ކުދި ފިހާރަތަކަށް ވަދެވޭނެ މީހުންގެ އަދަދު ކަނޑައަޅާ ފިހާރަ ބޭރުގައި ފެންނަ ގޮތަށް ބަހައްޓަނީ
ވިޔަފާރި ކުރުމުގެ ހުއްދަދޭނީ ހެނދުނު 9:00ން ރޭނގަޑު 9:00ށް
މާލޭގެ ބާޒާރުމަތީ ސަރަހައްދުގައި ހުރި ފިހާރައެއްގައި މީހަކު ވިޔަފާރި ކުރަނީ
ހުކުރު ދުވަހުން ފެށިގެން ލޮކްޑައުންއަށް ލުއިތަކެއްދޭން ނިންމާފައިވާ އިރު، ކުދި ފިހާރަތަކަށް ވަދެވޭނެ މީހުންގެ ޢަދަދު ކަނޑައަޅާ އެ ފިހާރަތަކުގެ ބޭރުގައި ފެންނަން ހުންނާނެ ގޮތަށް ސްޓިކަރ ޖަހާނެ ކަމަށް އެސިސްޓެންޓް ކޮމިޝަނަރ އޮފް ޕޮލިސް ޑރ. ޢަބްދުﷲ ފައިރޫޝް ވިދާޅުވެއްޖެ އެވެ.
ކުދި ފިހާރަތަކަށް ހުއްދަ ދިނުމާއި ގުޅޭގޮތުން ވާހަކަ ދައްކަވަމުން ޑރ. ފައިރޫޝް ވިދާޅުވީ ވިޔަފާރި ކުރުމުގެ ހުއްދަ ދޭނީ ހެނދުނު 9:00ން ރޭނގަޑު 9:00ށް ކަމަށެވެ. އަދި އެ ހުއްދައިގެން ދަށުން ސައިކަލުގައި ދަތުރު ކުރެވޭނެ ކަމަށް ފައިރޫޝް ވިދާޅުވި އެވެ.
ފައިރޫޝް ވިދާޅުވީ ވިޔަފާރި ކުރާ ފަރާތްތަކުން ވެސް ހިފަހައްޓަން ޖެހޭ މިންގަނޑުތަކެއް އެބަހުރި ކަމަށާއި، އެ މިންގަނޑުގެ ތެރޭގައި މަދުވެގެން ތިން ފޫޓް ދުރުގައި މީހުން ތިބޭނެ ގޮތަކަށް އެތެރޭގެ ކަންކަން ތަރުތީބު ކުރަން ޖެހޭނެ ކަމަށެވެ. އަދި ކުރިއަށް އޮތް ދުވަސްތަކުގެ ތެރޭގައި ކުދި ވިޔަފާރިތަކަށް މުވައްޒަފުން ގޮސް ބަލާފައި އަދި އެތަންތަނުގެ 'ފިޒިކަލް ސްޕޭސް' އަށް ބަލާފައި އެތަނުގެ ބޭރުގައި ފެންނާނެ ގޮތަކަށް ސްޓިކަރ އެއް ބަހައްޓާނެ ކަމަށެވެ. އަދި ގިނަވެގެން ވަދެވޭނެ މީހުންގެ ޢަދަދު އޭގައި ހުންނާނެ ކަމަށް ފައިރޫޝް ވިދާޅުވި އެވެ.
އޭރުން އެއްވެސް ފަރާތަކަށް އޮޅުމެއް ނެތި އަދި އިޖުތިމާޢީ ގައިދުރުކަން ބަހައްޓައިގެން ޚިދުމަތްތައް ދެވިގެންދާނެ ކަމަށް ފައިރޫޝް ވިދާޅުވި އެވެ.
