ދިވެހި ރެޑް ކްރެސެންޓްގެ ކޮވިޑް-19 މައިގްރަންޓްސް ރިލީފް ފަންޑަށް 1.3 މިލިއަން ދިވެހި ރުފިޔާގެ އެހީ ރާއްޖޭގައި ދިރިއުޅޭ ރައްޔިތުންނާއި ހެޔޮއެދޭ ފަރާތްތަކުން ހަދިޔާކޮށްފި އެވެ.

ރެޑް ކްރެސެންޓުން ލޯންޗުކުރި މިފަންޑަށް ފައިސާ ހަދިޔާކުރުމުގެ ފުރުސަތު ހުޅުވާލީ މެއި މަހުގެ އެއްވަނަ ދުވަހުއެވެ. އަދި ޖޫން މަހުގެ އެއްވަނަ ދުވަހު ވަނީ މިފަންޑު ބަންދުކޮށްފައެވެ.

މިފަންޑާ ބެހޭ ގޮތުން ރެޑް ކްރެސެންޓުން ބުނީ ފަންޑު ބަންދުކުރިއިރު، ފަންޑަށް ބޭނުންކުރެވުނު ބޭންކް އޮފް މޯލްޑިވްސް އަދި މޯލްޑިވްސް އިސްލާމިކް ބޭންކުގެ ހަތަރު އެކައުންޓަށް މުޅި ޖުމްލަ އެއް މިލިއަން ތިން ލައްކަ ހަތްދިހަ ހަތަރު ހާސް ހަތްސަތޭކަ ސާޅީސް ފަސް ރުފިޔާ ހަތްދިހަ ނުވަ ލާރި (1,374,745.79) އެކި ފަރާތްތަކުން ހަދިޔާކޮށްފައިވާ ކަމަށެވެ.

ރެޑް ކްރެސެންޓުން ބުނީ މިފަންޑުގެ ބޭނުމަކީ ކޮވިޑް-19 ގެ އިގުތިސާދީ ދަތިކަން ކުރިމަތިވެފައިވާ ބިދޭސީންނަށް އެހީތެރިކަން ފޯރުކޮށްދިނުމަށް މިހާރު ވެސް ރެޑް ކްރެސެންޓުގެ ފަރާތުން ހިންގަމުންދާ ހަރަކާތްތައް އިތުރަށް ފުޅާކޮށް، ހާލުގައި ޖެހިފައިވާ ބިދޭސީންނަށް އެހީތެރިކަން ފޯރުކޮށްދިނުން ކަމަށެވެ.

އެގޮތުން ރެޑް ކްރެސެންޓުގެ މާލޭ ގޮފީގެ ފަރާތުން ހިންގާ މައިގްރަންޓްގެ ސަޕޯޓް ސެންޓަރުން ދަނީ ބިދޭސީންނަށް ކާބޯތަކެތި ހަމަޖައްސައިދިނުމާއި، ސާފުތާހިރުވުމަށް ބޭނުންވާ ސާމާނު ފޮރުކޮށްދިނުމުގެ އިތުރުން އެހެނިހެން ކަންކަމުންގައި ވެސް ހަރަކާތްތެރިވަމުންނެވެ.

ރެޑް ކްރެސެންޓުގެ ސެކްރެޓަރީ ޖެނެރަލް ފާތިމަތު ހިއްޔާ ވިދާޅުވީ، ކޮވިޑް-19 މައިގްރަންޓްސް ފަންޑަށް ލިބިފައިވާ ފައިސާގެ 85 އިންސައްތަ ބޭނުންކުރާނީ ހާލުގައި ޖެހިފައިވާ ބިދޭސީންގެ ކޮއްތު ހަމަޖައްސައިދިނުމުގެ މަސައްކަތަށް ކަމަށެވެ. އަދި ފަންޑުގެ 10 އިންސައްތަ ޕްރޮމޯޝަންގެ ހަރަކާތްތަކަށް ކަނޑައެޅިފައިވާއިރު، އިދާރީ ހަރަދުތަކަށް ފަސް އިންސައްތަ ބޭނުންކުރާނެ ކަމަށް ހިއްޔާ ވިދާޅުވިއެވެ.

އާއްމުންގެ އެހީތެރިކަމާއެކު މައިގްރަންޓް ސަޕޯޓް ސެންޓަރުން ވަނީ މިހާތަނަށް 3،600 އަށް ވުރެ ގިނަ ބިދޭސީންނަށް 100،000 އަށްވެރު ގިނަ މީލްޕެކް ފޯރުކޮށްދީފަ އެވެ. އަދި ސައިބޯނި، ޝޭމްޕޫ، ތުވާލި، ދަތް އުނގުޅާ ބުރުސް އަދި ބޭސް ހިމެނޭ 550 ހައިޖީންކިޓްސް މިހާތަނަށް އެކި ފަރާތްތަކަށް ފޯރުކޮށްދީފައިވެއެވެ.