ފްލޮއިޑަށް އިންސާފު ހޯދައިދޭން ކުޅިވަރު ތަރިން ގޮވާލަނީ

އެމެރިކާގެ ކަޅު ނަސްލުގެ ރައްޔިތެއް ކަމަށްވާ ޖޯޖް ފްލޮއިޑަށް އިންސާފު ހޯދައިދޭން ކުޅިވަރު ތަރިން ގޮވާލަން ފަށައިފި އެވެ.

ޖޯޖް ފްލޮއިޑް ހައްޔަރު ކުރަން އުޅުމުގެ ތެރޭގައި ދޮން ނަސްލުގެ ފުލުހަކު ވަނީ ފްލޮއިޑްގެ ކަރަށް ކަކުލުން އަރައި މަރާލާފައެވެ. އެއާއެކު މުޅި އެމެރިކާގެ އިތުރުން ޔޫރަޕްގެ ގައުމުތަކުގައި ވެސް އަންނަނ އެކަމާ ހިތްހަމަނުޖެހުން ފާޅުކޮށް މުޒާހަރާ ކުރަމުންނެވެ.

ފްލޮއިޑަށް އިންސާފު ހޯދައިދޭން އެކި ކުޅިވަރު ތަރިން ގޮވާލަމުން އަންނައިރު، އިނގިރޭސި ޕްރިމިއާ ލީގުގައި ވާދަކުރަމުން އަންނަ ލިވަޕޫލުން ހޯމަ ދުވަހު ފަރިތަކުރުންތައް ފެށީ ހުރިހާ ކުޅުންތެރިން ކަކޫ ޖައްސައިގެން އިށީނދެ އިނުމަށްފަހު އެވެ.

އަދި ޖަރުމަނު ލީގުގައި ހޯމަ ދުވަހުގެރޭ ކުޅުނު މެޗުތަކުގެ ތެރެއިން ލަނޑު ޖެހުމަށް ފަހު އުފާފާޅުކުރިއިރު ބޮރޫޝިއާ ޑޯޓްމަންޑުގެ ޖޭޑަން ސަންޗޯ އާއި އަޝްރަފް ހަކީމީ ވަނީ "ޖަސްޓިސް ފޯ ޖޯޖް ފްލޮއިޑް" ޖަހާފައިވާ މެސެޖެއް ދައްކާލާފައެވެ. އަދި ބޮރޫޝިއާ މުންޗެންގްލަޑްބެކްގެ ފޯވާޑް މާކަސް ތުރާމް ވަނީ ލަނޑު ޖަހުމަށްފަހު ކަކޫ ޖައްސައިގެން އިށީނދެފައެވެ.

ފްލޮއިޑްގެ ޖަނާޒާގެ ޚަރަދުތައް ބެލުމަށް މަޝްހޫރު ބޮކްސިން ތެޅުންތެރިޔާ ފްލޮއިޑް މޭވެދާ ނިންމާފައިވާއިރު، ޓެނިހުގެ ތަރިން ކަމަށްވާ ސެރީނާ ވިލިއަމްސް އާއި ނައޯމީ އޮސާކާ އާއި ކޮކޯ ގޯފް އަދި ފްރާންސެސް ޓިއާފޯ ވެސް ވަނީ ފްލޮއިޑް މަރާލި މައްސަލައިގައި އަޑު އުފުލާފައެވެ. އަދި ބާސްކެޓްބޯޅަ ލެޖެންޑް މައިކަލް ޖޯޑަން ވަނީ ނަސްލީ ތަފާތު ކުރުން މިހާރު ގޮސްފައިވާ ހިސާބުގެ ސަބަބުން ވަރަށް ބޮޑަށް ރުޅި ގަދަވާ ކަމަށް ބުނެފައެވެ.

ފްލޮއިޑްގެ މަރުގެ މައްސަލައިގައި ގިނަ ބަޔަކު އަޑު އުފުލަމުންދާއިރު، އެމެރިކާގައި އާންމުންނާއި ފުލުހުންގެ ދެމެދުގައި އަންނަނީ ހަމަނުޖެހުންތައް ހިނގަމުންނެވެ. ފްލޮއިޑްގެ މަރުގެ ހާދިސާ ހިނގައިދިޔައީ އެމެރިކާގެ މިނިއާޕޮލިސް ގައެވެ. މަންޒަރު ބަލަށް ހުރި މީހަކު ސޯޝަލް މީޑިއާ އަށް ދޫކޮށްލާފައިވާ ވީޑިއޯއަކުން، ދޮން ނަސްލުގެ ފުލުހަކު ކަމަށްވާ ޑެރެކް ޝޯވިން، ފްލޮއިޑް ގެ ކަނދުރާ މައްޗަށް ކަކޫ ލައިގެން ހުންނަ މަންޒަރު ފެނެ އެވެ. އަދި އޭނާ ބިންމަތީގައި އޮވެގެން ނޭވާ ނުލެވިގެން، "އަހަންނަކަށް ނޭވާ ނުލެވެޔޭ" ބުނާ އަޑު ދެތިން ފަހަރަކު އިވެ އެވެ.

މަންޒަރު ބަލަން ތިބި މީހުން ފްލޮއިޑް އަށް ނޭވާ ނުލެވޭ ކަމަށް ބުނުމުންވެސް، ފުލުސް މީހާ އަޅާ ވެސް ނުލަ އެވެ. ފްލޮއިޑް ނޭވާ ހާސްވެގެން އާދޭސް ކުރިއިރު، އޭނާ އޮތީ އަނގަވަތަށް، ފަހަތަށް ބިޑި އަޅުވާފަ އެވެ. އެތަނުން އެމްބިއުލާންސެއްގައި ހޮސްޕިޓަލަށް ގެންދިޔަ އިރުވެސް، ފްލޮއިޑް މަރުވެފައިވާ ކަމަށް ޑޮކްޓަރުން ވަނީ ހާމަކޮށްފަ އެވެ.