ފެންބޮޑުވުން ކޮންޓްރޯލް ކުރުމަށް، ފެންބޮޑުވާ ރަށްރަށުގެ އެސެސްމެންޓްތައް ހަދާނަން: އަސްލަމް

ރާއްޖޭގެ ރަށްރަށުގައި ފެންބޮޑުވާން މެދުވެރިވާ ސަބަބު ހޯދައި، އެންމެ ބޮޑަށް ފެންބޮޑުވާ ރަށްތަކުގައި އެސެސްމެންޓެއް ހަދަން ނިންމާފައިވާ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.

ހުޅަނގު މޫސުމުގެ ވިއްސާރާގައި ވަރަށް ގިނަ ރަށްތަކެއްގައި ފެންބޮޑުވާ މައްސަލަ ވަނީ ބޮޑުވެފަ އެވެ. އެކަމާއި ގުޅޭގޮތުން ހޯމަ ދުވަހު އޮންލައިންކޮށް ކުރިޔަށް ގެންދިޔަ ރައްޔިތުންގެ މަޖިލީހުގެ އެންވަޔަރަމެންޓް އެންޑް ކްލައިމެޓް ޗޭންޖް ކޮމިޓީގައި އަސްލަމް ވިދާޅުވީ، މިހާރު ދިމާވާ ފެންބޮޑުވުމުގެ މައްސަލަ އަކީ، ތަރައްގީގެ ގިނަ މަސައްކަތްތަކާއި އެކީގައި އައިސްފައި ހުރި މައްސަލަތައް ކަމަށެވެ.

އަސްލަމް ވިދާޅުވި ގޮތުގައި ފެންބޮޑުވާ ސަބަބު ހޯދޭނީ ވަކި ވަކިން ފެންބޮޑުވާ ރަށްތަކުގެ އެސެސްމެންޓެއް ހެދިގެންނެވެ. އެގޮތުން ފެންބޮޑުވުން ކޮންޓްރޯލް ކުރުމަށް ކުރެވޭނީ ކޮންކަމެއްތޯ ބެލުމުގެ މަސައްކަތް ކުރާނެ ކަމަށް ވިދާޅުވި އެވެ.

އޭނާ ވިދާޅުވީ، އެކަމަށް ހައްލެއް ހޯދޭނީ ޕަމްޕް ބަހައްޓައިގެން ނުވަތަ ޓޮޕޯގްރަފީ އެއް ހެދިގެންތޯ ބެލުން މުހިއްމު ކަމަށެވެ.

އަސްލަމް ވިދާޅުވީ، ރަށްރަށް ގުދުރަތީ ގޮތުން އުފެދިފައި ހުރިއިރު އެ ރަށްރަށުގެ ގޮނޑުދޮށުން ފެން ފައިބައިގެން ދާގޮތަށް ހުރި ތަންތަނުން ބައެއް ދިމަދިމާ ހުރީ ކޮނެފައި ކަމަށާއި، ބަނދަރު މަތި ހިއްކާއި، އާއްމުކޮށް ރަށުގެ ފަސްގަނޑަށްވުރެ އުސްކޮށް ވަރަށް ގިނަ ތަންތަން ހަދާފައިވާ ކަމަށެވެ. އޭގެ ސަބަބުން ރަށުން ވެހޭ ފެން ފައިބައިގެން ނުދިޔުމުގެ މައްސަލަ ދިމާވާކަމަށް ޕްލޭނިން މިނިސްޓަރު ފާހަގަކުރެއްވި އެވެ.

މޫސުމަށް އަންނަ ބަދަލާއި ގުޅިގެން ކޮޅިގަނޑުގައި ކަނޑު ގަދަވެގެން އަންނަ ކަންތައްތަކުގެ ހައްލު ހޯދޭނީ، ރަށްތައް ހިމާޔަތް ކުރުމަށް ކުރަމުންދާ މަސައްކަތެއްގެ ތެރެއިން ކުރެވޭ މަސައްކަތުން ކަމަށް އަސްލަމް ވިދާޅުވި އެވެ.