ބަންދުވެފައި ހުންނަ ތަންތަނަށް ދާއިރު، މާސްކް އަޅަންޖެހޭ ކަމަށް ޓެކްނިކަލް އެޑްވައިޒަރީ ގްރޫޕް (ޓެގް) ގެ ލީޑަރު ޑރ. އަލީ ލަތީފް ވިދާޅުވެއްޖެ އެވެ.
ލޮކްޑައުންއަށް ލުއި ދިނުމަށް ބޭއްވި ނޫސްވެރިންގެ ބައްދަލުވުމުގައި ޑރ.ލަތީފް ވިދާޅުވީ އާންމުކޮށް ބޭރަށް ނުކުންނައިރު މާސްކް އަޅުމަކީ ވަރަށް މުހިންމު ކަމެއް ކަމަށާއި، ޚާއްސަކޮށް ބަންދު ތަނަކަށް ދާއިރު މާސްކް އަޅަންޖެހޭ ކަމަށެވެ.
އެއީ ފިހާރައެއް ކަމުގައި ވިޔަސް، މީހުން އެހެން މީހުން ޚިދުމަތް ހޯދުމަށްދާ އެހެން ތަނެއް ކަމުގައި ވިޔަސް މާސްކް އެޅުމަށް ޑރ.ލަތީފް އިލްތިމާސް ކުރެއްވި އެވެ.
ޑރ.ލަތީފް ވިދާޅުވީ ކޮވިޑް-19ގެ މިހާލަތުގައި ސޯޝަލް ޑިސްޓެކްސް ބެހެއްޓުން ވަރަށް މުހިންމު ކަމަށާއި، މާސްކް އެޅުމާއެކު ގިނަގިނައިން ރަނގަޅަށް އަތްދޮވުން އިތުރުކޮށްފި ކަމުގައިވާނަމަ ބަލިން ސަލާމަތްވުމުގެ ފުރުސަތު ބޮޑު ކަމަށް ޑރ.ލަތީފް ވިދާޅުވި އެވެ.
މީގެ އިތުރުން ޑރ. ލަތީފް ވިދާޅުވީ ބޮޑެތި އޮފީސްތަކަށް ދާއިރު، އެ އޮފީސްތަކުގަ ޓެންޕަރޭޗަރ ޗެކް ކުރެވޭ ގޮތަށް އިންތިޒާމްތައް ހަމަޖެހިފައި ހުރުމަކީ ވަރަށް މުހިންމު ކަމެއް ކަމަށެވެ.
ކޮވިޑް-19ގެ މިހާލަތުގައި ރައްކާތެރިވުމަށް އަޅާ މުހިންމު ފިޔަވަޅުތަކަށް ފަރުވާތެރިވުމަށް ޑރ. ލަތީފް އިލްތިމާސްކުރެއްވި އެވެ.
