ފުވައްމުލަކުން 100 މީހަކު ކޮވިޑަށް ޓެސްޓު ކުރަނީ
ރައްކާތެރިކަމުގެ ފިޔަވަޅުތައް ވަނީ އަޅާފައި
ފުވައްމުލަކު ގައި ކޮވިޑް-19 އަށް ޓެސްޓު ކުރަން މީހަކުގެ ސާމްޕަލް ނަގަނީ
ފުވައްމުލައް ސިޓީ ގައި ކޮވިޑް-19 ފެތުރޭތޯ ބެލުމުގެ ގޮތުން، ޓެސްޓު ކުރުމަށް 100 މީހެއްގެ ސާމްޕަލް ނަގައިފި އެވެ.
ފުވައްމުލައް ސިޓީ ހޮސްޕިޓަލުން ބުނީ، ނެގި ސާމްޕަލްތައް ޓެސްޓް ކުރުމަށް މާލެ ފޮނުވުމަށް، ސީ އެމްބިއުލާންސް ގައި އައްޑޫ ސިޓީއަށް ފޮނުވާލާފައި ކަމަށެވެ. ސިޓީ ކައުންސިލުން ބުނީ، އެ ސާމްޕަލް ތަކަކީ އަންގާރަ އަދި ބުދަ ދުވަހު އެ ސިޓީގެ ފިހާރަތަކާއި ހޮޓާ ތަކުގެ އިތުރުން ރެސްޓޯރަންޓް ފަދަ ތަންތަނުން ނަގާފައިވާ ސާމްޕަލްތަކެއް ކަމަށެވެ.
ފުވައްމުލަކުން އަދި މިހާތަނަށް ކޮވިޑް-19 ގެ ކޭސް އެއް ފެނިފައި ނުވިޔަސް ބަލިން ރައްކާތެރިވުމުގެ ގޮތުން ފިޔަވަޅުތައް ވަނީ ވަރުގަދަ ކޮށްފަ އެވެ.
އެކަމަކު މިހާރު އެ ފިޔަވަޅުތަކަށް ލުއިދޭން ވަނީ ފަށާފަ އެވެ. ރާއްޖެއިން ކޮވިޑް-19 ފެތުރެން ފަށާފައި ވާއިރު، މާލޭގެ އެކި ސަރަހައްދުތަކުން ރެންޑަމް ސާމްޕަލް ނެގުމުގެ މަސައްކަތް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދަނީ ކުރަމުންނެވެ.
