ތިން މަރުޙަލާއަކަށް ބަހާލައިގެން ޖަލުތަކުގައި އަޅާފައިވާ ފިޔަވަޅުތަކަށް ލުއި ދެނީ
ލުއިތަކުގެ ތަފްސީލު ކަރެކްޝަންސްގެ ވެބްސައިޓުން ލިބޭނެ
ކޮވިޑް-19 ފެތުރުން ކޮންޓްރޯލް ކުރުމަށް ޖަލުތަކުގައި ވަނީ ރައްކާތެރި ކަމުގެ ފިޔަވަޅުތައް އަޅާފައި
ކޮވިޑް-19 އާ ގުޅިގެން ޖަލުތަކުގައި އަޅާފައިވާ ފިޔަވަޅުތަކަށް ލުއި ދިނުމަށް ނިންމާފައިވާކަމަށް މޯލްޑިވްސް ކަރެކްޝަނަލް ސަރވިސަސްއިން ބުނެފިއެވެ.
އާދިއްތަ ދުވަހު ކަރެކްޝަންސް އިން ބުނީ، ޖަލުތަކުގައި އަޅާފައިވާ ފިޔަވަޅުތަކަށް ލުއިދޭނީ 3 ފިޔަވައްސަކަށް ބަހާލައިގެން ކަމަށެވެ. އެގޮތުން ޤައިދީންނާއި ބަންދުމީހުން އަދި އޮފިސަރުންނާއި މުވައްޒަފުންގެ ރައްކާތެރިކަމަށްޓަކައި އަޅާފައިވާ ފިޔަވަޅުތަކަށް ލުއިތަކެއް ދިނުމަށް ނިންމައި، ކަރެކްޝަންސް ގެ އާންމު އުސޫލު (އައު އާންމު ހާލަތުގައި ޢަމަލުކުރަންވީ ގޮތުގެ އުސޫލު) އަށް ހޯމަ ދުވަހުން ފެށިގެން އަމަލު ކުރަން ފަށާނެ ކަމަށް ބުނެފައިވެއެވެ.
ކަރެކްޝަންސް އިން ބުނީ، މި އުސޫލުގެ ދަށުން ޖަލުތަކަށް ދެވޭ ލުއިތަކުގެ ފުރަތަމަ މަރުހަލާ ފެށިގެން ދާނީ މާލެ ފުރަބަންދު ކޮށްފައި އޮތްއޮތުމަށް ނިމުމަކަށް އައުމުން ނުވަތަ އެކަމަށް ލުއިތަކެއް ދިނުމަށް ނިންމާ ހިސާބުން ކަމަށެވެ. އަދި ދެވަނަ މަރުހަލާ ފެށިގެންދާނީ އެއް ރަށުން އަނެއް ރަށަށް ދަތުރުކުރުން ހުޅުވާލާ ހިސާބުން ކަމަށާއި، ތިން ވަނަ މަރުހަލާ ފެށިގެން ދާނީ މިހާރު އިއުލާނު ކޮށްފައިވާ ސިއްހީ ކުއްލި ނުރައްކަލުގެ ހާލަތު ނިމުމަކަށް ގެންނަ ހިސާބުން ކަމަށްވެސް ބުނެފައިވެއެވެ.
އެއާއެކު، ފުރަތަމަ މަރުހަލާގެ ދަށުން ޖަލުތަކުގެ އެތެރޭގައި ހުއްޓިފައިވާ ކަންތައްތައް އަލުން ފެށޭނެ ކަމަށް ބަޔާން ކޮށްފައިވެއެވެ. އަދި ދެވަނަ މަރުހަލާގައި ޖަލުގެ ބޭރުން ކުރެވޭ ބައެއް ކަންތައްތައް ފެށިގެންދާއިރު، ތިން ވަނަ މަރުހަލާގައި އިތުރު ލުއިތައް ލިބިގެންދާނެކަން ފާހަގަ ކޮށްފައިވެއެވެ. ނަމަވެސް ޖަލުން ނުވަތަ ޖަލު ހުރި ރަށަކުން ކޮވިޑް-19 އަށް މީހަކު ޕޮޒިޓިވްވެއްޖެ ނަމަ ނުވަތަ އެ ރަށެއް މޮނީޓަރިންގ ހާލަތަށް ގެނެވިއްޖެ ނަމަ، ޖަލުގެ އެލަރޓް ލެވެލް އަށް ބަދަލުގެނެވި ލުއި ދިނުމުގެ މަރުހަލާތައް މެދު ކަނޑާލެވޭނެކަމަށް ބަޔާންކޮށްފައި ވެއެވެ.
އޭގެ އިތުރުން، މި މަރުހަލާތަކާއި ދެވޭ ލުއިތަކުގެ ތަފްސީލު ބަޔާންކޮށްފައިވާ އުސޫލު ކަރެކްޝަންސްގެ ވެބްސައިޓުން ލިބޭނެ ކަމަށް ބުނެފައިވެއެވެ.
ކޮވިޑް-19 އާ ގުޅިގެން އަޅާފައިވާ ބައެއް ފިޔަވަޅުތަކަށް ލުއިދޭން ނިންމި ނަމަވެސް، އަތް ދޮވުމާއި ޑިސްއިންފެކްޓް ކުރުމުގެ އިތުރުން، ކޮވިޑް-19 އަށް ޝައްކުކުރެވޭ އަލާމަތްތައް ހުރިތޯ ޗެކް ކުރުން ފަދަ ކަންކަން ކުރިއަށް ދާނެ ކަމަށް ކަރެކްޝަންސް އިން ބުނެއެވެ.
