އާމްދަނީ ދަށްވެ ވަޒީފާތައް ގެއްލުމާ ގުޅިގެން ކުލި ނުދެއްކިގެން 220 މީހަކު މައްސަލަ ހުށަހަޅާފައިވޭ: ޖެންޑާ މިނިސްޓްރީ
2 ޖޫން 2020 | އަންގާރަ 07:37އާމްދަނީ ދަށްވެގެން މާލޭގެ ރަށްވެހިން ވެސް ރިޕޯޓު ކޮށްފައިވޭ
އެންއީއޯސީން ބޭއްވި ނޫސްވެރިންގެ ބައްދަލުވުމުގައި ޖެންޑާ މިނިސްޓްރީގެ ޑެޕިއުޓީ މިނިސްޓަަރު ފާތިމަތު ޔުމްނާ ވާހަކަ ދައްކަވަނީ
ކޮވިޑް-19އާ ގުޅިގެން އިގްތިސާދަށް އައި ހީނަރުކަމާއެކު ގިނަ ބައެއްގެ އާމްދަނީ ދަށްވެ ވަޒީފާތައް ގެއްލުމާ ގުޅިގެން ކުލި ނުދެއްކިގެން 220 މީހަކު މައްސަލަ ހުށަހެޅި ކަމަށް ޖެންޑާ މިނިސްޓްރީން ބުނެފިއެވެ.
ހޯމަ ދުވަހުގެ ރޭ ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ޖެންޑާ މިނިސްޓްރީގެ ޑެޕިއުޓީ މިނިސްޓަަރު ފާތިމަތު ޔުމްނާ ވިދާޅުވީ، ކޮވިޑް-19އާ ގުޅިގެން އެކި ގޮތްގޮތުން ދަތިތައް ކުރިމަތިވި ގިނަ ބަޔަކަށް މިނިސްޓްރީގެ ފަރާތުން އެހީތެރިކަން ފޯރުކޮށް ދެމުންދާ ކަމަށެވެ.
ޔުމްނާ ވިދާޅުވީ އާމްދަނީ ދަށްވެގެން ނުވަތަ އަދާކުރަމުން ދިޔަ ވަޒީފާ ގެއްލިގެން ހަރަދުތައް ނުބެލެހެއްޓިގެން ގިނަ ބަޔަކު މިނިސްޓްރީގެ އެހީތެރިކަމަށް އެދިފައިވާ ކަމަށާއި، މިހާތަނަށް ކުލި ނުދެއްކިގެން ނުވަތަ ބޯހިވަހިކަން ލިބުމުގައި ދަތިތައް ކުރިމަތިވެގެން 220 މީހަކު މައްސަލަ ހުށަހަޅާފައިވާ ކަމަށެވެ. އަދި އެއްދުވަހުން އަނެއް ދުވަހަށް މިއަދަދު އިތުރުވަމުންދާ ކަމަށް އޭނާ ވިދާޅުވިއެވެ. މީގެ ތެރޭގައި މާލޭގެ ރަށްވެހިން ހިމެނޭކަން ޔުމްނާ ފާހަގަކުރެއްވިއެވެ.
މީގެ އިތުރުން ޔުމްނާ ވިދާޅުވީ މާލޭގައި ދިރިއުޅެމުން ދިޔަ އާއިލާތަކަށް ދިމާވި ހާލަތާ ގުޅިގެން އެތައް ބަޔަކު ރަށަށް އެނބުރި ދާން ބޭނުން ވެގެން އެކަން ވެސް ހުށަޙަޅަމުންދާ ކަމަށެވެ. އެފަދަ އާއިލާތައް ރަށަށް ފޮނުވުމަށް ކުރަން ޖެހޭ މަސައްކަތްތައް ކުރަމުންދާ ކަމަށް ވެސް ޔުމްނާ ވިދާޅުވިއެވެ.
ޖެންޑަރ މިިނިސްޓްރީން ގިނަ މަސައްކަތްތަކެއް ކުރަމުންދާކަން ފާހަގަކުރައްވައި ޔުމްނާ ވިދާޅުވީ ބޯހިޔާވަހިކަމުގެ އިތުރުން ކާބޯތަކެތީގެ އެހީތެރިކަން ވެސް ފޯރުކޮށްދެމުންދާ ކަމަށެވެ.
ޖެންޑަރ މިނިސްޓްރީން މިހާތަނަށް އެންމެ ގިނައިން ބޯހިޔާވަހިކަން ފޯރުކޮށްދީފައިވަނީ މަގުމަތިން ނެގޭ މީހުންނާއި، މާލޭގައި ދިރިއުޅޭނެ ގޮތެއް ނެތި މިނިސްޓްރީއަށް ރިޕޯޓު ކުރި މީހުންނާއި، ކަރެކްޝަންސް ސަރވިސްއިން ބަންދުގެ ހާލަތު ނިމިގެން ދެން ވަންނާނެ ތަނެއް ނެތިގެން އައި މީހުންނަށެވެ. ވަގުތީ ބޯހިޔާވަހިކަން ފޯރުކޮށް ދެމުންދަނީ އެޑިއުކޭޝަން މިނިސްޓްރީގެ އެހީ ތެރިކަމާއެކުއެވެ.
ބޭސް ފަރުވާއަށް މާލެ އައިސް މީހުންގެ ތެރެއިން ރިސޯޓްތަކުގެ ކަރަންޓީނު ފެސިލިޓީތަކަށް ދާން އުޒުރުވެރިވާ މީހުން ތިބިކަން ފާހަގަކުރައްވައި ޔުމްނާ ވިދާޅުވީ އެމީހުން ހުޅުމާލޭގެ ގެސްޓްހައުސްތަކުގައި ކަރަންޓީނު ކުރަމުން އަންނަ ކަމަށެވެ.
