ޖޯޖް ފްލޮއިޑްގެ މަރުގެ މައްސަލައިގައި ކުރާ މުޒާހަރާތައް ޔޫރަޕަށް ފެތުރިއްޖެ

ޖޯޖް ފްލޮއިޑްގެ މަރުގެ މައްސަލައާއި ގުޅިގެން ކުރަމުން އަންނަ މުޒާހަރާތައް، އިނގިރޭސިވިލާތާއި، ޖަރުމަންވިލާތް އަދި ކެނެޑާ ގައި ވެސް ކުރަން ފަށައިފި އެވެ.

އިނގިރޭސިވިލާތުގެ ވެރިރަށް ލަންޑަން އަދި ޖަރުމަނުވިލާތުގެ ވެރިރަށް ބަރލިން ގައި ކުރި މުޒާހަރާގެ ބައިވެރިން ވަނީ ފުލުހުންގެ އަނިޔާވެރިކަން ހުއްޓާލުމަށާއި، ނަސްލީ ތަފާތުކުރުންތައް ނައްތާލުމަށް ގޮވާލާފަ އެވެ. މުޒާހަރާތަކުގެ ބައިވެރިން ދިޔައީ "އައި ކާންޓް ބްރީތް" ބުނެ އަޑު އުފުލަމުންނެވެ. މި ބަސްތަކަކީ ޖޯޖް ފްލޮއިޑްގެ އެންމެ ފަހު ބަސްތައް ކަަމަށް މަންޒަރު ދުށް ބައެއް މީހުންނާ ހަވާލާދީ ބައިނަލްއަގްވާމީ މީޑިއާތަކުން ރިޕޯޓްކޮށްފައި ވެއެވެ.

ބަރލިންގެ މުޒާހަރާގެ ބައިވެރިން ވަނީ، އެމެރިކާ އެމްބަސީ ކުރިމަތީގައި ތަފާތު އެކި ބެނަރތައް ހިފައިގެން ތިބި މި މަރަށް އިންސާފު ހޯދުމަށް ގޮވާލާފަ އެވެ. ލަންޑަނުގެ މުޒާހަރާގެ ބައިވެރިން ވެސް ވަނީ ޓްރަފަލްގަރ ސްކްއެއަރ ދޮށަށް އެއްވެ، "ބްލެކް ލައިވްސް މެޓަރ" އަދި "އައި ކާންޓް ބްރީތް" ބުނެ އަޑު އުފުލާފަ އެވެ.

މި ހާދިސާ ހިނގައިދިޔައީ އެމެރިކާގެ މިނިއާޕޮލިސް ގައެވެ. މަންޒަރު ބަލަށް ހުރި މީހަކު ސޯޝަލް މީޑިއާ އަށް ދޫކޮށްލާފައިވާ ވީޑިއޯއަކުން، ދޮން ނަސްލުގެ ފުލުހަކު، ޑެރެކް ޝޯވިން، ފްލޮއިޑް ގެ ކަނދުރާ މައްޗަށް ކަކޫ ލައިގެން ހުންނަ މަންޒަރު ފެނެ އެވެ. އަދި އޭނާ ބިންމަތީގައި އޮވެގެން ނޭވާ ނުލެވިގެން، އަހަަންނަކަށް ނޭވާ ނުލެވެޔޭ ބުނާ އަޑު ދެތިން ފަހަރަކު އިިވެ އެވެ.

މަންޒަރު ބަލަން ތިބި މީހުން ފްލޮއިޑް އަށް ނޭވާ ނުލެވޭ ކަމަށް ބުނުމުންވެސް، ފުލުސް މީހާ އަޅާ ވެސް ނުލަ އެވެ. ފްލޮއިޑް ނޭވާ ހާސްވެގެން އާދޭސް ކުރިއިރު، އޭނާ އޮތީ އަނގަވަތަށް، ފަހަތަށް ބިޑި އަޅުވާފަ އެވެ. އެތަނުން އެމްބިއުލާންސެއްގައި ހޮސްޕިޓަލަށް ގެންދިޔަ އިރުވެސް، ފްލޮއިޑް މަރުވެފައިވާ ކަމަށް ޑޮކްޓަރުން ވަނީ ހާމަކޮށްފަ އެވެ.

އެމެރިކާގައި މުޒާހަރާކުރަން ފެށި ފަހުން، ފުލުސް މީހާ ވަނީ ހައްޔަރަށް ގެންދެވިފަ އެވެ. މި ހާދިސާ އާއި ގުޅިގެން އޭނާ އާއި ސީންގައި ތިބި އެހެން ބައެއް ފުލުހުން ވަޒީފާ އިން ވަކިކޮށްފައިވީ ނަމަވެސް، މުޒާހަރާތައް ހޫނު ވެގެން ދިޔައީ މީހެއް މެރުމުގެ ކުށުގައި ފުލުހުން ހައްޔަރުކޮށް، ދައުވާ ކުރުން ލަސްވުމާއި ގުޅިގެންނެވެ.

އެމެރިކާގެ ފުލުހުން ނަހަމަ ގޮތުގައި ބާރުގެ ބޭނުން ކުރާ މައްސަލަ، ހާއްސަކޮށް ކަޅު ނަސްލުގެ މީހުންނާއި ދެކޮޅަށް، ވަނީ ބޮޑުވެފަ އެވެ. ކުށެއް ނެތް، ހަތިޔާރެއް ނެތް އެތައް ބަޔަކު މިހެން އަހަރެއްގެ މައްޗަށް މަރުވަމުންދާ ކަމަށް ބުނެ ދޭތެރެ ދޭތެރެއިން އެމެރިކާގައި މުޒާހަރާތައް ހޫނުވެ އެވެ. ނަމަވެސް، މި ފަހަރުގެ މުޒާހަރާތަކުގައި ފުލުހުންނާ ކުރިމަތިލުން އިތުރުވެ ފުލުހުންނާއި ފުލުހުންގެ މަރުކަޒުތަކަށް ހަމަލާދީފައިވާއިރު، ވިޔަފާރިތައް ލޫޓުވުމާއި އުޅަނދުފަހަރުގައި ރޯކުރުމުގެ މައްސަލަތައް އެހެން ފަހަރުތަކާ އަޅާ ބަލާއިރު އިތުރެވެ.

މުޒާހަރާ ކޮންޓްރޯލް ކުރަން އަސްކަރިއްޔާ ވެސް ތައްޔާރީ ހާލަތަކަށް ގެނެސްފައިވާ ކަމަށް ބައިނަލްއަގްވާމީ މީޑިއާތަކުން ރިޕޯޓްކޮށްފައިވާއިރު، މުޒާހަރާތަކުގެ ބައިވެރިން ބުނަމުން އަންނަނީ މުޒާހަރާތައް ހުއްޓާލަނީ ފޮލޮއިޑްެ މަރަށް އިންސާފު ލިބުމުން ކަމަށެވެ.