ލަންކާ އަށް އެތެރެވާ އެންމެން ކޮވިޑަށް ޓެސްޓު ކުރަން ފަށައިފި
2 ޖޫން 2020 | އަންގާރަ 03:16ނިންމުމަކީ ރައީސްގެ ޓާސްކު ފޯހުގެ ނިންމެވުމެއް
ކޮވިޑް-19 އަށް ޓެސްޓު ކުރުމުގައި ސިއްހީ ހިދުމަތްތެރިންތަކެއް ހަރަކާތްތެރިވަނީ
ސްރީލަންކާގެ ވައިގެ ބަނދަރު ބަންޑާރަނައިކަ އިންޓަނޭޝަނަލް އެއާޕޯޓް (ބީއައިއޭ) މެދުވެރިކޮށް އެ ގައުމަށް އެތެރެވާ އެންމެންގެ ކޮވިޑް-19 އަށް ޓެސްޓު ކުރަން ފަށައިފި އެވެ.
މީޑިއާތަކާއި ވާހަކަ ދައްކަވަމުން ސިވިލް އޭވިއޭޝަން މިނިސްޓަރު ޕްރަސަންނަ ރަނަތުންގަ ވިދާޅުވީ، ހޯމަ ދުވަހުން ފެށިގެން ލަންކާ އަށް އެތެރެވާ އެންމެންގެ ޕީސީއާރް ޓެސްޓު ހަދަން ފަށާފައިވާ ކަމަށެވެ. މިނިސްޓަރު ވިދާޅުވީ، ޓެސްޓު ނަތިއްޖާ އަށް ބެލުމަށް ފަހު ހޮސްޕިޓަލަށާއި، ކަރަންޓީނަށް ފަސެންޖަރުން ގެންދަން ޖެހޭނަމަ ގެންދާނެ ކަމަށެވެ.
ނަމަވެސް ފަތުރުވެރިންނަށް ލަންކާ ހުުޅުވާލަން ހަމަޖެހިފައިވަނީ އޮގަސްޓު މަހު ކަމަށް ޕްރަސަންނަ ވިދާޅުވި އެވެ. އެ ނިންމުމަކީ ކޮވިޑް-19 ކޮންޓްރޯލް ކުރުމުގެ ގޮތުން ރައީސް އުފައްދަވާފައިވާ ޓާސްކު ފޯހުން ނިންމެވި ނިންމުމެއްކަން މިނިސްޓަރު ފާހަގަކުރެއްވި އެވެ.
ކޮވިޑާއި ގުޅިގެން ބޭރުގެ ގައުމުތަކުގައި ތިބި ލަންކާގެ ރައްޔިތުން ގެނައުމުގެ މަސައްކަތް މެދުނުކެނޑި ކުރިޔަށް ގެންދާނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ.
