ފަސް ކުޅުންތެރިން ބަދަލުކުރަން ހުއްދަ ދިނުމުން ބާސާ އަށް ވާނީ ގެއްލުން: ސެޓިއެން

މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރަން ހުއްދަ ދިނުމުން ބާސެލޯނާ އަށް އޭގެ ގެއްލުން ދައްކާނެ ކަމަށް އެޓީމުގެ ކޯޗު ކިކޭ ސެޓިއެން ބުނެފި އެވެ.

މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގޮތަށް ފީފާ އިން ހުށަހެޅި ގަވާއިދު އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން މީގެ ކުރިން ފާސްކޮށްފައިވާއިރު، މި ކަމުގައި އެންމެ ފަހު ގޮތްތަކެއް ނިންމާނީ ލީގުތަކުގެ ބޯޑުންނެވެ.

ފުޓްބޯޅަ ގަވާއިދު ހަދާ އައިފެބް އިން ފަސް ކުޅުންތެރިން ބަދަލުކުރެވޭ ގޮތަށް ވަގުތީ ގޮތުން ގަވާއިދު ބަދަލުކުރިއިރު، މި ގަވާއިދަށް އަމަލުކުރެވޭނީ މި ސީޒަން އެކަންޏެވެ. މި ގަވާއިދުގެ ދަށުން މެޗު ކުޅެމުންދާ ވަގުތުގައި ތިން ބަދަލުކުރެވޭއިރު، ހާފް ޓައިމްގައި ދެ ބަދަލު ކުރެވޭނެ އެވެ. އަދި އިތުރު ވަގުތަށް ގޮސްފިނަމަ ބޭނުންނުކޮށް ހުރި ބަދަލުތައް ބޭނުން ކުރެވޭނެ އެވެ.

މީގެ ކުރިން ޖަރުމަން ލީގުން މި ގަވާއިދަށް އަމަލުކުރަން ނިންމާފައިވާއިރު، ސްޕެނިޝް ލީގުން ވެސް އަންނަނީ މި ގަވާއިދަށް އަމުލުކުރުމާ ގުޅޭ ގޮތުން މަޝްވަރާ ކުރަމުންނެވެ.

ބާސާގެ ކޯޗު ސެޓިއެން ބުނީ މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރުމުން ބާސާ އަށް ލިބޭ ފައިދާ އަށް ވުރެ ބޮޑަށް ގެއްލުން ދައްކާނެ ކަމަށެވެ. އެގޮތުން ގިނަ މެޗުތަކުގައި ނަތީޖާ ނުކުންނަނީ މެޗުގެ ފަހު ވަގުތު ކަމަށާއި، އެ ހާލަތުގައި އިދިކޮޅަށް ކުޅޭ ޓީމަށް އިތުރު ބަދަލުތަކެއް ކުރަން ލިބިއްޖެ ނަމަ، ބާސާ އަށް ގެއްލުން ދައްކާނެ ކަމަށް ބުންޏެވެ.

މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރުމާ ގުޅޭ ގޮތުން ސްޕެނިޝް ލީގުން އަދި ވަކި ގޮތެއް ނިންމާފައި ނުވި ނަމަވެސް، ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ސްޕެނިޝް ލީގު ޖޫން މަހުގެ 11 ވަނަ ދުވަހު ފަށަން މިހާރު ވަނީ ނިންމާފައެވެ.