މަސްވެރިކަމުގެ ޤާނޫނުގެ ދަށުން ނުހެދި ހުރި ގަވާއިދުތަކުގެ މައްސަލަ އަލުން ދިރާސާކުރުމަށް ކޮމިޓީއަށް ފޮނުވައިފި
1 ޖޫން 2020 | ހޯމަ 20:46ކަޅު ބިލަ މަސް ގަތުމުގައި އާންމުކޮށް ހުޅުވާލުމަށް މިހާރު ހުރަހެއް ނެތް
ރައްޔިތުންގެ މަޖިލީހުގެ 2020 ވަނަ އަހަރުގެ ދެ ވަނަ ދައުރުގެ ފުރަތަމަ ޖަލްސާގެ ތެރެއިން
ދިވެހިރާއްޖޭގެ މަސްވެރިކަމުގެ ޤާނޫނުގެ ދަށުން ހަދަން ޖެހޭ ޤަވާއިދުތައް އެ ޤާނޫނުގެ 86 ވަނަ މާއްދާގެ ދަށުން ނެހެދިވާ މައްސަލަ ރައްޔިތުންގެ މަޖިލީހުގެ ޤަވާއިދު ކޮމިޓީން ދިރާސާކޮށް ނިންމި ގޮތުގެ ރިޕޯޓު އިތުރަށް ދިރާސާ ކުރުމަށް އަލުން އަނބުރާ އެ ކޮމިޓީއަށް ފޮނުވުމަށް ރައްޔިތުންގެ މަޖިލީހުން ފާސްކޮށްފި އެވެ.
ހޯމަ ދުވަހުގެ ރޭ ބޭއްވި މިއަހަރުގެ ދެވަނަ ދައުރުގެ ފުރަތަމަ ޖަލްސާގައި މިގޮތަށް ފާސްކޮށްފައި ވަނީ ވޯޓުގައި ބައިވެރިވެ ވަޑައިގެންނެވި 69 މެންބަރުންގެ އިއްތިފާޤުންނެވެ. މިގޮތަށް ހުށަހެޅުއްވީ މުލަކު ދާއިރާގެ މެންބަރު އިބްރާހީމް ނަސީރެވެ. އިބްރާހީމް ނަސީރުގެ ހުށަހެޅުއްވުމަށް ތާޢީދު ކުރެއްވީ ބިލެތްދޫ ދާއިރާގެ މެންބަރ އަޙްމަދު ހަލީމެވެ.
މަސްވެރިކަމުގެ ޤާނޫނުގެ ދަށުން ހަދަން ޖެހޭ ޤަވާއިދުތައް ނުހެދިވާ މައްސަލަ ޤަވާއިދު ކޮމިޓީން ދިރާސާކޮށް ނިންމުމަށް ފަހު ކޮމިޓީ ރިޕޯޓުގައި ބުނެފައި ވަނީ އެ ޤާނޫނުގެ ދަށުން ހަދަން ޖެހޭ ގިނަ ޤަވާއިދުތަކެއް ޤާނޫނުގައި ބަޔާންކުރާ މުއްދަތުގައި ނުނިމިވާ ކަމަށެވެ. އަދި މިކަމަކީ މަސްވެރިކަމުގެ ޤާނޫނުން މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ އާ ޙަވާލުކޮށްފައިވާ މަސްއޫލިއްޔަތެއް ކަމަށާއި އެ މަސްއޫލިއްޔަތު އަދާކުރުމަށް ޤާނޫނުގައި ކަނޑައަޅާފައިވާ މުއްދަތުގައި އަދާ ނުކުރުމުގެ ސަބަބުން އެ މުއްދަތު ފަހަނައަޅާ ދިޔަ ފަހުން އެ މަސްއޫލިއްޔަތު އަދާކޮށްފައި ނުވާ ކަމަށް ކޮމިޓީން ޤަބޫލުކުރާ ކަމަށާއި މިނިސްޓަރ ނަންގަވަން ޖެހިވަޑައިގަންނަވާ ޒިންމާ ނަންގަވާފައި ނުވާ ކަމަށް ކޮމިޓީގެ ބައްދަލުވުމަށް ވަޑައިގެން މިކަމުގައި ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ނިންމާފައިވާ ކަމަށެވެ.
މި މައްސަލަ ރައްޔިތުންގެ މަޖިލީހުގެ ޖަލްސާއަށް އެޖެންޑާ ކުރުމާއެކު ފިޝަރީޒް މިނިސްޓްރީން ވަނީ މިކަމާއި ގުޅިގެން ރައްޔިތުންގެ މަޖިލީހަށް ސިޓީ އެއް ފޮނުއްވާފަ އެވެ. އެސިޓީ ރައްޔިތުންގެ މަޖިލީހަށް އަމީން ޢާންމު ފާތުމަތު ނިއުޝާ ވަނީ ހުށަހަޅުއްވާ ދެއްވާފަ އެވެ. އެ ސިޓީގައި ވަނީ ކޮމިޓީ ރިޕޯޓުގައި ފާހަގަކޮށްފައިވާ ކަންކަމަށާއި މެންބަރުންގެ ކަންބޮޑުވުންތަކަށް ޖަވާބު ދެއްވާފަ އެވެ.
