ވިޔަފާރި ކުރަން ބޭރަށް ދިއުމުގެ ހުއްދައަށް 8000 މީހަކު ވަނީ އެދިފަ
30 މެއި 2020 | ހޮނިހިރު 08:28ހުއްދަ ދިނުމުގައި ލަސްތަކެއް އެބައުޅޭ
ވިޔަފާރި ކުރުމަށް ބާޒާރު މަތީ ސަރަހައްދުގައި އާންމުން ހަރަކާތްތެރިވަނީ
މެއި މަހުގެ 29 ވަނަ ދުވަހުން ފެށިގެން ލޮކްޑައުންގައި އަޅާފައިވާ ފިޔަވަޅުތަކަށް ލުއިތަކެއް ދީފައިވާއިރު، ވިޔަފާރި ކުރުމުގެ ހުއްދައަށް އެދި 8000 ފަރާތަކުން އެދިފައިވާ ކަމަށް އެސިސްޓަން ކޮމިޝަނަރ އޮފް ޕޮލިސް ޑރ. ޢަބްދުﷲ ފައިރޫޝް ވިދާޅުވެއްޖެ އެވެ.
އާންމުންނަށް ނިކުމެ އުޅުމުގައި ދެވޭ ލުއިތަކުގެ ތެރޭގައި ކޮންމެ ގޭބިސީއަކުން ދެ މީހަކަށް ދެ ގަޑިއިރަށް ބޭރަށް ދިއުމުގެ ފުރުސަތު ލިބޭއިރު ހުރިހާ ފަރާތަކަށް ވެސް މަގުމައްޗަށް ނިކުމެ އުޅެވޭނީ ފުލުހުންގެ ހުއްދަ ލިބިގެންނެވެ. ހުއްދަ ލިބިގެން ނިކުންނަ ފަރާތްތަކަށް ދެވޭ ސަރަހައްދުތައް ވެސް އިތުރުވާނެ އެވެ.
މިއާއި އެކު ގިނަ ބަޔަކު ވިޔަފާރި ކުރުމުގެ ހުއްދައަށް އެދި ރިކުއެސްޓް ކޮށްފައިވާއިރު، ހުއްދަ ލިބުމުގައި ލަސްތަކެއް އުޅޭކަމަށް ބުނެ ގިނަ ބަޔަކު ކަންބޮޑުވުން ފާޅުކޮށްފައިވާ ދަނޑިވަޅެއްގައި އޭސީޕީ ފައިރޫޝް ވިދާޅުވީ، މިހާތަނަށް 8000 މީހުން ވިޔަފާރި ކުރުމުގެ ހުއްދައަށް އެދި ރިކުއެސްޓް ކޮށްފައިވާކަމަށެވެ. އެކަމުގައި ލަސްކަމެއް އުޅޭކަން ގަބޫލުކުރައްވާކަމަށް ފާހަގަކޮށް އޭނާ ވިދާޅުވީ، ހުއްދަ ދޫކުރުމުގައި ލަސްކަމެއް އައިސްގެން އުޅެނީ މި ދަނޑިވަޅުގައި ބޭނުންކުރަމުން އައި ސޮފްޓްވެއަރ ބަދަލުކުރަން ޖެހުމުންކަމަށެވެ.
އޭސީޕީ ވިދާޅުވީ, ސޮފްޓްވެއަރ ބަދަލުކުރުމުން ދިމާވާ ލަސްކަމަކީ "އެކްސްކިއުޒް" އެއް ނޫންކަމަށެވެ. ނަމަވެސް ވީ އެންމެ އަވަހަކަށް އެ ހުއްދަތައް ޕްރޮސެސްކުރުމުގެ މަސައްކަތް ފުލުހުން ކުރަމުން އަންނަކަމަށް ވިދާޅުވިއެވެ. އޭސީޕީ ޑރ. ފައިރޫޝް ވަނީ މި ދަނޑިވަޅުގައި ރައްޔިތުން ދެއްވާ އެއްބާރުލުމަށް ޝުކުރު އަދާ ކުރައްވާފައެވެ.
ފުރަބަންދު ލުއި ދިނުމުގެ ކުރިން ކޮންމެ މީހަކަށް 1 ގަޑި އިރު ދޭއިރު، އެވަގުތު 2 ގަޑި އިރަށް މިހާރު ވަނީ ބަދަލުކުރެވިފައެވެ. ކުރިއާ ޚިލާފަށް ފިހާރަތައް ހުޅުވާފައިވާ ވަގުތަށް ބަދަލުތަކެއް ގެނެސްފައިވެއެވެ. އެ ބަދަލަކީ ހެނދުނު 9ން ރޭގަނޑު 9ށް ފިހާރަތައް ޢާންމު ރައްޔިތުން ބޭނުންވާ ޚިދުމަތްތައް ހޯދަން ހުޅުވާފައި ބެހެއްޓުމުގެ ހުއްދަ ދިނުމެވެ.
