމަށް އުންމީދު ކުރައްވާ ކަމަށް އިޓާލިއަން ފުޓްބޯލް ފެޑެރޭޝަންގެ ރައީސް ގެބްރިއަލީ ގްރަވީނާ ވިދާޅުވެއްޖެ އެވެ.

އިޓަލީގެ ސަރުކާރުގެ ހުއްދަ އާއެކު އިޓާލިއަން ލީގު ޖޫން މަހުގެ 20 ވަނަ ދުވަހު ފަށަން މިހާރު ވަނީ ނިންމާފަ އެވެ. އަދި އޭގެ ކުރިން ޖޫން މަހުގެ 13 ވަނަ ދުވަހު އިޓާލިއަން ކަޕްގެ ސެމީ ފައިނަލް މެޗުތައް ކުޅުމަށް ވެސް ވަނީ ތާވަލު ކޮށްފަ އެވެ. މެޗުތައް ކުރިއަސް ގެންދަން މިހާރު ނިންމާފައި ވަނީ ދަނޑަށް ސަޕޯޓަރުން ނުވައްދަ އެވެ.

ޖޫން މަހުގެ 20 ވަނަ ދުވަހު އިޓާލިއަން ލީގު އަލުން ފަށާއިރު، އޮގަސްޓް މަހުގެ 20 ވަނަ ދުވަހުގެ ކުރިން އިޓާލިއަން ލީގު ނިންމަން މީގެ ކުރިން ވަނީ ކަނޑައަޅާފަ އެވެ.

އިޓަލީގެ ރޭޑިއޯ އަކަށް ދިން އިންޓަވިއުއެއްގައި ގްރަވީނާ ވިދާޅުވީ 60،000 އާއި 80،000 އާ ދެމެދުގެ ޖާގަ އޮންނަ ބޮޑެތި ދަނޑުތަކަށް ވަކި އިންސައްތައަކަށް ސަޕޯޓަރުން ވައްދައިގެން ސީޒަންގެ ވަކި ހިސާބަކުން މެޗުތައް ކުރިއަށް ގެންދިޔުމަކީ އުންމީދެއް ކަމަށެވެ. އަދި މިކަމަށް އަމަލުކުރުން ނާދިރު ކަމަށާއި، އެކަމަކު ހާއްސަ އުސޫލުތަކެއް ކަނޑައަޅައިފި ނަމަ އެކަން އެގޮތަށް ވާނެ ކަމަށެވެ. ގްރަވީނާ އިތުރަށް ވިދާޅުވީ ދަނޑުތައް ސަޕޯޓަރުންނަށް ހުޅުވާލެވޭ ދުވަހަކީ އިޓަލީ އަށް ވެސް އިތުރު ހިތްވަރެއް ކަމަށެވެ.

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ އިޓާލިއަން ލީގު ޖޫން މަހުގެ 20 ވަނަ ދުވަހު ފަށަން ތާވަލުކުރި އިރު، އިޓާލިއަން ލީގުގެ ކްލަބުތަކުން ކުޅުންތެރިން ވަނީ ކޮވިޑް-19ށް ޓެސްޓު ކޮށްފަ އެވެ. އެގޮތުން މިހާތަނަށް ޕާމާގެ ދެ ކުޅުންތެރިއަކާއި، ސަމްޕްޑޯރިއާގެ ހަތަރު ކުޅުންތެރިއަކާއި، ޓޮރީނޯގެ ކުޅުންތެރިއެއްގެ އިތުރުން ފިއޮރެންޓީނާގެ ތިން ކުޅުންތެރިއަކު ވަނީ ކޮވިޑް-19ށް ޕޮޒިޓިވްވެފަ އެވެ.

އިޓާލިއަން ލީގުގައި ބާކީ އޮތް ބައިގައި، 8 ޓީމަކުން 13 މެޗު ކުޅެން ޖެހޭއިރު، ބާކީ ޓީމުތަކަށް އޮތީ 12 މެޗެވެ. އިޓާލިއަން ލީގު މެދުކަނޑާލި އިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތާވަލުގެ އެއްވަނައިގައި 26 މެޗުން 63 ޕޮއިންޓާއެކުގަ އެވެ. ދެވަނައިގައި އޮތް ލާޒިއޯ އަށް 26 މެޗުން ލިބިފައިވަނީ 62 ޕޮއިންޓެވެ.