އެގޮތުން ޤަވާއިދުތައް ހެދުމާއި ގުޅޭގޮތުން ފިޝަރީޒް މިނިސްޓްރީން ބުނެފައި ވަނީ މިނިސްޓްރީން ހަދަން ޖެހޭ 6 ޤަވާއިދެއް އެކުލަވާލާ 31 މެއި ގައި މިހާރު އެޓަރނީ ޖެނެރަލް އޮފީހަށް ފޮނުވާފައިވާ ކަމަށެވެ. މެނޭޖްމެންޓް ޕްލޭންތައް ހެދުމާއި ގުޅޭގޮތުން މިނިސްޓްރީން ފޮނުވާފައިވާ ސިޓީގައި ބުނެފައި ވަނީ ހަދަން ޖެހޭ މެނޭޖްމަންޓް ޕްލޭންތައް ހެދުމަށް ޤާނޫނަށް ޢަމަލުކުރަން ފަށާ ތާރީޚުން ފެށިގެން 1 އަހަރު ދުވަހުގެ މުއްދަތެއް ދީފައިވާ ކަމަށެވެ. މި ޤާނޫނަށް އެއް އަހަރު ވާނީ މިއަހަރުގެ ސެޕްޓެންބަރ މަހުގެ 15 ވަނަ ދުވަސްކަމަށް ވާތީ އެކަން ކުރުމުގެ މަސައްކަތް މިނިސްޓްރީގެ ފަންނީ މުވައްޒަފުން ކުރަމުންދާ ކަަމަށް ވަނީ ބަޔާން ކޮށްފަ އެވެ. އަދި ޤާނޫނުން ލާޒިމު ކުރާ މުއްދަތުގައި އެކަން ކުރެވޭނެ ކަމަށްވެސް މިނިސްޓްރީން ފޮނުވި ސިޓީގައި ބުނެފައިވެ އެވެ.
ރޭންޖަރުން ޢައްޔަނު ކުރުމުގެ މަސައްކަތް ގޮސްފައިވާ ހިސާބާ ގުޅޭގޮތުން މިނިސްޓްރީން ފޮނުވި ސިޓީގައި ބުނެފައި ވަނީ އެކަމަކީ މިނިސްޓްރީން ކުރަންޖެހޭ ކަމެއް ކަމަށާއި އެކަން ކުރުމަށްޓަކައި ރޭންޖަރުން ޢައްޔަނު ކުރާނެ އަތޮޅުތަކާއި ރަށްތަކަށް ކަނޑައެޅި މިކަމާއި ގުޅޭގޮތުން ލޯކަލް ގަވަރމެންޓް އޮތޯރިޓީ އަދި ބައެއް ކައުންސިލްތަކާއެކު މަޝްވަރާ ކުރެވި އެލްޖީއޭއާއެކު އެމްއޯޔޫއެއްގައި ސޮއިކުރުމަށް މިހާރު ތައްޔާރުވެފައިވާ ކަމަށެވެ. އަދި ރޭންޖަރުން ޢައްޔަނު ކުރުމަށްޓަކައި ތަމްރީނު ޕްރޮގުރާމެއް އެކުލަވާލާފައިވާ ކަމަށްވެސް ސިޓީގައި ބުނެފައިވެ އެވެ. މިކަން މަޑުޖެހިފައި ވަނީ ކޮވިޑް-19 އާ ގުޅިގެން ކަމަށާއި ނަމަވެސް އޮފީސްތައް ހުޅުވި މަސައްކަތްތައް ފެށުމާއެކު ރޭންޖަރުން ހޮވާ ތަމްރީނު ކުރަން ފެށޭނެ ކަމަށް ފިޝަރީޒް މިނިސްޓްރީން ބުނެ އެވެ.
މީގެ އިތުރުން ދީފައިވާ އެކްސްލޫސިވް ރައިޓްސްތަކާއި ގުޅޭގޮތުން އޭޖީ އޮފީހާއެކު އިތުރަށް މަޝްވަރާކޮށް އެފަދަ އެކްސްކުލޫސިވް ރައިޓްސްތައް އެއްބަސްވުންތަކުން ނުލިބޭ ކަމަށް އޭޖީ ވިދާޅުވެފައިވާ ކަމަށް ސިޓީގައި ބުނެފައިވެ އެވެ. އެހެންކަމުން ކަޅުބިލަ މަސް ގަތުމުގައި ޢާންމުކޮށް ހުޅުވާލުމަށް މިހާރު ހުރަހެއް ނެތްކަމުގައި ވާކަމަށާއި މި ވިޔަފާރިއަކީ މިހާރު ޢާންމުކޮށް ހުޅުވާލެވިފައިވާ ވިޔަފާރިއެއް ކަމަށް މިނިސްޓްރީން ބުނެ އެވެ.
ކޮމިޓީގެ ރިޕޯޓަށާއި މިސިޓީ އާ ގުޅިގެން މެންބަރުން ކުރެއްވި ބަހުޘްތަކަށް ބަލާއިރު ސަރުކާރު ހިންގާ މައި ޕާޓީގެ މެންބަރުން ވަނީ ރައްޔިތުންގެ މަޖިލީހަށް ވަޒީރުން ޖަވާބުދާރީ ކުރެވޭ ކަން ފާހަގަކޮށް ވާހަކަ ދައްކަވާފަ އެވެ. ނަމަވެސް އިދިކޮޅު މެންބަރުން ވަނީ މީގެކުރިން އެމްޑީޕީގެ މެންބަރުން ފިޝަރީޒް މިނިސްޓަރާ ދެކޮޅަށް މަޖިލީހުގައި ދައްކަވާފައިވާ ވާހަކަތަކާ އެއްގޮތަށް ޢަމަލު ނުކުރާތީ އެކަމަށް ފާޑު ވިދާޅުވެފަ އެވެ.
